مشاكل التربية الايجابية

مشاكل , الايجابية , التربية

مشاكل التربية الايجابية

من أكتر التعليقات اللي بنسمعها في دورات التربية أو بسمعها من الأمهات اللي أعرفهم ، إن التربية الصالحة حلوة أوي وإحنا فعلا مقتنعين بيها وإن هي الأصلح لأولادنا ولعلاقتنا بيهم .. بس .... إحنا مش قادرين .. نجيب منين طولة البال والصبر والتحمل لكل التحديات اللي بتقابنا .. إحنا علينا ضغوط كتير ... ومش دايما بيكون عندنا سند أو مساعدة ... طب نعمل إيه ؟؟؟
وكتير بسكت وبفكر .. فعلا صح التربية محتاجة صبر و طوووووووولة بال وتحكم في الذات عالي جدا .. بس هل الحل نستسلم ونقول مفيش فايدة !! ظني إنه لأ .. وإن أكيد كل حاجة وليها حل
طيب يبقي نفكر في شوية أدوات ممكن تساعدنا علي تنظيم وقتنا ومجهودنا عشان نقلل من فرصة الوصول لدرجة الغليان اللي غالبا بتكون نتيجتها وخيمة مع الناس اللي بنحبهم وخصوصا أولادنا ..
* الإعتراف بمشاعرك .. أمهات كتير قالوا غن الأمومة مرهقة وموترة للأعصاب .. فانتي لست وحدك حبيبتي .. فبلاش تلومي نفسك وتقللي من شأنك.
* أطلبي المساعدة لما تحسي إنك خلاص مش قادرة .. مش عيب ولا غلط إنك تقولي "تعبت ، ممكن حد يساعدني" .. المساعدة ممكن تيجي من زوج ، أهل ، إخوات ، أقارب أو أصحاب مقربين. أحيانا الدعم المعنوي وحده بيساعد وبيقلل من الإحساس بالمشكلة.
* إعملي لنفسك حاجة بتحبيها .. يعني "خدي بريك" .. من حقك علي فكرة إنك تخرجي خروجة حلوة "لوحدك" وتعملي حاجة إنتي بتحبيها أو تجيبي لنفسك حاجة كان نفسك فيها .. مفيش نظام انتي شمعة ده .. الشمعة لو خلصت ، اللي حواليكي مش هيشوفوا حاجة
* ظبطي جدولك وركزي علي الأولويات .. مش لازم تبقي بتعملي كل حاجة .. يعني مثلا خللي أولادك يختاروا نشاط واحد بس بيفضلوه .. كتر الأنشطة معناه سواقة كتير وتعب أكتر .. برده لو بتشتغلي حاولي تاخدي يوم راحة كل فترة "لنفسك" أو لو تقدري تظبطي شغلك إنه ميكونش كل يوم أو يعني يبقي فيه بعض من المرونة .. يبقي إنتي الكسبانة.
* ثقي في نفسك "كأم" .. صحيح كلام الكورسات الكتب مهم جدا بس برده كل بيت له ظروفه وله حياته .. خدي اللي يناسبك وإعملي اللي تقدري عليه .. "مالا يدرك كله ، لا يترك كله"
* اهتمي بأكلك ، نومك وصحتك
* لو تقدري تحضري group therapy أو الدعم الجماعي للأمهات .. هتفرق معاكي نفسيا عشان هتكتشفي إنك مش لوحدك .. كلنا في مركب واحدة.
* استمتعي بوقتك معاهم .. خلوا في شوية وقت للمرح والترويح عن النفس .. خروجة حلوة ، فيلم بيضحك مع فيشار أو أي حاجة تختاروها سوا وتقربكم من بعض.
وطبعا في الآخر نحاول نفتكر .. بلاش ننفس غضبنا وتوترنا في ولادنا .. لأن ده هيجيب تعب وتوتر زيادة ...

الموضوع الأصلي: مشاكل التربية الايجابية || الكاتب: BAYALA || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات