منتديات كلك غلا - عرض مشاركة واحدة

10-20-2011, 08:36 PM

عند البنات..
كملوا البنات سوالف..وقامت عليهم عبير وطردتهم برى الغرفه وسكرت الباب..وبعدها راحوا ريم ورغد لغرفتهم اللي جهزتها العنود..ورغد يا عمري عليها اول ما دخلت تاكدت ان الغرفه فاضيه وانها ماهي غرفة احد<<ما تنلام..
وكل وحده راحت لسريرها..ريم نامت على طول لانها من الصباح قايمه للمدرسه بعدين الملكه يعني بالعربي هلكت..
حتى رغد كان فيها النوم بس ما قدرت تنام كانت تفكر بوليد:" وليد يحبني وانا متاكده من هالشي وباين في عيونه انه صادق..بس يا وليد انا ما احبك ولا اتوقع اني في يوم بحبك..وانا ما اشوفك غير اخ لا اكثر..ياربي محتاره ايش اسوي معاه.. اخاف اقوله اني مستحيل احبك واجرحه واذا سكت اخاف يتعلق فيني اكثر...وبصراحه اصعب حب في الحياة الحب من طرف واحد..والله انا حاسه فيك يا وليد.بعد انا مشكلتي اني ارحمه وجه من الله ينرحم..احس اني ما اقدر اقسى عليه او ابعده عني قلبي ما يطاوعني.آآآآه يا وليد حيرتني معاك" ونامت وهي ما بعد اتخذت أي قرار في مصير وليد..
&&&&&&&&&&&&&&&&&&&&
يوم الخميس..

البنات ما صحوا الا على العصر..
تغدوا وبعدها قعدوا عند التلفزيون بالصاله ينتظرون سواق رغد وريم عشان يرحون لبيتهم ويجهزون اغراضهم لان الرحله لدبي راح تكون الفجر..
العنود: ريم حطي هالاغنيه احبها تكفين..
ريم: يالله يا العنود ذوقك بايخ وما ودي احطها..
العنود: اقول الشرهه مو عليك الشرهه على اللي عطاك الريموت..اقول عطيني اياه..
ريم: ما راح اعطيك اياه..بصراحه ذوقك بايخ وما تحطين الا طق وجلسات خليجيه يا ام الزار..
العنود:الله واكبر من زين الذوق عاد انتي وش تحطين ..هالفديو كليبات اللي تجيب المرض..ريم اقول جيبي الريموت بالطيب لا اخذه بالقوه..
ريم: ما راح اعطيك اياه.وش بتسوين..
رغد: تكفون عورني راسي اسكتوا شوي..
عبير: والله مليت..انتوا ما مليتوا كل شوي متهاوشين على شي..
رغد: والمشكله على اشيا تافهه..ريم عطيها الريموت وفكينا..
ريم: لو تموت ما راح اعطيها.
العنود: وانتو ما جا سواقكم عشان تنقلعون<<معصبه ماحد يشره عليها..
رغد: لالا عاد يا العنود وهذا واحنا ضيوفك تطردينا..
العنود: انتي على عيني وعلى راسي..بس اختك شغلي معها..
وقامت العنود وقعدت على رجلين ريم وتحاول تاخد الريموت منها وريم معانده<<راسها يابس..
ريم: عنيد قومي عني يا الدبى كسرتي رجولي..
العنود: عطيني اياه واقوم.يله بسرعه..
شوي الا سمعوا صوت رجال نازل توقعوه ماجد..الا الصدمه وليد كان يطالعهم وعيونه تطلع منها شرار وهذا هو الوحيد اللي ممكن يفكهم بصرخه وحده او نظره منه تكفي..
وليد بعصبيه وبحزم: وانتوا وبعدين معاكم ما تملون..العنود قومي عن ريم..
طبعا بدون نقاش قامت العنود..
وليد يكمل: وانتي يا ريم عطي الريموت"وبصوت كله نعومه" رغد...
الكل انتبه ورغد نزلت راسها.
العنود صارتتطالع وليد ورغد اللي منزلها راسها..
العنود: وش معنى رغد بدون صراخ واحنا بطيرنا من مكانا من لسانك..
وليد يصرف: انتي صيري مثل رغد وبعدين يصير خير.
ونزل الدرج وراح وجلس على كنبه مقابله لرغد.
رغد ميته حيا ما تحب احد يطالعها وعدلت حجابها..وغير هذا كله متوتره لان اللي جنبها موناس عاديين اللي جنبها ريم والعنود وعبير..اكيد ما راح يخلونها من غير تعيلقات او احراجات..
