خناقات الاطفال والتليفون

والتليفون , الاطفال , خناقات

خناقات الاطفال والتليفون

ماما ماما... ماما ماما ماما.... نعم... عاوز أشرب.. هخلص مكالمه واجيبلك حاضر.... ماما ما ماما ماما... 🙏🙏 ياصبر ايوب.. نعم عاوز أكل... ياحبيبى هخلص كلام مع خالتك فى التليفون واعملك أكل.. الصبر.... ماما ماما.. ماما.... نعم 😓😓 ممكن أعمل بى بى ...ماتعمل يابنى هو انا قافله الحمام بالمفتاح 😈😈 بستأذنك ياماما.... ياروحى على الأدب ياناس 😇😇😇😇
مامااااااااااا........ مامااااااااا... احمد شد شعرى عااااااااااااا 😱😱😱😱 طبعا فى اللحظه دى ومع سارينه الاسعاف اللى ضربت، ماما يتقفل السماعة وتطلع تجرى تفض الاشتباك، وغالبًا بتزعق وتتعصب وتحس بالقهر وانها حتى مش عارفه تقول كلمتين فى التليفون
مين فيكم حصل معاها الموقف ده كل ماتتكلم فى التليفون.؟؟؟؟
هما العيال دى متسلطين عليا..... لا يا ست الكل مش متسلطين.. دول محبطين.. يعنى ايه؟؟ يعنى الطفل اللى بيعمل كدة مش حاسس بأهميته وقيمته عند الأم، فلما يلاقيها مشغوله أوى بحاجة ومركزة بيحاول يختبرها.. أنا أهم ولا التليفون.... زيك بالظبط لما جوزك يكون مركز فى الماتش وما يحلاش الخناق الا والفريق بتاعه قرب يخسر.... هو يعنى الماتش أهم منى 😤😤 اهو ابنك بيعمل كدا بالظبط... طيب أعمل ايه؟.. استأذن من اللى بكلمه دقيقه وادى ابنى انتباهى كله، اسمعه وبعدين أقوله ان كلامه مهم جدا وأنا عاوزة اركز معاه، واطلب منه يدينى ثوانى اخلص المكالمة ونتفاهم واحاول اختصر فى المكالمة واسمعه، وبعدين ابقى اتصل مرة تانيه اكمل كلامى....
هيتعود يقاطعنى، وهو مفيش احترام خالص للكبار، انتوا عاوزين تبوظوا العيال 😩😩 لا والله... فى كل الكلام ده، بس الاول اطمن ابنى على مكانته فى قلبى وانه اهم فعلا عندى من اى حاجه؛ مرة بعد مرة هيبطل يضايقنى لانه اطمن ومشاعرة هديت وهيكون حريص على مشاعرى هو كمان
طيب فى سبب تانى؟؟؟ اه طبعا
ممكن تكون العلاقه بينى وبينه غير مستقرة، فبيحاول بستفزنى فى اوقات مش هقدر أرد عليه فيها، زى اساءة السلوك فى التليفون أو السوبر ماركت... ودى أعمل فيها ايه دى كمان؟.....
أولًا، أحاول اصلح علاقتى بيه واكسبه عمومًا، وامنحه وقت خاص بيننا فى غير الاوقات اللى بكون مضغوطه فيها...
ثانيًا، أى طلب أو محاوله للضغط أو استغلال الظروف أو وجود ناس، اتجاهله تمامًا؛ علشان ميتعودش يستغل الوقت ده فى الضغط عليا، وافهمه بهدوء ان ده مش وقت مناسب انى أطلب فيه حاجة... لما يهدى ويستجيب للكلام، انفذله طلبه وامدح تصرفه السليم وأخلاقه العالية
اتمنى الكلام ده يحل المعضلة الأزلية، ونبطل خناقات التليفون 😎😎
دمتم فى هدوء وسكينة

الموضوع الأصلي: خناقات الاطفال والتليفون || الكاتب: ذابحني غلاك || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات

موضوع في قمة الخيال
طرحت فابدعت
دمت ودام عطائك
ودائما بأنتظار جديدك الشيق