الحياة بنظرة أخرى ...

يعطيك العافية عشقي عيونك

شرفني مرورك ونورتي المدونة بطلتك ..

تحياتي لك ’’

’’ يوم من حياتي ’’





يوم مثل كل الأيام إلا اني حسيت من فترة ان الناس صار كلامها كثيير

ومن حظي السيء صرت أطيح بيدينهم لأني أصدع
ومن حظهم السيئ إنهم يطيحون بيديني لأن كلامهم ووقتهم ضايع معي >>> عناد




طبعا من الصداع نمت بدري

وصحيت نشيييط على غير العادة ..



أول ماوصلت الدوام حاولت أخلص كم شغله كنت معلقها من فتره

وأتفلسف بكم فكرة عرضتها على مديري وعلى مسؤول بالوزارة ورفضوها ..

لكن عناد خاصة إذا كنت مقتنع إن رأي صح وأسباب الرفض ماهي مقنعة ..


عموما أبدعت فيها وكتبتها وشرحتها بطريقة ثانية

أخيراً عجبت المدير ووافق عليها وطلب أضيف عليها شوية أشياء ..

ووصلت للي أبيه ..


ولكن مازال أصحاب الكلام الكثيير يهاجموني من كل جهه

بعضهم يحضر وبعضهم بالتليفون ..

وقبل ماينتهي الدوام فكرة أروح الجنادرية

أو

مكان فيه مخلوقات ماتتكلم

علشان أرتاح من الصداع ومن الكلام ..


وين هذا المكان اللي فيه مخلوقات ماتتكلم ..!!














حديقة الحيواان !!


وش هالجنون اللي جاني

بس صراحة تحمست للفكرة

وطلعت من الدوام بحماس ..

وبعد مشوار طويل وزحمة ..


جائت الصدمة !!






اليوم للنساء فقط !!

يعني حتى موعوايل نساء وبس ..

تحطيييم


لكن برجع الأسبوع الجاي لأني عرفت ان يوم الأحد للرجال فقط

وبكرة الجنادرية اول مرة اروحها نشوف وش سالفتها ..


**

يوم من حياة
بقايا حب

هههههههههههههههههههههههههههههههههههاااي ههههههههههههههههههههههههههاااي
الله يرجك بس
كل يوم موقف اجمل من الثاني بس حلوه طقيت مشوار على الفااضي
وانت ضاقت عليك الوسيعه الا حديقه الحيوان
بانتظار مواقف اجمل ي مبددددددع
جارتك عشقي

هلا بك عشقي

والله ياوخيتي حديقة الحيوان أرحم من كلام الناس اللي مايخلص ويجيب الصداع

يعني لما يفتح التمساح فمه تعرفين انه يتثاوب

ولما يزئر الأسد تعرفين انه مسوي فيها قووي

وغيره ..

يعني عمرك ماتسمعين التمساح يقولك : والله البارح مانمت من رجة الأولاد وصياحهم طول الليل .. تدري أنا يوم اني عزوبي كنت مرتااح !!

بس يفتح فمه تفهمين انه يبي ينام وخلصناااا

حتى الأسد ماعمره قال : تراي أقوى واحد هنا .. تصدق ذاك اليوم كاشتين أنا والعيال وبعد ماحطينا العدة جانا فلان وفلان وسطرتهم تسطير !! إنسى هالسواليف والفقش

بس يزئر وانت وفهامتك ..

بس مدري أحس إني إذا رحت يوم الأحد ماراح ألقى بني آدم غيري

أخاف الحيوانات يحسبوني ماوكلي !!


يعطيك العافية وأشكرك على متابعتك وطلتك الرائعة ..

تحياتي لك

فضفضة محتار في محار !!





أكيد تعرفون المحار








هذا الشيء اللي مسكر على نفسه واذا فتحته أحيان تلقى كنز

وأحيان تلقى هواء ..



وأنا عالمي كله في محار







طبعاً المحار اللي يحيط بعالمي هو الوقت ..


وقتي تقسم بين الدوام والقراءة والكتابة والفكر والراحة والنوم ..

ومساحة من الوقت راح أخليها لبيتي وزوجتي واكمال دراستي ان شاء الله .


سبب فتح هذا الموضوع

اليوم جاني عرض مبدئي بعمل مسائي

من 4 - 8م


بوظيفة في مركز استشارات اجتماعية ونفسية ..

يعني راح يكون شغلي من 8 ص الى 8 م





قبل سنتين كنت أدرس أربع ساعات وأشتغل تسع ساعات ..

صح انه متعب و ماعاد عندي وقت لنفسي ولاحتى للقراءة او الكتابة ..

والحين زواجي صار قريب

وهذا اللي محيريني ..

العمل في المركز راح يعطيني خبرة كبيرة وحلوة وأستفيد منها اذا فكرت أسوي مركز خاص فيني ..

وبنفس الوقت راح يأثر على كل الجوانب الثانية

يعني حتى الدراسة راح أبداها متأخر أو أنهيها متأخر .. وغير البيت

مدري أتمسك بهذي الفرصة أو أتركها واكمل مشواري اللي ركزت عليه وخططت له من قبل !!




*******

محتار في المحار
بقايا حب

رحلة ..







يوم الأحد الماضي رحت حديقة الحيوانات مثل ماوعدت نفسي ..

بصراحة كنت خايف أكون لحالي هناك وما ألقى أحد ..

وقلت يمكن يكون الأفضل لي إني ما أشوف أوادم هناك مليت منكم بصراحة .. >>


لكن على حظي كان زحمة زحمة ..

يعني تخيلوا


اليوم اللي أروح فيه ألقاهم مسوين رحلات مدرسية للحديقة !!

طلاب الإبتدائي ياكثرهم تحس نفسك داخل مدرسة موحديقة !!

وطلاب من الشرقية أعتقد إنهم بثانوي ..

وشباب مثل حالاتي جايين يوسعون صدورهم ..

وأنا جاي أسوي رحلة مع نفسي ..



المهم الحديقة بجد بجد رووووعة ..

أول مادخلت


شفت بركة كبيييرة








بط وطيور وبجع والله البجع حلوين

وبعدها رحت أشوف باقي الطيور


وشفت ذا مدري وش إسمه ..


















أما هذا يقولون انه قرد














سبحان الله حتى القرود يختلفون عن بعض !!

يعني لو يشوف قرودنا والله مايكلمهم .. طبعاً قرودنا ماراح يسكتون بيفلقون راسه بأقرب حجر .. تعودنا عليهم







بعدها رحت للذيب .. ياحبي له




















وبجنب الذيب لقيت حيوان يسمونه كلب الدنجو


هذا ماعرفت هو كلب ومسوي ذيب ولاذيب ومسوي كلب !!

وعلشان كذا رفض إني أصوره !!












تركته مع نفسه ..


ورحت للنمر قلت بس هذا اللي بيفرحني ولكن !!!

للأسف يقولون هذا نمر عربي ..

علشان كذا لما رحت لقيته داق اللطمة ونايم ..!!











أقوله قوم إنت نمر وش له تنام الحين !!

طيب قوم إشتغل حلل راتبك >>> أقصد أكلك ههه

لا حياة لمن تنادي ..

دامك عربي ماراح ترد على أحد .. وبعدين كل العرب يسون كذا جات عليك إنت !!

نوم العوافي ..

وتبون الجد الظاهر إنه عزابي ماشفت عنده أحد يونسه ..


بعد النمر كنسلت فكرة التصوير

وبديت أتمشى وأناظر هالحيوانات


شفت النمر الأفريقي

فرق والله

هذل صاحي ورايح جاي

ومتزوج .. لاتنسون تباركون له >>>> زوجته حامل ههه


وحبيب ألبي الأسد

جالس مع زوجته تحت الصخرة في جو رومنسي ..

لكن رحلة الإبتدائية خربت عليهم .. >> لو بيده كان نزل وكفخهم وحطهم بصحن شوربه



بس والله عندهم حيوانات كثيرة كنت أظنها إنقرضت مثل

جمل بسنامين >> والله راعي الابل اللي جنبي ترك الحديقة كلها وجلس عندهم ويصورهم ههه يدور مزايين !!


ووحيد القرن

هذا صعقني سبحان الله ديناصور ..

وبااااااارد


استمتعت هناك بأمانة ..

رحلة حــــــــــلوة


تحياتي

******

الرحالة بقايا حب

دورة تدريبية ولا إيش !!

أمس كان عندي دورة تدريبية

وبيني وبينكم الفتره هذي ولله الحمد دورة ورا دورة ..

يعني قبل اسبوعين كان عندي دورة بالشرقية

وبكرة عندي دورة

والأسبوع الجاي كله دورة ..

هههه والله احس إني مقصر بالدوام ماصرت أكمل شهر بالمستشفى لازم يطلعوني يومين او ثلاثة على الأقل ..

المهم نرجع لدورة أمس اللي كانت بنفس المستشفى

طبعاً لايخفى عليكم إني تأخرت كالعادة ...

بصراحة من يقولون دورة على طول أعرف إني راح أنام نص ساعة زيادة ..

لكن بجد كانت ليلة مزعجة جوالي ماسكت لما صارت الساعة 1 بالليل

قفلت الجوال

والمنبه نكبني وما رن صحيت الساعة 8

أصلا الدورة تبدأ الساعة 8

تروشت وشغلت السيارة وانا ماشي لقيت محل (( فول )) !!

ياسلام ذكرت أيام ماكنت عاطل أصحى الفجر وآخذ لي فول كأني شايب رايح مزرعته

ما خليته نزلت وجلست ويا معلم هات واحد فول هههه

وشاي

بعد ما خلصت فطوري كملت مشواري ..

أكيد حسيتوا اني ماودي أروح ..

بس مو بيدي

وصلت وأنا أسحب نفسي غصب

أو مادخلت المبنى بديت أدور على القاعة ..

ولما دخلت كانت المصيبة !!!

من المحاضر !!!!

نائب مدير المستشفى !!!

متأخر أكثر من ساعة وعند هذا !!

وش بقول له !!

لكن الحمدلله ابتسم وقال تفضل ..

جلست ولقيتهم مابعد بدؤا !!!

قال نائب المدير : هذي مشكلة الدورات الكل يتأخر ..

أنا سكت ولا كأني سمعت شي سويت نفسي ما أفهم عربي ..

بدت المحاضرة بعد خمس دقايق وبدأ الشرح

وحسيت بأيام المدرسة

وفي ذيك الأيام أكون أنا البطل الصامت

يعني حتى لو أعرف الإجابة والله ما أقولكم هههه ..

الكل يشارك وانا مطنش

بدؤ يحلون مسائل وأنا ضايع مدري بأي صفحه هم أصلاً .. أبغى أنااااام

نائب المدير كان بين فتره والثانية يناظر فيني

وأنا أبتسم إبتسامه غبية ومسوي مبسوط

وقبل ماينهي محاضرته وفي آخر مسألة كنت انا سرحااان

وللأسف جات عيني بعينه

وعلى طووول نزلت أناظر الكتاب

لكن كنت أحس فيه يقرب أكثر وأكثر وأنا مطنش وأناظر بالكتاب ..

لكن خلاص وقف عندي صار كرشه بوجهي خلاص مافي مفر لازم أرفع راسي ..

ناظرته ابتسم وقال : المسأله السادسة يلا حلها ..

لا

حاولت أصرفها قريت السؤال .. وفي واحد ملقوف نطق وجاوب

وعلى طوووول قلت مثله .. صح صح

ابتسم وقال طيب الجزء الثاني ؟

بعد ماخلصنا !!

سويت نفس الحركة وقريت السؤال مرة ثانية ... وملقوف ثاني جاوب ..

هههه طبعا قلت مثله .. صح صح

قال نائب المدير : شفت مايبغالها شي ..

قلت لنفسي : والله الملاقيف ماقصروا ولاكنت بتجلس معي لبكرة وماتلقى جواب هههه

انتهت محاضرة النائب ..

وجات محاضرة واحد ثاني

بعد البريك حضرت متأخر قالوا عشر دقايق لكن مع نفسكم ..

جلست ورا بالأخيرررر

المحاضر هذا نشب لي كل ما أرفع راسي ألقاه يناظرني ويأشر علي ..

تحملت لكن هو ماتحمل !!

قال : تعال إجلس قدام !!

لا الله يخليك لاتحرجني بين الدوافير ..

إستسلمت ورحت وجلست أول واحد وأقرب واحد للمحاضر ..

أحيان أحس ان المحاضرة سووها لي أنا بس .. من كثر مايتكلم ويشرح وهو مركز علي !!

بعد فتره ارتحت قدام أعتقد إن المكيف كان فوق راسي بالضبط !!

علشان كذا بديت أفهي وأسرح وأنعس ..

لحظتها قال المحاضر : أبغى منكم كلكم توقفون !!

لالالالا والله مرتاح كذا

وقفنا

قال تخيلوا انكم تصعدون سلم !!!

سلامات يابو شايفنا مجانين !!

ماتحركت

والناس بدت ترفع يدينها وتصعد السلم !!

إلتفت ولقيت نائب المدير معهم يصعد السلم !!

رفعت يديني بحزن وسايرتهم !!

ناظرني المحاضر : وش فيك تصعد ببرود ترى ولا بكرة راح توصل !!

