لحياة سعيدة مع شريك الحياة

لحياة , الحياة , سعيدة , شريك

لحياة سعيدة مع شريك الحياة

12 نصيحة من هويدا الدمرداش.. لحياة سعيدة مع شريك الحياة!
ركزوا معايا..
هاقول لكم تعملوا إيه عشان علاقتكم بشريك الحياة تكون علاقة استمتاع بين اتنين بيحبوا بعض وبيشاركوا بعض في كل حاجه عن طيب خاطر وبإحساس عظيم بالإستمتاع بالمسئولية الجميلة عن الآخر..
من الآخر كده لو ماطبقتوش النصايح اللي هاكتبها لكم..
حياتكم هتبقى جافه ووحشه وقريب قوي واحد فيكم هيصر على الطلاق..!
لأن جوازكم بقى عبء عليه ومش بيملى احتياجاته اللي ربنا خلقها جواه..
ووصل لمرحلة إن احتياجاته بقت تلح عليه ومش قادر يعيش من غير ما يشبعها..
الموضوع بسيط وهيفرق معاكم جدااااااااا..
أنت لما تعمل كده مش هتكون "سيس وسهتان وملزق" زي ما أنت فاهم..
أنت كده هتكون إنسان كريم الخلق معطاء وعند الله عظيم..
وتستحق أنك تكون من أقرب الناس منزلة من الرسول عليه الصلاة وأفضل السلام..
يالا بقى احفظوا معايا نقطة نقطة:
1- عامل شريكك كويس واوعى تتجرأ في يوم وتهينه بأي شكل من أول النظرة الغاضبة إلى الشتمية والصوت العالي والضرب.
2- حسسه أنه في عينيك أجمل إنسان.. بالكلمة الحلوة ونظرات الإعجاب.
3- اشتري له هدايا هو بيحبها مش أنت اللي بتحبها وأهتم بمناسباته وما تخليهوش يضطر يفكرك بيها.
4- لو عمل حاجة كويسه اشكرة وإثني عليه مهما كانت بسيطه (زي أنه ييجي بدري أو يعمل أكله حلوة أو يجيب لك شيكولاته).. بلاش تربسه ما تقولش الجمله الشريره بتاعة "ده أصلا واجب عليك"..!
5- اهتم بالحوار معاه.. الحوار هو اللي بيوجد الإحساس بالإنسجام والونس بينكم.. بص له في عينيه وهو بيتكلم واسمع وما تقاطعش وتقوله "أنت غلط".. لو ماعجبكش كلامه اسمعه برضه وقول له "كلامك فيه وجهة نظر.. وفيه وجهة نظر تانية أنت في كلامك خليتني أخدت بالي منها".
6- كلمه عن أحلامك وقراراتك ليك وله ولأولادكم.. وحذار ثم حذار تقرر لوحدك أي قرار وتتوقع منه ينفذه حتى لو عارف أنه موافق على القرار ده.. لازم تشاركه في القرار وتغير في القرار بما يناسبه ويناسبك.
بلاش الجمل السيئه بتاعة "هو أنا كل حاجة هاخد رأيك فيها؟".. افتكر أنت مش بتجر وراك معزة.. أنت معاك إنسان له طموحاته وأحلامه ورغباته وقرر يسيب الناس كلها ويشاركك حياته أنت بس.. خد رأيه.. خد رأيه.. خد رأيه!
7- شاركه فعليا في مسئولياته وماتقولش "دي مسئوليتك أنت".. وبلاش الكلام الحامض الوحش اللي بيزعل بتاع "أنا مالي.. دي مسئوليتك لوحدك، كل واحد يشيل شيلته"..!
8- احترم شريكك واوعى تفكر في يوم لما تزعل منه أنك تعاقبه.. العقاب بينكم بيولد حالة حرب لا تنتهي.. ده شريكك مش أجير عندك.
9- وأهم حاجة بقى لو فيه موقف محتاج دعم لازم يلاقيك جنبه.. اوعي يحصل حالة وفاة تقول أنا فضلت جنبه وحضرت العزاء.. أنت مش ضيف بتعد عليه الجمايل.. أنت شريكه ولازم قلبك ينبض جنب قلبة ويحس إنك حاسس بكل لحظة ألم بيمر بيها.. طبطب واسمع كتير وامسح دموعه.. ولو أي موقف قاسي عدى عليه لازم تراعي مشاعرة.. ولو خاصمته وزعل منك ماتعملش أنه مش همك وتمشي في البيت تغني وكأنك سعيد ومش فارق معاك زعله..!
10- اهتم بنفسك ونضافتك الشخصية.. بلاش وجودك في حد ذاته يبقى مؤلم له ومش قادر يمارس معاك كل ما سبق.. واهتم ببيتك وما تكونش مصدر فوضى وقذارة في البيت.. مش من حقك تحبس حد في مكان أشبه بالزريبة وتطالبه يتحمل ويعيش معاك سعيد بدون شكوى.. والنضافة مسئولية الطرفين على فكرة!
11- افتكر كمان أنك ماتبتديش يوم معاه إلا وأنت بتحضنه بحب وبتقوله هتوحشني وأنا في الشغل.. إنشغالك ومسئولياتك مش عذر لك يديك الحق تعيش حياتك معاه مكشر ومستاء ونكدي ومكتئب.
المسئوليات على فكرة مش بتخلص ومش هتخلص إلا لما تدخل الجنة إن شاء الله فما تنتظرش أن المشاكل تخلص عشان تبتدي تعبر لشريكك عن الحب.
12- وأخيراً لازم تبقى فاهم أن مع كل ده لازم تمنح شريكك الإخلاص الكامل.. لو الثقة في يوم انهارت كل اللي تعبت فيه من رقم 1 لـرقم 11 مش هيعمل لك أي حاجة وحياتك هتنهار لو قدمت حياة مفيهاش إخلاص كااااامل لشريك حياتك. وافتكر دايماً أن الله مُطّلع.
أنا كدة اخلصت ليك النصح.. إما تختار تكون من أهل الحب والمودة والرحمة في الدنيا
وبالتالي من أهل الجنة في الآخرة برحمتك وعطفك لشريك حياتك وأسرتك..
يا إما تختار تعيش العيشة القاسية اللي كل الناس عايشينها وفاكرينها العيشه الـ default وتروح بقى تتحاسب عند ربنا أنك اخليت بأمانتك وقسيت على أهم إنسان هتسأل عنه أمام الله
وإنك مسيبتش لأولادك قدوة حسنة تتعلم منك وتتوارث كيفية صناعة الحب وتقديم المودة والرحمة في بيوتهم في المستقبل.
دمتم شركاء رحماء سعداء بحسن صحبة كل شريك فيكم لشريكه... قولوا آمين!

الموضوع الأصلي: لحياة سعيدة مع شريك الحياة || الكاتب: BAYALA || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات