حتى إنت يا شيخ ..!!
قبل شهر تقريبا قررت أدور عن عمل إضافي بالفترة المسائية
طبعاً رواتب الشركات ماعادت تكفي وانتوا عارفين
عموماً
قدمت على وظيفة بجمعية خيرية لرعاية الأيتام بواسطة احد الزملاء وبما أني متخصص في المجال الاجتماعي تشجعت أكثر .
وفعلاً بعد ثلاثة أسابيع طلبوني للمقابلة
حضرت المقابلة وأغلب المتقدمين للوظيفة كانوا من الشباب الملتزمين
جلست عند باب المكتب انتظر دوري
كان الشيخ يسوي مقابلة مع شاب ملتزم ويحاول يقنعه بالوظيفة
ويقول : نعطيك ساعة تروح تتعشى و الشغله ما فيها تعب وووو .
والحين الدور علي ..
تكلم عن نفسك .؟
ولية تبي هالوظيفة ؟
طبعا جاوبته انها تناسب مؤهلاتي
وبالأخير
إذا عيناك بأحدى القرى التابعة للمنطقة بترفض ؟
قلت في نفسي :
سبحان الله ما سألت الملتزم اللي قبلي هالسؤال ؟؟
ولا جبت لي طاري عن ساعة العشى !!
وفعلاً
بعد يومين من المقابلة كلمني زميلي اللي توسط لي عند الشيخ
وكان الرد :-
لاتحرجني معك ومع خويك
احنا نبحث عن أشخاص ملتزمين وخويك لا يبدو عليه الالتزام ..!!
باقي الإضافة الرائعة للشيخ :
إحنا راح نحتاج للموظفين بالمجمعات التجارية يقدمون منشورات و تعريف بالجمعية
وصعب يكون خويك بالمجمع وهو غير ملتزم ((( ماندري وش يصير )) ..!!
يسلم بؤك يا حج فاهم ..
وما أقول غير
جزاك الله خير ياشيخ ...!!