ياناس أوصل وين !! هو فيه سلم أصلاً !! وش تبون إنتو ؟؟

بديت أسرع من وأحاول أسبقهم وأوصل قبل مايوصلون ههه

ما إكتفى أخينا بهذا قال : وانت تصعد السلم تخيل إنك تسوق دراجة يلا يلا يلا حرك رجليك !!

وش هالدورة أنا وش جابني لكم أصلاً ..

بعدها الحمدلله جلسنا وكملنا المحاضرة ..

وبعد الإستقرار البدني والنفسي من حركات المجانين اللي سويتها قبل اشوي .. رجعت أسرح و امرح ..

وياليت ماسرحت ..

قال المحاضر : يلا كلكم وقفوا ..

وقفت وأنا أقول الله يستر وش بيسوي فينا الحين ..

قال : يلا سباحة !!

سلاماااااات

أناظر نائب المدير!! ألقاه يسبح !!

أحد يقول لا ياناس

ناظرني وقال يلا إسبح

ضحكت وقلت : وإذا غرقت !!

ضحك هو : قال تخيل بس أنا أبغاكم تتنشطون .. يلا يلا

رفعت يديني وبديت أسبح وأسبح

قال : أسرع أسرع تخيل إن وراك سمك قرش وراح ياكلك !!

سبحت بأسرع شي عندي العمر واحد وماراح أضيعه على سمك القرش ..

وبعدها قال : فيه حوت قدامك إسبح على ورا !!

أناظر النائب !! يسبح

ورا ورا مثل ماتبي ..

وبعدها رجعنا للمحاضرة بالسلامة ..

وطبعا مايحتاج أقولكم عن الإستقعاد اللي صار ..

خمس أسئلة لي وواحد للمجموعة !! وعلى هذا الحال ..

إلى ان انتهت المحاضرة ..

وخرج بقايا حب بلياقة عالية وبقليل من الأضرار النفسية ..

وباقي عندي دورات كثيرة جاية الله يستر على عقلي لايروح مني ..

*******

من دورات بقايا حب .

معرض الكتــــــــــــــــــــــــــــــــــــــــــــــ ــــاب ,,









أمس رحت معرض الكتاب ..

من زماااااان وأنا ودي أروح بس والله خايف من التهور ..


تدرون لما البنت تدخل السوق تشتري كل شي وأي شي حتى لو ماتحتاجه أو أصلاً ماجاء على بالها انها تشترية !!


انا كرجل مايهزني السوق بالعكس أنشف ريق البايع

هذا وش صناعته !!

يقولي مثلاً فرنسي

أرد عليه أنا شايف منه صيني وش معنى انت تقول فرنسي !! تبي تلعب علي !!

وكم ذا ؟ طيب نزله أبغى أجربه .. لالا ماينفع رجعه .. جيب ذا ورجع ذا وجيب ذا ورجع ذا وووووو

شكراً بكمل لفتي بالسوق ويمكن أرجع لك ويمقن لا ..!!


لكن بالمكتبه

عبي الكيس !!

آخذ الكتاب أقرأ الفهرس أحوس الكتاب يلا اشتريت

طيب عندي خمسه مثله نفس الفكرة نفس الموضوع!!

شيل بس ..

وهذا اللي صار


أمس اشتريت 11 كتاب !!


وش بيقراهم طيب !!!!!!


دخلت بخمسين ريال يعني مسوي فيها اقتصادي وعارف كيف أمسك نفسي ..

لكن النتيجه اني صرفت 500 ريال هذا وأنا ماسك نفسي !!


يلا مثل مايقولون

من طلب العلا صرف مافي الجيب واليوم الأسود بيأدبك ..



المشكلة ماهي هنا ..

من كثر الكتب اللي في المعرض صرت عمي أو ماشوف ..











اللي صار اني لما وصلت شقتي عرفت ان الكتب ناقصه 2 !!

طبعاً نسيتهم بالمعرض لكن لايأس مع الحياة رجعت اليوم أدور عليهم ..

وأعطيتهم فرصه ياإما يرجعونهم لي اليوم ولا

ولا

ولا

برجع أشتريهم ..


اللي بيروح المعرض

ويجد كتابين مرميين على جانب الطريق في كيسٍ أبيضٍ جميلٍ حزينٍ...>> الزبدة أبغى كتبي اللي يلقاهم يجيبهم قبل لاأشتريهم مرة ثانية .


صح باقي نقطه صغننه

لما كنت بالمعرض كان في كُتاب أو مؤلفين جدد وعلشان يشجعونهم

يحطونهم بمنصه وأي واحد من الزوار يجي ويشتري كتاب هذا الشخص يوقع له المؤلف على الكتاب..