وليد يدور سالفه يسولفها مع رغد: رغد راح ترحون بيتكم الحين..
وقبل ما تجاوب رغد جاوبت ريم عناد: ايه بنروح الحين..
وليد: انتي من كلمك...
ريم: والله انا حره..وبعدين انت سألت وانا جاوبت وخلاص..
وليد في نفسه" هين يا رويم اوريك"
العنود: وليد اخوي حبيت ا ذكرك بشي كانك نسيته.
وليد استغرب: ايش هو..؟
العنود: التلفزيون من هنا"وتاشر عليه" مو من هنا"وتاشر على رغد"
وليد لقاها فرصه وخربها: وفي احد يحصله يطالع القمر ويتركه..
العنود بصدمه: وليدوه..ترى كلامك انشالله راح يوصل لوزارة الداخليه"تقصد امها"
عبير مصدومه ما تقل عن صدمة العنود من جرأة اخوها: وليد انهبلت انت وش فيك.صاير لمخك او عقلك شي..خير انشاالله وينى فيه..
وليد ببرأه:ليش!! انا وش مسوي..
العنود: وكل هالكلام اللي قلته ولا سويت شي.
وليد وبكل براه: عادي..هذا الصدق تبيني اكذب..
عبير: لالا ..لاتكذب الكذب حرام ..بس انشالله راح تتعلم الصدق على اصوله لما يدري وزير الماليه"تقصد ابوها"
وليد خاف: وزير الماليه...اجل اقوم احسن لي قبل لا تدري وزراة الدفاع والطيران..
العنود: يكون احسن وكل ما اسرعت اكثر..كل ماكان احسن وما ينتشر الخبر اكثر..
ريم كانت ساكته لانها حاقده على وليد لانه مو اول مره يصرخ عليها.
اما رغد يا عمري على حالها ما تدري وش تسوي تقوم ولا تجلس وخصوصا كل ما شافت وليد تذكرت موقف امس الي ما قد صار لها مثله ولا تتوقع راح يصير لها موقف محرج مثله..
طلع وليد وبعده بخمس دقايق وصل سواقهم وراحوا معاه لبيتهم..
بعد ما طلعوا ريم ورغد..
عبير: اقول عنيد تتوقعين وليدوه يحب رغد..
العنود: يالله انتي مغبره..من زمان ميت فيها ..
عبير/ وانتي تعرفين؟؟
العنود: منذ مبطي ..بس انتي الله يخلف عليك ما تدرين وين ربي حاطك فيه..
عبير: بس وليدوه طالع جرئ بزياده..
العنود: عاد الصراحه ما ينلام رغد تهبل تاخذ العقل..
عبير: في هذي صادقه بس عاد يمون بزياده..
العنود: لا تخافين بوقفه عند حده.
عبير: اقول روحي زين تو بغى يطيرك بس بصوته..مره ثانيه لا تستقوين على الفاضي..
العنود: لا من شوي كنت انا الغلطانه..اما الحين هو الغلطان وامسكها عليه لحد ما يقول التوبه عمتي العنود..
عبير: يا جعلك ما تمسكين علي شي..
العنود: اصلا انا ادور الزله عليك..
عبير: بالحلم يا بابا بالحلم..
&&&&&&&&&&&&&&&&
في بيت ابو مشاري..

كان الوقت بين المغرب والعشا ..تذكرت اغنية بين العصر والمغرب مرت لمك خياله<<مغبره صح..
ام مشاري: هاه..انشا الله جهزتوا اغراضكم كلها..حق عشر ايام..
ريم بثقه: لالا انا جهزت حق 15 يوم لاننا راح نقعد هناك 15 يوم..
ام مشاري: من قاله؟؟
ريم وبكل ثقه: انا اقوله..
ام مشاري: مالت عليك..
ريم: يمه صدق راح نقعد هناك 15 يوم انا راح اكلم ابوي..
ام مشاري: وش حقه 15..عشره تكفي..
ريم: يمه هذي دبي دبي ..تعرفين يعني شنو دبي..
ام مشاري: واذا..؟
ريم: يعني كل يوم مجمع..كل يوم طلعه..كل يوم مكان ما راح نمل ابد..
ام مشاري: ابسأل ابوك اول..
ريم: عاد انتي يا عمري يا ماما مو تسألين بس حاولي فيه يعني يبيله شوي ويوافق.
ام مشاري: انا بسال وبس...
ريم: يمه ليش النذاله..
ام مشاري: ريم وجع انا امك يا اللي ما تستحين..
ريم: يمه يمه اسفه والله اسفه قلتها على بالي انك رغد..بس يمه تكفين يا قلبي انتي حاولي في ابوي زين..انا طالعه اشتري اغراض..
ام مشاري: مو تقولين بتشترين من دبي..
ريم: يمه عادي هنا وهناك زيادة الخير خيرين..
ام مشاري: يا ربي هالبنت.ماراح يجيب لنا الفلس الا هي..
ريم: يمه خليك فري.انا طالعه..
راحت عشان تاخذ عبايتها ومرت من عند رغد..
رغد: على وين انشا الله..
ريم: بروح السوق..
رغد: وان شا الله كنتي بتروحين لحالك وما كان عندك نيه تقولين لي.
ريم بعربجيه: طيب وهذا انتي عرفتي ما صار شي..يله بتجين ولا اروح..
رغد: يا ربي هالبنت بتذبحني.اعصابك شوي وتقلبين ولد من كثر ما نتي عربجيه..خلي شوي عندك انوثوه..دلع..غنج..اي شي..
ريم: وبعدين يعني راح نطول ولا شلون..
رغد: هدي هدي يا ام الشباب نمبر (2) ثواني اجيب عبايتي واجي معاك..
&&&&&&&&&&&&&&&&&&
عند سليمان وتركي..
كانوا جالسين في كوفي ويسولفون..
سليمان: تصدق يا تركي ماني مصدق اني راح اسافر مع ريم..
تركي/ تبيني اعطيك كف على وجهك عشان تصدق..تراك ذبحتنا كل شوي ماني مصدق ماني مصدق خلاص عورت راسي..
سليمان: عشانك ما تدري قد ايش انا مشتاق لها ولا كان عذرتني..
تركي يقلد سليمان: تصدق يا تركي اقصد يا سليمان ماني مصدق اني راح اروح مع رغد..
سليمان: حضرتك تتطنز..
تركي: لا اتغشمر هههههههاي حلوه صح..
سليمان: ما ابيخ منك الا تنطيلك البايخ..اقوم واروح بيتنا وارتاح احسن من مقابل وجهك اللي يجيب الهم والنكد والحزن..
تركي: اعصابك كل هذا عشاني ما صدقتك..يا اخي صدقتك خلاص بس اقعد..
سليمان: لالا بروح..
تركي: تكفى اجلس.
سليمان يتغلى: لالا..لا تترجاني ما راح اجلس..
تركي: اقول انقلع لبيتكم كأن احد ماسكه..
سليمان: هذا وانا اشوف غلاي عندك..واكتشفت اني ولا شي عندك..
تركي: توك تدري..عشانك خبل..
سليمان تنرفز من جد: الشرهه مو عليك الشرهه على اللي اتصل عليك وعزمك وانت مو كفو لا حشيمه ولا كرامه..
تركي وهو كاتم ضحكته: يا ابن الحلال وش فيك عصبت حتي عيونك صار يطلع منها نار......اخ حرقتني هههههه..
سليمان ساكت وعصب زياده لان تركي قاعد يضحك وابرد ماعنده وهو احر ما عنده..
تركي: وانت لا الحين واقف..اجلس يا ابن الحلال.نمزح ..والله نمزح..مشكلتك زعول بسرعه تزعل..
سليمان جلس وهو ساكت..
تركي: احلى اللي اليوم بيشوف حبيبة القلب ريم..
سليمان ابتسم بس تذكر ريم: ايه هذي السوالف السنعه..
تركي/ هونت خلاص انقلع لبيتكم..
سليمان: بأحقرك وبجلس عناد..
تركي: صدق متى الرحله اليوم..
سليمان: 3 الفجر..بس تعال قبل اوكي..
تركي: على فكره نسيت اقول لك ترى نواف وسعود راح يكنون معانا..
سليمان: احلف ..متى صار هالكلام..
تركي: والله من يومين سمعوا بس طاري الامارات على طول احجزوا على نفس الرحله.
سليمان: حلو..اجل بيطلع فله.
تركي: تقدر تقول فله ومو فله ..يعني ما راح نقدر ناخذ راحتنا مع حريمنا على الاخر..
سليمان: صح هذي ما جات على بالي..
تركي: واصلا انت قد فكرت في شي طول عمرك مفهي..
سليمان: بدينا...
تركي: لا انتهينا ههههههاي حلوه لا تقول لا..
سليمان: يا لليل ما اطولك..
وكملوا تنطيل على بعض بالكلام لحد ما راحوا لبيوتهم على الساعه 12 عشان يرتاحون وبعدها يستعدون للرحله..
&&&&&&&&&&&&&&&&&&&&&&&