الجزء الخامس
بعد نص ساعة نزل خالد وفهد عند المدرسة أما أبو أيمن راح يوصل عياله ..
عند باب المدرسة كان حمود أو ( حنتوش , ينادونه كذا ) المهم كان واقف عند باب المدرسة يدخن ولا همه أحد ولما شاف فهد وخالد جايين نادهم بصووت عالي
وقال : هلااااااا هلااااا يالله حيهم .
تأفف خالد وهمس بإذن فهد : داخلين خيمه حنا !! اففف يا شين ذا الوجه ع الصبح , بذمتك يافهد تمشي مع هذا ؟؟!!
فهد معصب ورد على خالد : ألف مرة قلت لك مالك شغل انت ماتفهم ؟؟
وصل لهم حنتوش مبسوط والضحكة يسمعها اللي بآخر المدرسة طبعا مدري على ايش يضحك بس هو دايم كذا .
حنتوش : هلا والله بالشباب .
فهد : هلا بك .
حنتوش : ها خويلد ذاكرت يا بوي؟
خالد بعصبية : ماهو بشغلك ولو سمحت اسمي خالد ماله داعي خفة دمك على الصبح .
تركهم خالد ومشى عنهم بيدخل المدرسة حنتوش كان يناظر بفهد وهو مستغرب قال : وش فيه ذا على الصبح ؟؟
فهد : معه حق أجل هو أصغر عيالك تنادية خويلد ؟؟
حنتوش : أمانة لا تقول هالكلمة تزعل ؟؟
فهد : المهم انت لاتكلمه ولا لك شغل فيه اوكي ؟
حنتوش : بكيفكم , المهم انت وش سويت أكيد ما نمت .
فهد : ايه والله هالحبة اللي اعطيتني اياها ماخلتني انام للحين .
حنتوش ضحك بقوة : ههههههاي قايلك دواك عندي . و بعدين لك سنتين وانت ترسب بثالث ثانوي والله ان عدتها المرة هذي بعد بيصير أخوك ذا معك بالصف .
فهد : وساعتها وش يفكني من كلام ابوي , ابغى انجح وأخلص
ما أبغى وجع راس .
حنتوش : دامك أخذت الحبه و سمعت نصيحتي بتنجح خذها مني .
فهد يتنهد : عسى . المهم حنتوش خلصنا معك زقارة ؟
حنتوش وهو يضحك : أبشر .. دخن وروق راسك .
يلا يا عيال ادخلوا الاختبار بدأ .. كان هذا صوت واحد من المدرسين ينادي على الطلاب اللي واقفين خارج المدرسة .
في الاختبار كان فهد يجاوب على الاسئلة وفجأة فقد تركيزة وبدت تصير غشاوة على عيونة ..
رفع يده : استاذ ..!!
الاستاذ يناظر في فهد حس ان فيه شي .
سأله : انت مريض ؟
فهد ما قدر يرد .
المدرس جاب له مويه وخلاه يشرب ويغسل وجهه
سأله مرة ثانية : أحسن اللحين ؟
فهد هز راسه : ايه أحسن .
رجع فهد يحاول يكمل الحل الى ان انتهى الوقت .
خارج سور المدرسة كان الطلاب متجمعين وبينهم فهد وحمود
وبعد لحظات وصل لهم خالد وصديقه يوسف .
حنتوش سأل فهد : وش صار لك بالاختبار .
خالد : خير وش السالفة ؟؟
فهد : مدري فجأة حسيت راسي يلف وما قدرت اركز .
خالد : غريبة !! ومن ايش صار لك كذا ؟؟
حنتوش قاطعه بسرعة : يعني من ايش اكيد من المذاكرة طول الليل ماتشوف اخوك سهران .
خالد : و انت من سألك ؟؟
فهد : خلاص انت وياه .
خالد : طيب والحين كيف بنرجع للبيت ؟
فهد : شوف لنا تكسي وخلصنا .
حنتوش دق صدره : أفا تكسي و انا موجود .
خالد : فهد خلنا ناخذ تكسي .
حنتوش يكلم فهد : وش في اخوك ذا مايفهم !!
خالد : انا باخذ تكسي وانت بكيفك عارف انك تبغى ترجع معه.
فعلا خالد ويوسف أخذوا تكسي وراحوا وبقى فهد وحمود .
ومن بعيد جات سيارة مسرعة والبوري ماوقف طاااااااااط .اااااااط .
السيارة وقفت عند حمود وفهد , اما اللي يسوق السيارة اسمه غازي وما يدرس معهم بالمدرسة ولكنه صديق حمود
لما وقف طلع غازي راسه وقال : يا عيال احنا بنهجول لحالنا ولا شالسالفة !!؟
حنتوش كالعادة ميت من الضحك : ههههههاي جايينك يالذيب .
غازي : اقول اخلص علينا انت وياه ورانا أحلى هجولة اليوم.
غازي حرك السيارة وراح جهة الساحة اللي مقابلة للمدرسة .
حنتوش التفت على فهد وقال وهو متحمس : يلا مشينا .
فهد : أقولك راسي يدور تقولي تفحيط صاحي انت !!
حنتوش : هههه اجل خلك هناك و تفرج هذا اخر يوم بالاختبارات نبي نفلهاااا .
فهد تردد
..............................