قلت يابقايا روح شوفهم أكيد بتلقاهم مبسوطين أقصد المؤلفين

يعني بعد كل هذا التعب والسهر والتفكير .. يلاقي زحمه من الناس جايين يشترون كتابه ويهنونه ..


وبعدين أنا لما أشوف هذا الشي أكيد بيشجعني اني أكتب وأصير مثلهم يوماً ما ..


المؤلف اللي رحت أشوفه كان من جد عنده زززززززززحمة

وكان شاب توه ماشاء الله عليه

لكن ماكان مبسوط !! حيرتني خشته ..

ياعم إنبسط هذا يومك هذا شغلك وكثييير من الناس جايين يقرون لك .. لا ويبون توقيعك بعد !!


خلك مثلي !!


أنا لما أكتب بمدونتي والأعضاء يقرون لي أنبرش من الوناسه ..


*********

الفتره هذي عندي دورة تدريبيه خلوني أخلصها وأجيب لكم سالفتها


*****

تحياتي


من كتاب : بقايا حب

معرض الكتــــــــــــــــــــــــــــــــــــــــــــــ ـــاب
الحلقة الاخيرة !!




اليوم بعد ماطلعت من الدورة رحت معرض الكتاب ..

ليه رجعت ؟؟

طبعاً أدور كتبي ..


لايأس مع بقايا ولا بقايا مع اليأس


المهم رحت مكتب الأمن طبيت عليهم الساعة 3.30 العصر

توهم مداومين ..

سألتهم : وش صار على كتبي يعني للحين مارديتوا علي ؟؟

قال ريسهم : ها !! والله باقي عندي كتب بالسيارة

أنا : وين سيارتك ؟؟ يلا مشينا ..


والله ماعندي فيه رحت معه وفتح سيارته ..





وش هالكتب !!!!!!


ماشاء الله صار عنده مكتبه بسيارته ..

يلا يابو دور معي ..


حست الكتب ولكن بدون فايده ..


أوكي الحين إرتحت !!


بصراحة كنت خايف أشتري الكتب وبعدها يتصلون فيني يقولون لي لقينا كتبك !!

وش بسوي نسختين من كل كتاب قهههههر ..


المهم رحت اشتريت الأول من العبيكان

والثاني مدري من وين اشتريته !!

صرت ألف وأدور هنا وهنا وهناك

وأخيراً وصلت


طبعاً ماوصلت ويدي فاضية

أخذت كتابين ثانين


وماشاءالله ذكرني البايع المصري


بصراحة أول مرة جيته كنت أتصفح الكتاب ومركز فيه

وهو ينط لي كل اشوي بكتاب ثاني ..


ناظرته بعصبيه

وقلت له : خلاص ممكن تسكت ..

أعصب لما أكون مركز وأحد يتنطط لي .


المهم سألته عن الكتاب قال : آه أنا فاكرك ..

وقلت له القصه

قال : حعملك دسكاوند ..


المهم النصاب باعه لي بنفس السعر .. مدري ليه يتفلسف علي من أول ..


عموماً أخذت الكتب وعلى طووول على السيارة >>> خايف يضيعون مرة ثانية

الحمد لله إكتملت المكتبه بس متى بخلص من قرائتهم !!! مدري !!



تحياتي

*********

من مكتبة : بقايا حب

هـــــــــــل تعرف حقيقة الحب ؟؟

إستبيان











1- هل ممكن أن تحب من نظرة ..


أ- نعم ب- لا


2- هل من الممكن أن تحب شخص لم تقابله ..

أ- نعم ب- لا





3- هل ترى أن الحب له بداية ..


أ- نعم ب- لا



4- هل ترى أن الحب له نهاية .

أ- نعم ب- لا



5- إذا أخلف حبيبك وعده هل تعذره .


أ- نعم ب - لا



6- إذا أخلفت أنت وعدك مع من تحب هل تعتذر .


أ- نعم ب- لا



7- هل تعتقد أن الحب يسبب الألم ..


أ- نعم ب- لا




8- إذا تركك من تحب هل تعذره ..

أ- نعم ب- لا





9- إذا تركك من تحب هل تبحث عن حب آخر ..


أ- نعم ب- لا



10- إذا كان لك أن تكتب قصيدة فيمن تحب هل ستكون قصيدة حزينة ..


أ- نعم ب- لا




11- هل تحاول أن تمتلك حبيبك


أ- نعم ب - لا





12- هل تصدقه دائماً


أ- نعم ب- لا






13- هل الحب يجلب السعادة دائماً


أ- نعم ب- لا



سجل خياراتك وانتظر
يتبع



******

تحياتي

بقايا حب