آخر 10 مشاركات
أهمية الوقت في حياة المسلم (الكاتـب : - )           »          حال السلف في رمضان (الكاتـب : - )           »          عبدالله بن مسعود (رضي الله عنه) (الكاتـب : - )           »          Tmark اناقة ومظهرادم تحكي فخامتك (الكاتـب : - )           »          Tmark لاتضع حدود لنفسك تعيقك (الكاتـب : - )           »          ◄ ... سجـــل حضــورك بأســم ولـد ... ◄ (الكاتـب : - )           »          1 (40) 13رمضان (الكاتـب : - )           »          وأشرقت الأرض بنور ربها (الكاتـب : - )           »          محاسن الصيام (الكاتـب : - )           »          الاعتصام بالله في زمن غربة الإسلام (الكاتـب : - )


العودة   منتديات كلك غلا > ۩ المنتدى الأدبي ۩ > ๑۩۞۩๑ القصص والروايات ๑۩۞۩๑

๑۩۞۩๑ القصص والروايات ๑۩۞۩๑ ۞ قصص وروايات لتمتعو بها قلوبكم وعقولكم ۞

إضافة رد
 
أدوات الموضوع انواع عرض الموضوع
#1  
قديم 04-15-2018, 06:25 PM
دلوعة القمر
همسه غلا غير متواجد حالياً
    Female
لوني المفضل Violet
 رقم العضوية : 2387
 تاريخ التسجيل : Mar 2011
 فترة الأقامة : 4746 يوم
 أخر زيارة : 07-08-2022 (05:52 AM)
 الإقامة : السعوديهــــ
 المشاركات : 1,867 [ + ]
 التقييم : 10
 معدل التقييم : همسه غلا is on a distinguished road
بيانات اضافيه [ + ]
افتراضي رواية #مشاعر_مطرطشة الموسم التانى الحلقة 30




#مشاعر_مطرطشة

الموسم الثاني

الحلقة 30

كانت وفاء اضم في حوستها
جتها نجاح
نجاح : ماما نبي انصارحك بحاجة
بس نبيك مهما صار نقعد بنتك
وما انطيحش من عينك
ونبيك اتصبي امعايا
معش نقدر اندسّها اكثر من هك لاني تعبت
وفاء : شن قوولي
نجاح : انا انا انا
وفاء : شن قولي هيّا خوفتيني
......
,,,
الافندي احمد كان في المكتب امتاعه وسمع الصوت مسج النقال
وشاف الرسالة امتاع مازن اللي دازها لها علي قصة مرض حنين

الافندي الأحمد : ان شاء الله خير زعمك شن صاير
,,,,,
كانو امكسدين مروان وفارس في السوبر ماركت
علي جيّة لؤي
فارس : البلبول جا ,,
لؤي : هيّا هيا شباب
مروان : وين نشاط اليووم
لؤي : اها مش غير .. وين العقرب
فارس :طلع هو وهله توو ايجي
لؤي : معناها خلاص حنطب عليكم العشية
عندي كم مشوار انا
مروان : تم خووذ راحتك
.....

نجاح حكت الامها علي كل حاجة بينها وبين رمضان

وفاء : شن شن شن معقولة بنتي هذي
معقولة اتسلمي الروحك الشاب
بكل هالسهووولة
نجاح قعدت تبكي
جت وفاء شوورها
وفاء وهي متعصبة : فكيني منهن ادموووعكن هذينا
كيف صار وامتى احكيلي
نجاح : رمضان ضحك عليا قالي حنزوجك
وفاء : ياربي ياربي شن اندير مع البنت هذي
نجاح قعدت تبكي
وفاء : قتلك فكيني منهن اموووعك هذينا
وضربتها كف علي وجها
,,,,,
قاعد مازن وحنين من عيادة العيادة
وكانووو في السيارة
حنين : نسألك حبيبي
مازن : نعم
حنين : عليش هذكي اليوم لمّا رفعت موس علي
نرمين مابيتش ادير أي ردة فعل
توقعتك اتهزبني او اتعارك
ماكنتش متوقع حتكون هكي ردة فعلك الحق
مازن : ابستم

