هل اختار الحنان ام الحزم

الحنان , الحزم , اختار

هل اختار الحنان ام الحزم

الحنان أم الحزم ؟؟
التربية الفعالة قائمة علي الحنان والحزم مع بعض لكن الشاهد إنه كتير من الأباء بياخد جانب واحد من الإتنين أو أحيانا بيتنرنح بين الإتنين ، بمعني إنه أحيانا بفضل أعامل أولادي بكل حب ودلع وتلبية للرغبات لحد ما أحس إني الدنيا اتعكت وإني مش طايقاهم من كتر الدلع فأقوم قالب علي الناحية التانية مرة واحدة أو أحيانا أكون بتعامل بكل حزم وشدة في كل وقت لحد ما أبقي مش طايقة نفسي وابقي عاملة زي الساحرة الشريرة ...
التوازن مهم وهو الأصلح في التعامل مع ولادنا وبيحث علي إحترام أولادنا ونفسنا.
نماذج لبعض العبارات الحازمة والحانية في نفس الوقت:-
* أنا عارفة إنك عايز تكمل لعب (إقرار للمشاعر) وده وقت ....
* أنا عارفة إنك حابب تكمل فرجة علي التليفيزيون (التفهم) ولازم الواجب يتعمل الأول.
* أنا عارفة إنك مش عايز تغسل أسنانك وممكن نغسلها مع بعض. هاه مين هيسبق التاني؟ (تشتيت الإنتباه لأمر مختلف)
* أنا عارفة إنك مش عايز تطلع القمامة وإحنا كنا متفقين علي إيه؟ (نسيبله مساحة إنه يفتكر الإتفاق)
*إنت مش عايز تنام دلوقتي ودلوقتي معاد النوم جه. هتقرأ قصة ولا إتنين؟ (إعطاء الإختيارات)
*أنا عارفة إنك عايز تكمل لعب بالفيديو جيمز والوقت خلاص خلص. هتطفيه ولا أشيله في دولابي. (مع أهمية المتابعة لتنفيذ الإتفاق).
كلنا عارفين النماذج المختلفة للشدة ومن جوانا عارفين كويس أوي أضرارها ممكن تكون إيه. بس هل فكرنا قبل كده إن الحنان المطلق ممكن يكون مضر برده وأضراره ممكن تكون إيه ؟؟
عارفين العصفورة الأم .. لو في وقت من الأوقات مزقتش أولادها برا العش عشان يتعلموا الطيران هيفضلوا قاعدين جوا العيش غير قادرين علي الطيران ..
وأولادنا زي العصفورة محتاجين أحيانا يشعروا بالمجهود وبالألم او بالإحباط عشان عضلات التحمل والمرونة تقوي عندهم ..
طب أنا ممكن أكون حانية زيادة عن اللزوم لو بعمل ايه ؟؟
*دايما برضيهم.
* بنقذهم في كل المواقف.
* بحلق عليهم بزيادة (بحيث إنه مفيش مساحه لخوض التجارب)
*الدلع المفرط بتلبية كل الطلبات.
*إعطائهم إختيارات كتيرة.
*حمايتهم من أي نوع من المعاناة.
وده كله هيؤدي إلي ضعف عضلات التحمل والمرونة والتقبل.
مثال: لو الطفل شبطان في لعبة وإنتي مجبتهاش .. متخافيش عليه من العياط والزعل .. شوية الزعل هيقوه وهيعلموه قيمة مهمة والمهم بقي دورنا في إقرار المشاعر دي "أنا شايفة إنك زعلان عشان مجبتش اللعبة إللي كان نفسك فيها" وبس. كتر الكلام وإبداء التعاطف بزيادة برده بيقلل من فرص التعلم من الموقف.
يبقي المهم نبقي عارفين إن الحنان بدون حزم يؤدي إلي التفريط وده بيؤدي إلي تنشئة طفل مدلل يظن فقط أنه محبوب لما رغباته كلها بتلبي.
لازم نؤمن بأولادنا ومنخفش نديهم الزقة الأولانية زي العصفورة طول ما إحنا بنديهم الدعم النفسي الصحيح

الموضوع الأصلي: هل اختار الحنان ام الحزم || الكاتب: BAYALA || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات