التخطيط اليومى

التخطيط , اليومى

التخطيط اليومى

الناس الحلوة اللي عندها اهداف في الحياة وكاتباها ومستنية الوقت اللي توصلها فيه ومستنية تحس بفرحة الانجاز
بتخططوا ليومكم ولا سايبينه ماشي كده؟ خطواتكم ناحية هدفكم ايه أخبارها، ثابتة ومدروسة ولا عشوائية؟
لازم يبقى عندك Note صغيرة كده للتخطيط اليومي
تعالى نشوف هتعمل بيها ايه:
* جمع كل أفكارك وأهدافك ( اللي انت كاتبها قبل كده) وحطها كلها أدامك واقراها تاني.
(المفروض انك كاتب رحلة الخطوات الصغيرة للهدف الكبير زي ما قلنا قبل كده)
* شوف أي واحدة من الخطوات الصغيرة دي اللي محتاجة منك أكشن سريع وحدد ايه هو الأكشن واكتبه على جنب في ورقة تانية.
(لو لقيت حاجة مش هتاخد منك دقيقتين وانت بتعملها، اعملها في ساعتها على طول متأجلهاش)
مثال لو مثلا عندك هدف انك تخس ولقيت إنك المفروض كل يوم تشرب حاجة سخنة معينة، قوم اعملها فورا واشرب متقولش من بكرا هبقى اعمل، بكرا مبيجيش. 😃
*طيب لو لقيت نقطة مكتوبة في الأهداف ومش لاقي لها اكشن يتعمل لا سريع ولا بطئ 😃
(شغل ومش عارف لسه تلاقي، جيم والحالة المادية متسمحش، أي حاجة يعني نفسك تعملها بس حالا مش في ايدك تاخد اي خطوة)
خلاص حدد النقطة دي وقرر طيب هل في خطوة تانية ممكن اعملها واحققها فيها بعدين، ولا أحطها كده واعمل جنبها علامة اني هبقى ارجعلها، ولا اشطبها خالص لاني خلاص مش هعرف اعملها وقررت مرجعلهاش، ولا احطها في خانة للامور المحتملة او اللي ممكن تحصل. شوف كده اهمية الهدف ده بالنسبة لك وخد قرار.
بعد ما تخلص كتابة الحاجات السريعة اللي المفروض تتعمل لكل هدف هتلاقي نفسك جمعتهم في ورقة لوحدهم...هما دول خطتك اليومية...شوف هتنفذها ازاي
بمعنى اصح وزعهم على يومك...يعني انت كل يوم بتصحي تفطر وتنزل الشغل/وتروقي البيت وتقعد عالموبايل...يبقى حط مكان الموبايل حاجة هتعملها من اللي في الورقة وهكذا طول اليوم تعمل حاجة منهم وكل ما تخلص حاجة اعمل جنبها علامة صح وتابع نفسك هتلاقي نفسك بتنجز ان شاء الله
في الاول انك تكتب قايمة المهام ده ممكن ياخد منك وقت كبير...لكن لما يكون روتين يومي وتتعود عليه بعد كده مش هياخد منك ربع ساعة كل يوم
الوقت اللي بتقضيه في التخطيط بيقلل وقت كتير اوي من التنفيذ وهتحس بالانجاز والايجابية
الوقت ده خليه ثابت يا اما كل يوم قبل ما تنام يا اما كل يوم اول ما تصحى
ابقي اقفل موبايلك وانتي بتخطط عشان التشتت 😃
ملحوظة أخيرة:
متنساش كل فترة ( اسبوع عالاقل) تراجع قايمة أهدافك وشوف في حاجة جديدة حابب تضيفها؟ او في حاجة خلاص رجعت في رايك وقررت تشطبها؟ لازم يبقى في معاد ثابت لتحديث قايمة أهدافك.

الموضوع الأصلي: التخطيط اليومى || الكاتب: ذابحني غلاك || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات

يعطيك العافية على
هيك الطرح