رواية #مشاعر_مطرطشة الموسم الاول الحلقة 13

#مشاعر_مطرطشة , الموسم , الاول , الحلقة , رواية

رواية #مشاعر_مطرطشة الموسم الاول الحلقة 13

#مشاعر_مطرطشة

الموسم الاول

الحلقة 13

احمد : عادي لامار ,, لكن شن اخر قرار خذيتي مع فتحي

لامار : نبيه يطلقني

احمد : هذا اخر حل طلعتي بي متاكدة

لامار : باذن الله متاكدة

احمد : تم ورقة الطلاق حتجيك من فتحي

"""""

فارس : شن هالزحمة هذي كلها

مازن : قتلك هنا في شيل بنزينة وكلها اداعك عالشيل انت مش امصدق

توا شن يبي يطلعنا من هالطريق ,, الله يسامحك

فارس : معش انتهت قصة هالبنزينة وديما ادعاك وزحمة

مازن : مادخنش بي الزحمة ,, انت اللي سكرت راسك وقلت هيا نمشوو من الطريق ,, انا عارف فيها شيل بنزينة وزاحمة ,, لكن في بعض الاحيان الاجتهادات مش لازم منهن

بيب بيب بيب

فارس : تي اطلع انت وياه هيا

""""

فاطمة امكسدة عالفيس وضاربها الطل في العشية

مش عارفة شن ادير كساد وملل قاتل

كل اشوية اتخش ع طلبات المراسلة بالك

تلقى مسج من اي حد

فاطمة : مافش حتى مسج بالغلط ايجي هكي ولا هكي

انمشوو مع الوقت تي كسااااااد

نرمين كانت امقيلة كيف ناضت

فاطمة : صح النووم المغرب قريب ياذن

هذا كله اتقيلي ,,

نرمين : خذتني النووومة

الشتاء جو نت وحب نوووم وخلاص

فاطمة : طيح سعدك اشقي بقرايتك

نرمين : قوليها الروحك مشيتيها ليا

اطياح تقري في روايات وخلاص

خلّي الروايات ينفعنك

فاطمة : بالعكس في روايات مفيدة وخذيت منهن عبرة

نرمين : الحمد الله ما انحبهنش بكككل

فاطمة : توا خليني اندير قهوة بدام انتي نظتي وانهدرزو علي مهلنا

نرمين : بالمرة انلم افراشي قبل ماتزرق عليا ماما

"""""

بات حنين : شن طلع امعاك مع لامار

احمد : قالت تبي الطلاق

بات حنين : زعمك يطلقها

احمد : غصبن عنّا يطلق

بات حنين : ان شاء الله خير

احمد : ان شاء الله

""""

فارس ومازن وصلوو لقاعة جميلة ونسقوو امعاه المدير امتاعها

علي اساس بعد اسبووعين حيكوون الفرح

فارس : كل شي عالبركة يالعقرب

مازن : قتلك فكنا منها العقرب توا قوولي مازن بس

فارس : تم يامازن ,,

مازن : المهم فكنا منها الطريق اللي فيها شيل بنزينة زحمة مزالت

فارس : تي شعب امهجهج اشاعة طلعت ,, هما مايصدقووو

مازن : تي غير فكنا انت اول واحد داعكت عالبنزينة ,, كلكم اتقوولي شعب مايصدق يسمع اشاعة وتلقى اول واحد يداعك

علي اي شعب يحكي مش عارف

فارس : ههههههههه في هذي صدقت

"""""

حنين : شن حديري من راي

لامار : كان اطلقت ,, نبي انكمل دراستي في معهد المعلمين

عندي كم سمستر انكمله بالك انحصل عمل

احسن من عذاب مع هالنفسية

حنين : حتى هذا راي

وحنين وهي اتهدرز مع اختها رن نقالها

حنين : نعم مازن

مازن : خلاص حجزنا في قاعة جميلة ان شاء الله ربي يتممنا علي خير

حنين : ان شاء الله يا ظي اعيووني ,,

مازن : خلاص مش تشقي ابرووحك

حنين : اكيدة

مازن : يومين بس حنجي ندفع وانلبسك باذن الله

حنين : تم شووف اللي انت تبيه

مازن : تم ديري بالك ع روحك

حنين : حتى انت يا اعيووني

لامار : شن صار امعاكم

حنين : حجز في قاعة الجميلة ,, وقالي ممكن يومين اخرة ويحجي يدفع

لامار : ماشاء الله مبروووك ياحنووو

حنين : الله يبارك فيك ياميروو

""""

فاطمة : كلمي امي قوليلها تعالي حطينا قهوة

نرمين : قاعدة اتخيط في الفراشات في الصالة

فاطمة : هيا صبي نمشوولها غادي

نرمين : مرحب بامنا الغالينا

ام مازن : جت الهرجة واختها ,, جابك ربي ترا جيبي سلك اسود

نرمين : حاضر

ام مازن : ترا رني علي مازن قالي ماشي يبي يحجز في صالة

فاطمة : حاضر يا ماما

""""

فارس : بعدك السوبرماركت جنبنا مدرستين اعدادي وثانوي ,,

توا وقت دراسة حنخدموو عليهن

باهي اللي وفرت قرطاسية في السوبر ماركت

مازن : مسكين انت معتصمين ويبوو زيادة في مرتباتهم

فارس : معتصمين كيف

مازن : وين عايش انت ماعندكش علم يبوو يوفقوو الدراسة لين يرقوولهم مرتباتهم

فارس : اها

مازن : حقاتهم ريت هالجيل السمح اللي يطلعوو فيه ويخرجوو فيه

ريت هاليبانيين اللي انقروو فيهم

اغلبهم غش في الشهادة الاعدادية والثانوية الا من رحم ربي

قوبعة : قالك ربي يصلح الحال وخلاص

مازن : اللي تقهرك ان الاساتذة اللي يعطوو بضمير ويعطو حقاتهم للطالب ومايقصرووش ضد العصيان

قوبعة : انقانه معش تفهم شي بالرسمي

وهما يهدرزوو رنت فاطمة علي مازن

مازن : ها ياسكانة

فاطمة : ماما قالت شن صار فيك حجزت ولا لا

مازن : اها حجزت قاعة الجميلة

فاطمة : لولوولولوولولوولي

مازن : تي وذني

فارس : هههههههههه

فاطمة : خلاص ماما تستنى فيك

مازن : تم جايكم

الله اكبر الله اكبر

مازن : المغرب ياذن ترا درّس عند اول جامع انصلوو فيه

فارس : حاضر

""""""

احمد : خلاص يالامار نبي نمشي انروح بسهام

المغرب اذن انروح بيها

لامار : ربي يخليك ليا

احمد : خلاص حنشووف شن ايصير امعايا وبيناتنا تليفووون

لامار : تمام نرجى تليفوونك

"""""

حنين رنت علي فاطمة

حنين : افطوومة العسل

فاطمة : حنين الصقوعية

حنين : كلمكم مازن وقاللكم عالقاعة

فاطمة : اها كلمنا ربي يتمللك علي خير

حنين : عقبالك يارب

فاطمة : توو وينة هوو طايح السعد اللي يبيني

حنين : اصبري نصيبك يرجى فيك قاعد

فاطمة : نرجوو راد الله علينا ايش ورانا

حنين : هههههه ايوة بالزبط

"""""

ام مازن : من كان يكلم فيك

فاطمة : حنين تبي اتقولي علي قصة القاعة

ام مازن : بنت طيبة وتستاهل كل خير

نرمين : انقانها عسوووله بكككل

"""""

ديندار روّح متاخر من العمل كالعادة

يوتّي بكرج القهوة قبل

ويقعمز عاللاب توب

عشان يكتب الحلقة اللي يبي ينزلها ,,

يفتح الفيس قبل يشووف الاشعاارات والتعليقات

والرسائل وبعدها يسكر الفيس ويبدا يكتب في الحلقة

علي مهلة

وحال الغاية يقعد هدووء في الدار

ممكن يحط السماعات ويسمع الاغاني

المهم مع نفسه ومع افكاره ومع خيالة الواسع

""""""

