لوغاب عني في غيابه حضرته
يغيب ويرجع لي من الشوق ويغيب
وإن عاد يلقاني بشوقي انتظرته
لامن حضر كل المشاعر معازيب
واليا اعتذر من طيب خاطر عذرته
بعيد عن غيري ومن فكري قريب
يحس بشعوري مثل ماشعرته
صديق خوة عز وراعي مواجيب
حزامي اللى بالشدايد ذخرته
عنيت رجلي للخطر والتجاريب
أقسى دروبه لامشيته عبرته
لي صاحبٍ يملا قصيدي تراحيب
اليا كتبت بحضرته ماهو بعيب
العيب والله لاكتبت ونكرته
محبته عندي من اغلا المكاسيب
والمشكله إنه ماخسرني خسرته
حكم القدر لاشك ماعنه تجنيب
والشاهد الله مانويت وغدرته
واحظي اللى كل ماصابت يخيب
واصمتي اللى لوكتمني نثرته
رغم الألم رغم الجروح المعاطيب
جنيت زرعٍ في حياتي بذرته
اصبحت انا والشعر لجله مناديب
إن غاب عني في غيابه حضرته