اهمية التوازن فى حياتنا

التوازن , اهمية , حياتنا

اهمية التوازن فى حياتنا

من الحاجات السلبية اللي بتأثر على حياتنا هي عدم وجود توازن
لازم نتعلم نعمل توازن في حياتنا، يعني منجيش على حاجة مكان حاجة...حياتنا كلها علاقات، علاقتنا بربنا، علاقتنا بشريك الحياة، بالاولاد، بالشغل/ البيت، بالمجتمع...واهم علاقة علاقتنا بنفسنا
لو في كفة رجحتها اكتر من التانية لازم تعرف ان في خلل في حياتك وانك محتاج توقف وتوازن امورك
امسك ورقة وقلم واكتب كل علاقة من دول واكتب جنبها ايه اللي المفروض تعمله عشان تحقق التوازن ده!
ابتدي بعلاقتك بربنا...هل انت بتأدي الفروض وخلاص؟ هل فيه فتور؟ طب تعمل ايه عشان تقرب اكتر منه سبحانه وتعالى
ايه اكتر حاجة بتريحك ممكن تحافظ عليها يوميا؟
ورد قرآن/ ركعتين قيام قبل النوم/ مناجاة/ دعاء/ صدقة/ عمل خير
حدد اللي بيريحك واكتبه في جدول وواظب عليه
وبعدين اتنقل للكتابة عن العلاقة اللي بعدها
وليكن شريك الحياة
ها ايه المشكلة؟ بتتخانقوا كتير؟ مختلفين في طرق التربية؟ مبتقعدوش مع بعض؟
حدد كل مشاكلكم سوا وشوف هتصلحها ازاي
ممكن دورات ليها علاقة بالحياة الزوجية/ مهارات التواصل عشان تعرف تتعامل/ اختبار شخصية ليكم انتوا الاتنين فتفهموا بعض اكتر/ هدف مشترك تعملوه سوا/ وقت فاضي تقعدوه من غير الاولاد وهكذا
برضه قرر وحدد واختار واكتب هتعمل ايه وازاي
خلصت ودخلت على علاقتك بالأولاد
ها متوترة؟ بتزعقوا وتتخانقوا؟ بيعندوا زيادة وطلباتهم كتير؟ مش طايق تسمع صوتهم؟
اكتب المشاكل كلها وفكر في الحلول
حلول التربية معتش اسهل منها بجد، كمية دورات وكورسات وصفحات وكتب، لو اديت لنفسك وقت بس تبص على مقالين تلاتة كل يوم حياتكم هتتحسن عشان انت بتحاول وبتسعى
جربوا ومش هتخسروا
العلاقة اللي بعدها
الشغل/ البيت
ها جاي على نفسك بزيادة عشانهم؟ مرجح كفتهم عن كل الناس؟ ولا مطنش عالاخر لدرجة الاستهتار؟
حدد مشكلتهم سواء شاغلينك بزيادة او مطنش بزيادة
وحدد ازاي هتوصل للتوازن
وبعدين انزل على اللي بعده، علاقتك بالمجتمع
اخبار علاقتك بالناس ايه؟ عندك اصحاب ولا قاعد مش وراك حد غير انك مركز مع شريك حياتك بس؟ طب ما ده هيخليك مش وراك غيره ولو مخدتش منه الاهتمام اللي يرضيك هتكتئب؟ اعمل علاقات وشوف ناس واصحاب، كلمهم وقابلهم...بس خلي بالك ان عدم التوازن برضه ممكن يكون انك بتتعرف عالناس بطريقة زيادة عن اللزوم لدرجة بتقع في مشاكل
حدد النقطة اللي محتاجة تتظبط واكتب حلول يلا للمشاكل
لو محتاج اصحاب حاول تقرب من اللي حواليك في الشغل او الجيران او المعارف..اما لو انت أصحابك كفتهم مترجحة عن باقي علاقاتك حاول تنسحب بالتدريج لحد ما توزنها
اخر حاجة بقا علاقتك بنفسك ودي محتاجة نتكلم عنها من هنا للسنة الجاية، لان اغلبنا بيركز اوي مع كل الحاجات التانية ويهمل نفسه
نفسك دي شاملة كتير
سواء صحتك او نفسيتك.
كتير مننا بييجي على صحته عشان خاطر حاجات تانية كتير وبيبقى شايف نفسه كده كويس ومضحي وخدوم وبينسى ان لبدنك عليك حق وبينسى انه هيتحاسب عليها
وممكن كمان في زحمة الحياة نهمل نفسيتنا ونضغط نفسنا ونحملها فوق طاقتها، نحاول نسعد ونرضي كل الناس الا احنا...نعطي ونساعد ونخدم كل الناس ونيجي على نفسنا ومنديهاش غير جلد ذات واحساس بالذنب وعدم تقبل
لا متسمحوش لده يحصل...كفاية كده ووقفوا واعملوا توازن وفكروا انتوا محتاجين ايه؟ نفسكم الناس تعاملكم ازاي او تديكم ايه؟ واعملوه انتوا لنفسكم الاول
صاحبوا نفسكم ومتجوش عليها
خلصنا العلاقات
ها هتبدأ بأي علاقة فيهم وهتعمل ايه عشان توصل للتوازن فيها؟

الموضوع الأصلي: اهمية التوازن فى حياتنا || الكاتب: ذابحني غلاك || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات

الله يعطيك العافية
ولا تحرمنا من مواضيعك