في الماضي

لما انفجر حوش مازن كانت حنين عند حوش هلها
لما جا يروح بيها بعد كملو صيانة الحووش
طلع بات حنين
بات حنين : اهلين مازن
مازن : اهلا عمي
بات حنين : شن جو الحوش
مازن : لا الحمد الله اموره طيبة شبه كملناه
بات حنين : شن جو حنين امعاكم الفترة هذي
مازن : الحق رايحة متغيرة وقالبه وجها
مش عارف شن صارلها
لكن قلت اكيدة مع الوقت حترد نفس قبل
بات حنين : نفس الشي هنا
مرة مشكلة مع لامار مرة قاعدة ابروحها في الدار
مازن : شن انتم امضايقيينها في حاجة
بات حنين : لا شكلها متوترة او صايرلها
مرة مرة اتجيها الحالة هذي تقعد رايقيلها
مازن : اها
بات حنين : نطلب منك طلب
مازن : اعيوني لكّي
بات حنين :ياريت الفترة هذي اتحملها وتصبر عليها
راهوو هذا الطلب مش مني من أمها خصيصا
مازن : حاضر ياعمي وسلمنا علي عمتي واجد
لكن عليش في حاجة هيا
بات حنين : لا بس قلت مرات اتعصب عليها
وتطلع من طورك عليها
علي طلعت حنين وامها
مازن : حاضر ياعمي
حنين : تعال تبي اتسلم عليك ماما
ام حنين : أهلين مازن
مازن حبّة علي يدّها وراسها
وشاف في اعيووون ام حنين
كلام اللي قاله له كلّا بات جنين
مازن : هيا حنين يرجوو فينا عالعشاء
بات حنين : كان تعشيتوو افضلكم
مازن : مرة اخرة ياعمي
وركبت حنين وروّح بيها شور الحووش

...

في الوقت الحاضر

حنين : اوووي نحنُ هنا وين رحت انت
مازن : نعم
حنين : قتلك توقعتك اتهزبني او اتعارك
كان يسووق مازن
يدّ اليسار ماسك بيها دومان السيارة
ويد الاخرة حطها علي راس حنين
ودفّها جنبه
وخلّا راسها علي صدرة وهوو يسوووق
مازن : عشان انحبك وانمووت
عشان انتي اول حب في حياتي
انا كانت حياتي ضلال في ضلال
كانت كلها منكرات ومعاصي
ماعمرش جربت شعورالحب
الحب كنت انشوف فيه في المسلسلات التركية
ماكنتش متوقع قلبي يحبك ويعشقك
حنين : عارف ياروحي انا بعد فتت خطيبي
كرهت حاجة اسماها رجالة في البداية
وفتّها عشان الجو امتاعه
ماكنتش متوقع انحب شخص أصلا هو يبيع فيهن
مازن : القلب ومايهوى
مازن قعد يبحّت في الخمار
شاف الخمار مبلول عند وجها
مازن : تبكي انتي ولا شي
حنين : نبكي عشان انحبك بس
مازن : خلينا تو انروحوو خير
حنين : ماتبش اتقولي شن عندي
كنك اتعامل فيا وكاني بين الحياة والموت
مازن : لا بس كلهم مزالوو ماعرفووش شن عندك
حنين : باه
مازن : انحبك موووت
,,,

الساعة 2:00 ضهرا

معاوية خش للشقة وعارف انّها ماطلعتش
وجاب مع غداء من المطعم كالعادة
قعد يبرم في الشقة
لقها رابطة منشف علي راسها
واتسيق في المطبخ
معاوية : هههههههههههههه
معاوية : فيش اديري انتي نظيف قاعد
مايا : انا خليته في حالة
معاوية : راك تحسابي جايبك خدامة ولّا حاجة
مايا : ها امالا شن
معاوية : تي لا مش هكي انا
مايا : اغلب جماعة القراويط هكي يبوو
معاوية : لا انا مش منهم
مايا : باهي انا شن وضعي هنا
معاوية : شفتك عالطريق وجعتيني خذيتك امعايا للشقة
مايا : انا شحاته راه ,, بس بنت ناس راه
وقعدت ماسكة رووحها وخايفة
معاوية : هههههههههههه
مايا : كنك تضحك
معاوية : يعني لو نبي انديرلك حاجة راه درتها من امس
مايا : قعدت اتحك في راسها
معاوية : انتي قارية لعند سنة كم
مايا : لعند سنة سادسة ابتدائي
معاوية : عندك مكان عندك حوش تقعدي فيه
مايا : لا كل مرة في مكان عادي
معاوية : خلاص من اليوم انا قعدت نفس خوووك
مايا : عرفتك توا خوك ,,و بعدها اتخش علي كلام اخر
عرفتكم انا انشوف فيكم في الأفلام المصرية
معاوية : هههههههههههه
مايا : سادك ضحك
معاوية : اليوم العشية حتطعلي امعايا لاحسن محلات
في بنغازي
ونشروولك دبش
مايا : عليش هذا كلّه
معاوية : شفتك خشيتي خاطري كنك
مايا : واحد عنده كل حاجة في هالدنيا
شن ناقصك انت
معاوية قرّب منها
وقعد يبحت في اعيووونها
معاوية : نبيك توثقي فيّا بس
مايا قعدت اتعض في يدّها
معاوية : فيش اديري ياهبلة
مايا : بالك نحلم مش معقولة هذي حقيقة
معاوية : ربي يحفضك ,, الدار هذكي شوورك انتي
مايا : كيف شوري
معاوية : حتقعدي ترقدي فيها شن رايك
مايا : بما اني ماعندي حد في بنغازي
ويعتبر عرض مغري
بس خليني انفكر خير
معاوية يضحك ومبتسم علي طيبة وعفوية مايا
,,,,,
يتغدوو مازن وحنين وخواته وامّه

ام مازن : توقعوو اليووم من داره الغداء
مازن : من
نرمين : هههههههههههه
حنين : من
ام مازن : فاطمة
مازن : طيب فيك الل تعلمتي حاجة علي حالك
حنين : ماشاء الله طلعتي فتلاكة بكل
سلّم ايدايتك
فاطمة : مجاملات صح ياحنين
حنين : لالا صح
فاطمة : هازي عليّا يامازن باهي باه
نرمين : باهي اللي انخطبت عشان تعلمت
فاطمة : ريتوو من اللي تحكي خليها ساكته خير
نرمين طلّعت السانها واتنابش فيها
وكانت حنين تضحك ومبتسمة
وكان مازن يحبت فيها وهي تضحك وفرحانة
لكن كان نفس المكسور
ام مازن حسّت بمازن يحبت في حنين
نظرات الاسى والحزن
لمّا مازن بحّت في امّها
دارت روحها ما اتراقبش فيه
نرمين : اليوم نبيك اطلعني انا وفاطمة
لشارع 20
مازن : اليوم مش حيصير شي
عندي موضوع ضروري العشية
نرمين: عليش انت ديما قعدت مش فاضي
مازن : باهي خليها عالمغرب شن رايك
نمشوو عالسريع
نرمين : حتى هذا راي
,,,,,

مروان حس فيه حاجة غلط
امّة لما حطت الغذاء
كانت زعلانة وكأن في فالطة صايرة
وكأنهم خبرووها بمووت حد
مروان : كنك شن في يا امي
وفاء : لا مريضة بس
مروان : وين نجاح تغدت
وفاء : اها تغدت قاعدة في دارها
,,,,
سهام : كنك سرحان ياروحي
احمد : اليوم مازن دزلي مسج خلاني مشخشب
و قالي مانبش نحكي قدام حنين
سهام : ان شاء الله خير بس
أحمد : ان شاء الله ,, دزيتله مسج
قتله العشية انتقابلووو في السوبر ماركت
سهام : مهناك الا كل خير ,, تغدى بس
أحمد : حاضر
,,,,
معاوية يتغدى ويهدرز مع مايا ويضحكوو مع بعض
سمع نقالة يرن طلع معاذ
فاته مابش يرد عليه
,,,,,
ام فارس : كنك رايح اتفكر واجد الأيام هذينا
فارس : مش عارف يا امي
ام فارس :في حاجة شاغلة بالك
فارس : بجديات مافش شي يا احلى نبع حنان
ام فارس :احساسي ماعمره خاب ضني
الأيام هذينا في حاجة شاغلة تفكيرك
,,,,,
الساعة 5:00 عصرا

كان العقرب وفارس يرجوو في لؤي واحمد
في المخزن امتاع سوبر ماركت
فارس : جاك امبدري مالقكش قاعد قال حنجي بعدين العشية
مازن : تمام بالمرة احمد جاي
فارس : مروان قاعد برة جنب الكاشير
مازن : تمام
,,,,
معاوية : هيا مايا
مايا : نزلت مع معاوية وركبت سيارته
ومشى بيها شور المحلات
مايا مستغربة من السيارة
اول مرة تركب سيارة هايجة وفاخرة
مايا : سيارتك هذي
معاوية : لا امأجرها ههههههه
مايا : مزلت تضحك
........
وفاء حاطّة يدّها علي راسها
واتفكر كيف تطلع من هالفضيحة
مش عارفة شن ادير
اتفكر واتفكر
,,,,,,
أحمد وصل قبل لؤي للسوبر ماركت
وقعدوو يهدرزوو علي ماجا لؤي
احمد : ان شاء الله خير
شن قصتها الرسالة امبدري
العقرب : بعدين حنفهمك ابروحنا
فارس : تي اوكي اوكي لا ابروحنا لاشي
عليك دوس قعدت براني توا انا
دنيا ياسي عليك وقت
العقرب : غير فكنا من السماطة انت الآخر
علي خشّة لؤي
احمد : جا الهكرز
فارس : ريت هالحاجة الكبيرة اللي فرحان بيها
لؤي :هههههههههه غير انت كنها راقيلك مني
قول خير وسلّم قبل وابدا شفّط
العقرب : انست يا لؤي
لؤي : امنورين ,,
العقرب : ها بشرّنا
لؤي : اخترقت جميع احسابات عالسوشل ميدا
مافش أي حاجة ادلّ ان تاجر مخدرات
وهو من النوعية اللي يحذف الرسائل امتاعاته
24 ساعة
شفت المتابعيين شفت الصفحات
كلهن عاديات
شفت اصدقائة للأسف ماطلعتش بحاجة مهمة
او نمسكووها عليه
احمد : كيف صار
العقرب : هذيما شاطرين يا أحمد اكيدة حطين في بالهم
حيجي اليووم اللي حد يخترق حساباتهم
احمد : مدام ماحصلنا علي شي مش حنقدرو انديرو شي
العقرب : ماقتلك قالي معاذ عرفنا انراقبو فيه
ريّح الكارطة وفاتنة بكل حاليّا
يعني عنده اهم حاجة مايبانش هو عالشاشة
مروان : شن الحل باهي
العقرب : حنقعدوو كيف مانحنا وانرتبوو اموورنا وانقوو ارواحنا
وحنمشوو كيف قبل مع بعض
احمد : حتى هذا راي ,, يقعد بيناتنا تيلفونات
مروان : انا حنقعد كل بعد يومين ناخذ في مروان ولؤي ندرّبو مع بعض
العقرب : فهموو مروان علي كل حاجة معناها
لؤي : شن المطلوب منّي توا
العقرب : لا خلاص هدّي الكارطة توا وخليك مع فارس
,,,,,,
مايا : ترا انشوفو المحل هذا
معاوية : هيا
معاوية اول مرة يحس براحة نفسية
وهو بعيد عن السياسة
اول مرة يحس بحاجة حلوة في حياته
وكأن شاف فيها حاجة كان فاقدها
بعد ما فقد أهله
مايا : هيا انزل كنك مزلت في السيارة
نزل امعاها وقعدوو يبرموو في المحلات
,,,,,,
معاذ امكسد مع إسماعيل في الكافية
إسماعيل : شن درتلي من راي
معاذ : مزال اول حاجة اتبان عليا حنكلمك
إسماعيل : اووووبه
معاذ : مرات حنقعد ماسك توا انا مع واحد اخر
إسماعيل : كيف
معاذ : معاوية يبي يسلم كل حاجة ليا والواحد اسمه الباشق قاعد في الحبس
إسماعيل : كيف يسلّمله وهو قاعد في الحبس
معاذ : بيناتنا عشان حنديرو خطة انهربووو من الحبس
إسماعيل : ياعليك كلّا انتم تلعبو عالثقيل