فاطمة : معش جا مازن طوّل بككل

نرمين : انسيتي زحمة الشيلات ولا كيف

فاطمة : انسيت صح بكل قالو زحمة بشكل خيالي

نرمين : الزحمة كوووم والقصص اللي اطلعن عالزحمة كووم ابروحة

فاطمة : كيف

نرمين : وحدين يقوولوو اضراب من جماعة طبرق وحدين يقوولو عشان افتحوو الميناء وحدين يقوولوو مخطط برة بلعاني يبو يدمرو نفسية المواطن

فاطمة : انقانة شعب فسواي اللي يسمعها يقوولها

نرمين : علي قولة العقرب انتي منّا الشعب هذا

فاطمة : اكيدة انا اكبر فسوايا

" مازن فتح الباب وخش عالحووش "

نرمين : عمرك طويل اتموت عالعكووز ههههههه

مازن : كيف صار حلقة الاتجاه المعاكس في حووشنا

نرمين : هههههههههه

فاطمة : هههههههههه

ام مازن : وانا الاعلامي فيصل قاسم اللي يفتنها بيناتهم

مازن : تي انتي نجك ليا وخلاص يا اعويناتي

ام مازن : اس عيب امك

نرمين : لولوولولوولولوي

فاطمة : لوولولوولوي

مازن : بطلن اهبال وشهدرة خلاص المنطقة كلها عرفتني نبي نزوج

فاطمة : وجك فرحنات عشان حجزت القاعة

"""""

بثنية : زعلانة منك انا يافتّووحي

فتحي : ليش زعلانة مني يابيبي

بثينة : عشان انت ما اتحبنش

فتحي : من قالها ,, انحبك وانموووت فيك

بثينة : اتحبني صح نبي دليل

فتحي : حرام عليك بعد اللي درته لكي مزال تبي دليل

شريتلك سيارة وحصلتلك عمل حكومي شن ناقصك مزال

بثينة : نبيك اتشوفلي مكان نقعد فيه ليا وملكي

وقرّبتْ منّا واجد ودوتلا في وذنة بصوووت واطي ورومنسي

وبهمسه خفيفة منها كان اتحبني صح

اكتب الشقة هذي باسمي

وعطاته بووسه علي خدة

لين الرووج امتاع فمها

علّم علي خدّه

فتحي حرّك راسه وقال حاضر يابيبي اللي تبيها انتي حاضر

بثينة : نجّك ليا لما اتقولي بيبي تعال هيا في حضني

"""""

سهام : كنك طوّل وماجيت عشان اتروح بينا

احمد : تي زحمة اليووم البلاد بكككل

روان : بابا نبي جولاطي جولاطي جولاطي

احمد : حاضر يا اعيوون بابا

سهام : رايفت عليك يا اعيووني وحطت يدها علي اكراعه وهو يسووق

" بحت فيها احمد وابستم

احمد : حتى انا رايفت عليك واجد

سهام عطاته بوووسة من بعيد " اموواااه "

احمد : بطلي البنت في السيارة قاعدة

روان : حتى انا يابابا امووواه

احمد : خربتي البنت حرام عليك

سهام : ههههه مزال ماشفت شي مني

""""

نرمين : فيش ادير قاعد

فارس : شي كساد امكسد مع امي وخلاص

نرمين : باهي انت اتحبني صح ولا تكذب

فارس : نكذب اها

نرمين : عادي المهم ضمنت عريس ومش حنقعد عانس

فارس : يافرحة امك بييك

نرمين : انحبك موووت يامجنوووني

فارس : حتى انا انحبك موووت

نرمين : اموووووووواه

فارس استك وثلّج جسمه

نرمين : وين رحت

فارس : لا شي بس

نرمين : نجك ليا ياحشووومي

فارس : المهم لما تمشوو للدفع اكيدة خوك مش ماشي

نبيك تركبي امعايا للسيارة بما انا انشيلكم

نرمين : اكيدة ماعندك وين هارب منّي

"""""

الساعة 10:00 مساءا

حنين ومازن يهدرزو فوون

حنين : اخيرا حتقعد حلالي يا اعيووني

مازن : الحمد الله ياحنوو كنت نرجى فيه اليووم هذا

حنين : والله حبيتك من كل قلبي من اول يووم دافعت عليا في الجامعة

شفت اسد قدامي انعجبت بيك وخشيت خاطري

مازن : ربي يجمعني بيك بالحلال وانجيب منك احلى بيبي

حنين : اللهم امين يا ضي اعيووني

"""""

احمد : اوووووو من انتي

سهام : انا حبيبتك سهام

احمد : كنك هكي قعدتي

سهام : كني شينة ولا سمحة

احمد : قصدي هذي سهام اللي روحت امعايا امبدري

سهام : تي كنك قصدك شينة

احمد : اتهبلي

سهام : بجد تحكي

احمد : وين كانت الانثى هذي

سهام : الانثي هذي في يدك انت

تقدر اتخليها تطلع ولا تدفنها

احمد : تي انحبك مووووت يا اعيوووني

سهام : وانا نموووت في حبك

"""""

فاطمة كالعادة امكسدة

فاطمة : انا هبلة حظرت ديندار فاتتني حلقات رواياته

حنفك الحظر اقل شي انتابع الحلقات امتاعاته

فاطمة فكت الحظر علي ديندار

وقعدت تقرا في باقي الحلقات

علقت علي وحدة من الحلقات

فاطمة : ابدعت اتهبل الحلقة

شافت اشعار لايك علي تعليقها من ديندار

قالت انخشلة خاص ونكذب انقوله كنت امعطله احسابي بس

فاطمة : اهلين خونا ديندار

"""""

ديندار كالعادة اشوية يكتب من الحلقة

واشوية يشووف اشعارات الفيس

بالصدفة شاف اشعار رسائل واجد مش شايفهن

قال هيا نبدا انرد عليهن

اول رسالة: شكرا علي قبوول طلب الصداقة

ديندار : العفوو خيتنا

ثاني رسالة : كنك رايح متغير شكلك مش ديندار

ديندار : لا هو نفس الشخص لكن طبعي ما اندردشش واجد

ننشر حلقة وانسكر نت

ماعندش في جو التعارف والصداقات عالفيس

ثالث رسالة : اهلين خونا ديندار

ديندار قال في باله مش هذي حظرتني كيف صار كنها ردت تبعثلي

ديندار : اهلين كيف حالك خيتنا

"""""

فاطمة : بعد نص ساعة رد عليا

شكله فشاك ومغروور وشايف رووحه علينا

فاطمة : راك تحسابني حضرتك بس ,, غير كنت امعطله ايميلي

ديندار : لا عادي مادورش شي جو تمام خيتنا

فاطمة : باهي امتى تنزل الحلقة

ديندار : قريب تنزل الحلقة

فاطمة : كنت حابة انكوون من اصدقائك المقربين لو مافهش ازعاج

ديندار : عادي ليا الشرف وبالجودة بيك خيتنا ,,

لكن نستاذنك توا مشغول اشوية

فاطمة : لاعادي خووذ راحتك

""""

كل واحد عايش الليلة بشكل

فتحي عايش الليلة ذليل نفس الكلب مع بثينة

واحمد عايش احلى لحضات حياته مع حلاله سهام

ومازن يهدرز مع حنين وينسقوو في الفرح

ونرمين اتهدرز مع فارس لعند

وفاطمة امكسدة في قرووب الروايات وتقرا في الحلقات

""""

صباح ثاني يوم

سهام : هيا نووض حبيبي عمل

احمد : تاريتني ماكنتش متزوج زمان

سهام : حرام عليك ما اتحسسنش كنت حارمتك مني

احمد : المهم ربي يخليك ليا يا اغلى شي في حياتي

سهام : هيا نووض دوّش علي ماوتيتلك الفطووور

""""""

ام مازن اتنوض في نرمين وفاطمة

نرمين راقدة والنقال في يدها

وفاطمة راكدة عالكبيورد امتاع اللاب توب

ام مازن : عليك بايرات عابية عليهن

ام مازن : هيا نوووضن وقت

نرمين : باهي خلينا اشوية بس ياماما

فاطمة : هيا اني نايضة انا

ام مازن مشت تبي اتنووض مازن

مالقتش في الفراش

عرفاته نايض بدري

وماشي للسوبر ماركت امتاعه

""""

حنين نشاط نايضة الصبح بدري دارت فطوور لباتها

وقعدت اتوكل في امها المريضة اللي ماتقدرش اتحرك من مكانها

لكن لامار مزالت راقدة

"""

احمد : تبي حاجة يا اعيوووني ماشي توا

سهام : نبي اها

احمد : شن

سهام قرّبت منّا وعطاته بووسه علي خدّه

احمد : يابنت الناس خليني نمشي للعمل فكينا من اهبالك عالصبح

سهام : دير بالك علي رووحك حبيبي

احمد : اي حاجة نقصاتك رني عليا

سهام : تمام حبيبي

" سهام فرحانة عرفت كيف تكسب قلب راجلها بعد كان فايتها ومش امدورها "

""""

فتحي : بثينة مزال مانضتش معقووله

هيا نووضي عندي عمل عشان انوصلك

بثينة : من قالك حتمشي للعمل انت

فتحي : شن تحكي انتي

بثينة : امشي وتيلي الفطوور هيا

نفطر علي مهلي

بعدها اندوووش

بعدها اتشيلني

فتحي : حااااااضر يابيبي

""""

فارس : ماشاء الله نشاط يامازن اليوووم

مازن : مافهش لازم اتصبي علي رزقك وتفتح بدري

فارس : صدقت يالغالي

مازن : بعدين العشية نبيك نشروو الدبلة والمحبس لحنين

فارس : تم يالغالي

"""""

ام مازن : كنكن معش مشيتن للجامعة

فاطمة : نحنا امعطلات نقروو عشان امتحانات السمستر قريب يبدن

ام مازن : تمام انشغلت عليكن بس

"""""

ايمن : صار قاعة جميلة

اسلام : اها رسمي قاعة جميلة

ايمن : الدرناوي والافندي احمد يحسابوني مش زارق عليهم انّي فاطلهم

اسلام : خخخخخخخخ

ايمن : اكيدة وصّلو الكلام للعقرب ,,

عادي المهم يقعد عايش في رعب وخلاص

اسلام : عارفك اتْهّني

ايمن : المهم نبيك اتقووللهم علي اساس في واحد حنخلووه يقتل مازن

لكن الراجل اللي نبوو اندزوو ححنخلوو يطلق طلقة في العرووس

انخلووه يأمّن روحه وينسى العروس

اسلام : هكي حيقعد يبكي في يووم زفته

ايمن : تم احكي للجماعة اللي في الحبس انّ ايمن كلّف واحد يقتل العقرب يووم زفته اول مايووصل لصالة الفرح يبي يقتله عشان يوصلهم الخبر

اسلام : حاضر

::::

فارس : كنك مرة مرة تقعد سرحان يامازن

مازن : انفكر في هلي واجد وخايف عليهم

فارس : باذن الله .. ربي امعاهم

مازن : اللهم امين

فارس وهو يهدرز مع مازن رن نقاله

فارس : نعم افندي احمد

احمد : ممكن اليوم اتجيني في المكتب نبيك في الموضوع اللي قتلك عليه

فارس : خلاص ساعة هكي وحنجيك يا افندي

احمد : نرجى فيك

الموضوع الأصلي: رواية #مشاعر_مطرطشة الموسم الاول الحلقة 13 || الكاتب: كلي حلا || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات