العمـر فرصـه و الحيــاه ايــــام والدنيــا ظــروف

العمـر فرصـه و الحيــاه ايــــام والدنيــا ظــروف == والمشتبه فالامر مـا بين الحــــرام مـن الحــــلال


والشعـر ديـوان العـرب وانـا بشعــري فيلســوف == أتـرك أدقـاق الشعـر وأنقـى من معـانيـه الجـزال

والبارحه صدرالجنوب يضيق وتسوق الحسوف == وين أنت يا صـدرالشمـال أحتجـت للفزعـه تعــال

وردت مجاهـيم اللياـل أحيـام ورياحــي شعــوف == من يـوم وقفني بـدرب العشــق يسألنـي ســــؤال

وأقولـه بيني وبينـه يـا عسـا الحـــب مخلــــوف == ان ما رجع ربحــــه علـــي الله يــرده راس مــال*

كم لي وأنا تكوينـي الدنيــا علـى روس الكتــوف == وأشيــل ما لا أطيق من شانك وأحملـــه الجبـال

ومديت لك ريحانة الاشـواق في بيـض الكفــوف == قبـل يجــف العطـــر و الاوراق تدفنـهــا الرمـــال

وقفتنـي بالشــارع الضيّــق وممنــوع الوقــوف == مســار واحـد والمصيبــه لا يميـــن ولا شمــــال

تقــول طـوّفـها معــي واقــول عيــت لا تطـــوف == اجيبهــا منــا تجــي منـــا و لا فيهـــــا مـجـــــــال

الحب ما ينفـع معـه فـزعــه ولا واو معطـــوف == الحب لــو زالـت جبـــال الارض ذكـره لا يـــزال

يرقا على رجم الغرام ويخدمه نبض الحــروف == اشوي من نسج الغلا واشوي من نسـج الخيـال

وش عاد لو غنيت طاروقك وصفيت الصفــوف == صفٍ يبا ياقف معي وصـفٍ اليا من رحت شــال

والله لتبطي ما وصلت ادنى مواصيــل الهنــوف == الجـادل اللـي دمعهـا لارحــت والا جيــت ســـال

الجـادل اللي طيفـهـا عنــدي ولا كــل الطيــوف == ام الحلا ام الغلا ام الدلع ام الدلال *

اللـي هـدايـاهــا ملـت كــل الزوايــا والـرفــوف == يطلـــع ابطلتـهـــا بــدر ويغيـب لا غابـت هــــلال*

و انـا اقـــدرهـا مثـل تقــديــر حـاتـم للضيـــوف == وأطرب على فيّة غــلاها كـل مـا مــال الظــــلال*

واعيشها عيشة عمر مابين أمن وبيـن خـوف == وازرع لها شعري وهي تسقيه من غيث الوصال

حتى خـذتني عشق وانا خـذتـهـا رغـم الانــوف == واسكنتها روحٍ عن أهروج البشر منفى اعتقـال*

والا أنت قربك ما يشجعني وفرقـاك امعـروف == أقلـط على نـزف الشعــر والفــال يقفـــاه العقــال*

حتى لو أنت ألـذ مـن تمـر المـدينـه والهفــوف == أرحل ترى أيامك خضر لكن ترى أسنينك اهزال

وفر أدموعك دام دمعك مر والـدرب امحفـوف == جعلك فـدا من هلـت ادموعـه علشـــان ابتهــال