معاذ : اقل شي هكي حنجيبك امعايا رسمي يارفيقي
إسماعيل : اصلي يانصي
,,,,,,
لؤي وفارس ومروان قاعدين في السوبر ماركت
وكان مازن احمد في المخزن
ومازن لما إطلعوو جماعته حكاله كل حاجة
صارت امعاه في اكثر من عيادة
احمد : مش عارف حاجة غريبة
معقوولة اختي مريضة مرض نفسي وراثي
باتي ماعندش وامي ماعندهش
وعلي حسب علمي مافش حد من الأجداد عنده
مازن : زيد استفسر من هلك بس
احمد كان عنده علم انّ حنين امّها وحدة اخرة
احمد : حنقولك شي لكن توعدني ماتطلعش منّك حتى الحنين
مازن باستغراب : ماتطلعش مني حتى الحنين
احمد : اها
مازن : قول
,,,,,
مروان ولؤي يشفطوو " يلقحو " قدام سوبر ماركت
وفارس ساكت
لؤي : صار لقبك قوبعة
فارس : خطاني راه انجي انقوبعلك راسك
لؤي : ههههههههه كنك متمزط
فارس : قصدي انت مقتنع ابروحك انك فكاهي
را دمّك ثقيل
عدي انتحر علي حالك
راك مافيكش جو بكل
لؤي تغرين ملامح وجه
لؤي : اووكي انبصر انا
جو تمام اسمحلي
نستاذنكم
وطلع لؤي من سوبر ماركت
مروان : كنك يافارس حكيت مع لؤي هكي
فارس : غمتلي وراقيلي بكل
مروان : كنك شن فيه
فارس : انت مانكش براني
لكن حسيت روحي استعجلت في الخطوبة
مروان : كيف صار مش علي أساس اتحبها وامكبد
فارس : كنت انحبها وانمووت فيها
لكن انحس في روحي معش قعدت نفس قبل
اتهمني اوكي مزلت انحبها
لكن قعدت مش نفس قبل انرايف عليها واجد
مروان : لالا هذا لازم منّا المشاعر يمووتن
لما تقعد فترة الخطوبة طوويلة
مشّي الجو عادي
فارس : لا حنمشي الجو عادي وردبالك
تحكي العقرب
لكن انحس في روحي مش طايقها نفس قبل
مروان : كيف مش طايقها واتحبها
فارس : انا مش عارف شن صايرلي
مروان : غير وحّد الله بس
فارس : لا اله الا الله
مروان : محمد رسول الله ,,
متخممش في الشي
فارس : ان شاء الله خير وخلاص
....
مازن صبّى من مكانه ومصدوووم
مازن : تي وين هالكلام هذا توا اتقولي فيه
مفرووض من الأول حكيتوولي هكي
احمد : قلت مش لازم تعرف انت
لكن ماشور شي نقعد داسها عليك
مازن : يعني أمها كانت ملموسة ولا مريضة
ولاشن ووين أمها والله كلام كبير هذا
احمد : هذا اللي صار
لما صارن مشاكل بين ام حنين وامي ,,
باتي لزها من الحووش
وكانت امتعبة الحوش بكل
باتي دار المستحيل عشان يبعدهاعلينا
مازن : انا انقول باتك قالك
وسّع بالك عليها تحملها
استغربت من كلام باتك هذكي اليووم
أحمد : تو الرؤية وضحت عندك
مازن : كلامك دوخني
اذا كان دخت
يابال حنين تعلم بهذا كلّه
توا خليني نمشي نبي انشيل البنات وعدتهن اشيلكن ,,
المغرب قريب يأذن
أحمد : المهم خلّي الكلام بيناتنا بس
مازن : ان شاء الله
مازن طلع من المخزن وكان زعلان
كان وقتها فارس امقعمز عالكرسي برّة وحاط أيديه علي راسه
فارس: وين يالعقرب بدري
مابش يرد عليه
مروان : كنّا حتى هذا
كنكم شن فيه شن صارلكم انتم
أحمد : لا خلووه حيتعدل جوّا ابرووحه
,,,,,
الساعة 7:00 مساءا

كان يبرم مازن بنرمين وفاطمة للمحلات
مازن كان عقلة في وادي اخر
مش امعاهن بكل
,,,,,

بات حنين : غريبة قلت تبي اتشوفني انا وامك ولامار
احمد : طبعا لامار عندها علم بقصة ام حنين
وحكيتلها من زمان لكن وعدتها ماتقولكمش
ام حنين : باهي شن صار كنها حنين
صارلها حاجة
أحمد : مازن عنده علم بكل حاجة
وحكيتله بالتفصيل
بات حنين : تي عليش تحكيله ياراجل
كنك انت وين عقلك
احمد : الراجل شال مراته قالولها مريضة مرض وراثي
نفسي وعندها انفصام
يعني من وين جاها
لعند امتى نقعدوو دسينها عليهم
ام حنين : لاحول ولا قوة لا بالله
لامار : استغفر الله العظيم .. يارب يكون في عونها حنين
احمد : تعقد وتعصب اشوية مازن
عشان كنّا دسينها عليه
لكن عارفة فترة وحيعديها
مازن عقلة كبير ومن النوعية اللي يمشي الجو عادي
المهم حنين لازم نهتموو بيها من اليووم
ام حنين : ان شاء الله
احمد : خلاص انا ماشي توا
واي جديد ع حنين تو انرن عليكم
....
مايا : احلى جو اليووم فرحانة
من المحل المحل
عطلتك علي شغلك
معاوية : لا عادي ما ادوري شي
مايا : بس صح مش حديرلي شي انخاف منك
معاوية : شن انديرلك
مايا : خايفة اديرلي أي حاجة عيب
معاوية : لا كووني مطمّنة
ولو حاسة روحك تقدري تمشي عادي
ابراحتك مش امخليك غصبن عنّك انا
مايا قعدت تقرص في روحها بالقوورة
معاوية : تي شن اديري ياهمي
مايا : بالك نحلم مزلت مش امصدقة
معاوية قعد يضحك امعاها ويتعشو مع بعض في الشقة
,,,,
كانت حنين ترجى في الدار
حنين : زعمك شن داس عليا يامازن
وكّنا وجك تغير اليووم
زعمك عندي مرض معين ولا شن
عليش مايبش يصارحني
انحس في نص الكلام غايب
سمعت صوت نرمين وفاطمة
عرفت انّ مازن روّح
صقّمت روحها في الدار
ترجى فيه يخش للدار
قعدت ترجى وترجى وترجى
,,,,,
مروان يبّي يتعشى مع امه
مروان : تي كنكم اليوووم شن فيه
انتي عالغداء ومروان والعقرب
كنكم ضاربيين النكد
وفاء : ياحبيبي مريضة انا بس
مروان : باهي كنها نجاح ماتبش تطلع من الدار
وفاء : خليها تعبانة اشوية
مروان : غريبة بكل اللي انقابلة متنكد
, حطيلي العشاء وخليني نمشي انكسد عالنت
,,,,,,
معاوية : باهي باتك عليش طلّق امّك
مشكلة ولا شن
مايا : انا ماما كانت مريضة عندها مريضة
عندها مرض نفسي وهذي ثاني مرة تطلق
معاوية : ثاني مرة كيف ؟؟؟؟
مايا : ماما حكتلي انّها كانت مزوجة من قبل
وراجلها ازوج عليها وكان عندها بنت منّا
بعدها صارن مشاكل بين وبين مراته
طلّقها وخذا البنت
وماما قالت انا مبيتش ناخذها البنت
لاني عارفة روحي حنضلمها
معاوية : كيف حتضلمها .؟؟
مايا : ماما كانت تخدم كوافيرة وكانت في
بيئة ماتسمحش انهّا اتربي فيها بنتها
بعدها ازوجها راجل آخر
اللي هو باتي آنا
صارن مشاكل واجد دارها مجنووونة
وهبلة طلبت الطلاق منّا
طلّقها وسافر للجنوب
وقعدت اتربي فيا واتكبر فيا
وكانت نادمة علي كل حاجة درتها زمان
معاوية : عارفة اختك الاخرة كيف شكلها ولا وين تسكن
مايا : لا مش عارفة ,, لكن عندي صورة ماما
هاكها شووفها اسماها نوال ماما ماتت عشان
ماحصلتش الدواء امتاعها
معاوية :ربي يتقبلها برحمتها
شن رايك انديرلك بحث علي اختك مرات نلقاها
مايا : انا فقدت الامل الحق لاني مانعرفش علي هلها ولا حاجة
معاوية : انا معارفي واجد
باهي ماعندكش كتيب عائلة لا شي
ولا رقم وطني
ولا بطاقة شخصية
مايا : لا ماعندش الا صورة ماما بس
معاوية : تمام ,, باهي وين كنتي ترقدي واتباتي
كيف عايشة حياتك
مايا : كل مرة ساكنة في مكان
مرة في مدارس النازحيين
مرة نمشي للمؤسسات مجتمع مدني
ماعندش مكان ثابت
,,,,,,
حنين : استغربت مازن مزال ماخشش للدار
انفتح الباب فرحت
طلعت نرمين
حنين : نعم
نرمين : تعالي هيا نتعشوو
حنين استغربت وقالت في باله
" غريبة متعودة مازن يخش للدار قبل وبعدها يتعشى "
طلعت من الدار لقت تووورتا " باااااااااسطي "
حنين استغربت
حنين : شن فيه
مازن وامه وخواته
" هابي بيرث دي تويو "

قبل ساعتين

ومازن وهو سرحان ومضايق اشوية
نرمين : هيا اطلع من امبدري ركبنا للسيارة
وين سااااااااااارح يامااااااازن
فاطمة : اتحسي كأن طالع بلا نيّا امعانا
مازن طلّع نقالة يبي يشووف الساعة كم
شاف التاريخ
26/3/2018
قصدكم اليوم 26 في شهر 3
نرمين : اها كنك عليش
مازن : اليوم عيد ميلاد حنين
قبل انسيته
فاطمة : اها صح تقريبا قالت في شهر 3 عيد ميلادها صح
مازن : خلووني نمشي الحلواني قبل
مدام مزال بدري
نرمين شوفي امعايا لو القيتي محل هدايا مفتوح
نوقفوو عليه
نرمين : حاضر

,,,,,

في الوقت الحاضر

هابي بيرث دي تويو
هابي بيرث دي تويو
مازن وامّه وخواتها يغنوولها
مزالت حنين مش مستوعبه
نرمين : كل سنة وانتي طيبة
فاطمة : كل سنة وانتي
مازن : كنك مستغربة
اليوم عيد ميلاد احلى انثى في حياتي
حنين مشت تجري وحضنت مازن
نرمين ولّعت أغاني وقعدوو يغنوو ويرقصوو
وكان مازن ماسك ايدين حنين ويرقص امعاها ومبتسم وفرحان
لكن ام مازن مانزلتش عينها من علي مازن
وحسّت انّ البسمة وراها الم وحزن
,,,,,

بعد منتصف الليل

اتهدرز نرمين مع فارس واتس
نرمين : اليوم مادورتنش بس انت
لا رنيت لا سالت لاشي
فارس : لاغير مافضيتش بس
نرمين : شن الحاجة اللي تشغلك عليا
فارس : مش فاضي وخلاص
لو كنت فاضي راهُ رنيت
نرمين : من قبل ديما اترن عليا
توا خلاص
فارس : قتلك مشغول بس كنت
نرمين : تمام

,,,,,,
فاطمة : باهي اللي تحشمت علي وجك ورنيّت
لؤي : احلى تامي شن جوك ياغلايا
فاطمة : قاعدة معش فيه جامعة كساد
لؤي : شن جو اهلك
فاطمة : قاعدين لا جديد
لؤي : ربي يحفضك يا احلى تامي
فاطمة : نجك ليا اعيووني
لؤي : شن جو صاحبك فارس قالوو قعدوو أصحاب
لؤي : فكيني منّا نفسية مرة راقيله مرة يضحك
ابجّوة البصارة
خلينا نحكو علي حاجة اخرة خير
,,,,,
معاوية طلع من الدار يبي يشرب ميّة
سمع صوت التلفزيون عالي
طلع شاف مايا راقدة عالكنبة
معاوية : قتلها ارقدي في الدار
علي تسكير راس
خش للدار جابلها بطانية وغطاها
وطفّا التلفزيووون
شرب مية وخش للدار امتاع
يبي يشووف نقالة الساعة كم
شاف رسائل واجد من معاذ
" وينك يالزعيم "
" انرن عليك ما اتردش "
" كيف صار في موضوع الباشق "
معاوية ابستم وطفّى نقالة
وكمّل نوووومه
,,,,

كانت حنين راقدة في حضن مازن
مازن كان مزال واعي
قعد يهدرز امعاها لين رقدت
مازن وهو يمسح
يحكي مع روحها
مازن : مهما يصير ياحنين
مستحيل نستغنى عنّك
انتي اول حب في حياتي
واخر حب في حياتي
حندير المستحيل عشان انحاول كيف اتعالجي
اكيدة لكل داء دواء
.....
ثاني يوم الصباح

كان أحمد في المكتب امتاعه
يشرب في القهووة
شاف ورقة جايا من وزارة الداخلية
" يجب عدم التعامل مع الكتيبة 505 لانها لم تنظم مع الكتائب تحت
القيادة العامة للجيش الليبي "
أحمد شاف الخبر استغرب
أحمد ابتسم : كتيبة صوّرني شكرا ,,
" كتيبة 505 مليشية مسلحة لاتتبع أي جهة رسمية يخدمووو من راسهم كل حاجة من راسهم ماسكها الرائد فوزي
ديما يحب يأخذ دور البطوولة
أي مشكلة اتصير في بنغازي
تلقى هو اللي فازع علي أساس
يحب يأخذ الشوو والدعايات وعلي أساس المنقذ
وتلقى 24 ساعة عالتفلزيوون
لما اتشووفه اتحسّه هو المنقذ الوحيد في ليبيا "
,,,,,
مازن امشّيها من عيادة العيادة ابروحه
ويستفسر ويعرف شن العلاج المعين
وشن النظام اللي حيمشي مع حنين
,,,
فراس قاعد في السوبر ماركت كالعادة
هوو يخدم صبح ومروان يخدم عشية
نظام توكات
,,,,,,
معاوية قاعد في مقر الحزب
سمع نقاله رن
معاذ : صباح الخير الزعيم باهي اللي رديت علينا
معاوية : اهلين .. كنت مشغول اليومين اللي فاتن
معاذ : شن صار
معاوية : اليوم العشية حنتقابلوو عند حديقة تبيستي
وحنقوولك شن انديروو
الخطة واتية ومدرووسة
خلاص الباشق حيطلع وحتستلم انت ويّاه شغلي
وانا حنقعد شاغل روحي بالحزب اللي قاعد فيه
معاذ : تم يالزعيم
معاوية : وروني شطارتكم انت والباشق
معاذ : حنكوونوو في الموعد
معاوية : حنشوفو من اللي حيكون في الموعد
شاف مكالمة خشتّ علي انتضار من الجماعة
اللي حاطهم عند الشقة امتاعه
معاوية : سكّر سكّر ضروي معاذ
واحد من جماعة معاوية : مايا تبي تهرب من الشقّة نلحقووها ولا انخلوها علي راحتها


كلمات البحث

العاب ، برامج ، سيارات ، هاكات ، استايلات





v,hdm #lahuv_l'v'am hgl,sl hgjhkn hgpgrm 30 hgl,sl hgjhkn hgpgrm




 توقيع : همسه غلا

تستطيع أن ترى الصورة بحجمها الطبيعي بعد الضغط عليها

رد مع اقتباس

أخر 5 مشاركات همسه غلا
المواضيع المنتدى المشارك الاخير الردود المشاهدة آخر مشاركة
وصفة شوربة تورتيلا الدجاج بالفلفل الحار السهل ๑۩۞۩๑ فنون الطبخ ๑۩۞۩๑ 1 3024 04-12-2022 04:32 PM
أفضل مقبلات 30 وصفه حصريه ๑۩۞۩๑ فنون الطبخ ๑۩۞۩๑ 0 1745 08-24-2021 04:19 AM
طريقة عمل الكيك الأسمر ๑۩۞۩๑ فنون الطبخ ๑۩۞۩๑ 0 1144 02-07-2019 10:34 PM
الدجاج بدبس الرمان ๑۩۞۩๑ فنون الطبخ ๑۩۞۩๑ 0 1027 02-07-2019 10:32 PM
عمل البرجر في المنزل من اللف للياء ๑۩۞۩๑ فنون الطبخ ๑۩۞۩๑ 0 1065 02-07-2019 10:29 PM

قديم 04-15-2018, 10:42 PM   #2


الصورة الرمزية مزاجـيه
مزاجـيه غير متواجد حالياً

بيانات اضافيه [ + ]
 رقم العضوية : 43
 تاريخ التسجيل :  Dec 2008
 أخر زيارة : 09-30-2023 (09:04 AM)
 المشاركات : 3,325 [ + ]
 التقييم :  25
لوني المفضل : Cadetblue
افتراضي رد: رواية #مشاعر_مطرطشة الموسم التانى الحلقة 30



موضوع مميز
دائما فى القمة
واصلوووووا


 
 توقيع : مزاجـيه



رد مع اقتباس
إضافة رد

مواقع النشر (المفضلة)

الكلمات الدلالية (Tags)
#مشاعر_مطرطشة, الموسم, التانى, الحلقة, رواية


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
رواية #مشاعر_مطرطشة الموسم التانى الحلقة 25 همسه غلا ๑۩۞۩๑ القصص والروايات ๑۩۞۩๑ 1 04-15-2018 11:40 PM
رواية #مشاعر_مطرطشة الموسم التانى الحلقة 26 همسه غلا ๑۩۞۩๑ القصص والروايات ๑۩۞۩๑ 1 04-15-2018 11:32 PM
رواية #مشاعر_مطرطشة الموسم التانى الحلقة 27 همسه غلا ๑۩۞۩๑ القصص والروايات ๑۩۞۩๑ 1 04-15-2018 11:32 PM
رواية #مشاعر_مطرطشة الموسم التانى الحلقة 28 همسه غلا ๑۩۞۩๑ القصص والروايات ๑۩۞۩๑ 1 04-15-2018 11:31 PM
رواية #مشاعر_مطرطشة الموسم التانى الحلقة 29 همسه غلا ๑۩۞۩๑ القصص والروايات ๑۩۞۩๑ 2 04-15-2018 10:43 PM


All times are GMT +3. The time now is 11:20 PM.


Powered by vBulletin® Version 3.8.9
Copyright ©2000 - 2024, vBulletin Solutions, Inc.
adv helm by : llssll
new notificatio by 9adq_ala7sas
دعم وتطوير نواف ا
This Forum used Arshfny Mod by islam servant