مركز التحكم

مركز , التحكم

مركز التحكم

في حاجة في مخنا ( في علم نفس الشخصيات) اسمها مركز التحكم... ودي اللي كل شخص فينا بيُحكم على نفسه بيها هل هو له تأثير على الاحداث اللي بتحصل في حياته ولا لا.
علماء النفس مقسمين الشخصيات دي لنوعين: نوع عنده مركز تحكم داخلي( وده النوع اللي مقتنع انه يقدر يتحكم في حياته وله تأثير على الأحداث اللي بتحصله وانها ديما بتكون نتائج مترتبة على أفعاله هو )
ونوع تاني عنده مركز تحكم خارجي ( وده النوع اللي مقتنع انه حياته بيتحكم فيها عوامل خارجية قوية خارجة عن ارادته وانه ميقدرش يأثر أو يغير فيها)
مثال: شخصين كان عندهم امتحان ولما ظهرت النتيجة اكتشفوا ان درجاتهم سيئة، الشخص اللي عنده مركز تحكم داخلي هيلوم نفسه وقدراته وانه مذاكرش كويس للامتحان وان كان المفروض يبذل مجهود اكتر من كده. لكن الشخص اللي عنده مركز التحكم خارجي هيرمي اللوم على أد ايه الامتحان كان صعب وأد ايه دكتور المادة ظالم وبيجيب امتحانات صعبة وأد ايه هو حظه سئ وتعيس.
الناس اللي مركز تحكمهم داخلي بيكونوا واثقين في نفسهم ديما، بيكونوا قيادين ( غالبا بيقودوا الناس اللي مركز تحكمهم خارجي)، بيقدروا يتحكموا أكثر في سلوكهم، عندهم ديما رغبة في التعلم، بيتحملوا مسئولية أفعالهم، بيقدروا يتعاملوا مع التحديات والضغوط، بالعكس دول ممكن يستخدموا التحديات دي في انها تخليهم أقوى.
الناس اللي مركز تحكمهم خارجي ديما بيحسوا انهم ضحايا في أي مشكلة بتحصل، على طول وبسرعة يلوموا كل الناس بس مش بيلوموا نفسهم، بيبقوا ديما عايزين حد يقودهم ويوجههم، وبيتجنبوا ديما انهم يتحملوا المسئولية، وديما معرضين للضغوط والتوتر والاحباط.
النوع الداخلي أقدر على تحقيق انجازات كتير وبينجح وممكن يوصل لمناصب، لكن النوع الخارجي بيبقى شايف ديما ان أي مجهود مبذول ملوش لازمة لانه مش هيقدر يغير حاجة من اللي بيحصله.
بس الخبر الحلو هو ان الخارجيين ممكن ويقدروا يحولوا مركز تحكمهم لمركز داخلي أكتر عن طريق انهم يزودوا ثقتهم بنفسهم ويزودوا مهارات حل المشكلات عندهم، ولما يقدروا يحلوا المشكلات هيعرفوا انهم بيقدروا يتحكموا في حياتهم أكتر وانهم يقدروا يواجهوا التحديات اللي بتقابلهم.
خطوات حل المشكلات:
* اول خطوة عشان تحل أي مشكلة هي انك تعترف ان في مشكلة أصلا وانك تحددها بالظبط وتكتبها كاملة بكل تفاصيلها.
* اعمل عصف ذهني عشان توصل لكل الاسباب اللي اتسببت في المشكلة دي واكتبها.
* اعمل عصف ذهني تاني وطلع كل الحلول الممكنة اللي تيجي في بالك واكتبها.
* اقرأ وفكر واختار أكثر حل مناسب وشامل، يعني يكون هيحقق الهدف ويكون له أقل آثار سلبية.
* ابدأ بتنفيذ الحل بس ده محتاج منك تخطط وتفكر وتحدد هتنفذه ازاي.
* قيم الحل بعد تنفيذه، شوف المشكلة اتحلت ولا في حاجة في الخطة محتاجة تعديل، ولا الحل منفعش اصلا ومحتاج ترجع للحلول اللي في الورقة وتختار منها حل تاني خاالص.
طبعا مع التكرار مهارات حل المشكلة هتتحسن وثقتك في نفسك هتزيد وترجع تفكر بمركز التحكم الداخلي وتعرف انك تقدر تتحكم في حياتك.
ملحوظة: الاستعانة بالله والدعاء أهم شئ، فهم المخ ده علم بس بلاش يوقعنا في فكرة ان حياتنا بايدنا بس وننسى قدرة وعظمة الخالق. الفكرة كلها في بذل المجهود والتوكل على الله لكن مش التواكل

الموضوع الأصلي: مركز التحكم || الكاتب: ذابحني غلاك || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات

جزاكم الله خيرا
على المشاركة الرائعة
وجعلها فى ميزان
حسناتكم