الجزء التاسع
بالرياض بغرفة فهد بالفندق
كان دوبه طالع من الحمام ولبس ثوبه بسرعه وعدل شماغه وهو مستعجل ويطالع بالساعه:ياربييي تأخرت ع الموعد
ركب سيارته وع طووول ع المستشفى
عند الدكتور فهد:سلام عليكم
الدكتور:وعليكم السلام تأخرت!
فهد:معلش دكتور ما صحيت بدري
الدكتور ابتسم وقال:يلا ما عليه ابي ابلغك امس جات المريضه واخذت موعدها الاول
فهد:زين متى موعدها الثاني
الدكتور:موعدها الثاني بكره مع طبيب الأسنان وبعد هنا عشان نستكمل الفحوصات
فهد وهو يجلس:اوكي
الدكتور اخذ ملفه وفتحه وقال:اوكي انا الطبيب اللي راح اسوي لك العملية بإذن الله اذا تمت كل الفحوصات اول شي رغبتك بالتبرع خاليه من الضغوطات يعني انت بإرادتك ولا احد مجبرك
فهد:لا انا بإرادتي
الدكتور:اوكي حالتك العامه تأهلك لتبرع في حاله توافقت كل الفحوصات مع المتلقيه وان شاء الله تتم ع خير
وسكت شوي وقال:الحين ابي اخذ عينه من دمك عشان اشوف نسبة السكر فيه
قام فهد وجلس ع السرير واسترخى وشمر كم ثوبه وبدا الدكتور يسحب عينه من دمه
بعدها ارسلها للمختبر شوي الا طلعت النتائج ووصلت للدكتور وقال له:اوكي الحين انت خلصت كل شي وكل فحوصاتك كامله ومؤهل للتبرع بس بقى نطابقها مع فحوصات المتلقيه بعدها نرفعها للجنه اطباء زراعة الكلى للموافقه عليها وتحديد يوم العمليه
فهد ابتسم بفرح وقال:اوكي يعطيك العافيه يا دكتور
الدكتور:الله يعافيك موفق
...
بعد المغرب خالد جالس بالصاله وبيده جواله ومتنكد حييل من اللي صار له امس
طالع بالجوال وقال:ادق عليها
فكر شوي وقال وهو يرمي الجوال:لا بخربها زياده اوووف خليها ع الله
شوي الا سعود جا وقال:انا طالع تبي شي
خالد:وانا بعد بطلع
طلعو من البيت وكل واحد راح من ربعه
...
اليوم الثاني
حضر احمد بالمستشفى عند امه المرافقه لروان وروان عشان موعدها الثاني ع دخلة الدكتور معه
الدكتور:سلام عليكم
احمد:وعليكم السلام
الدكتور وهو يقول للممرضات:يلا انقلوها لغرفه الأشعه
نقلوها للأشعه وسوو لها اشعه لمنطقه البطن والمثانه
وبعدها قال الدكتور:راجعتو عند طبيب الأسنان
احمد وهو يمد له بورقة الفحص:ايه خلااص
الدكتور اخذها منه وحطها بملف روان
الدكتور بدا يسوي لروان اختبار التعرض للدرن وبعده طلعت النتائج ايجابيه
وبعدها قال:اوكي ترجع لغرفتها وراح تجيها المثقفة الصحيه
احمد:اوكي
رجعت روان لغرفتها وجاتها المثقفة الصحيه وبدت تعلمها بالإرشادات وبكل شي يخص العمليه
...
باليوم الثاني بالمستشفى بعد ما صحيت روان من النوم دخلت عندها الممرضه وقالت:الدكتور جاي
استعدت روان وامها ودخل الدكتور وهو يقول:صباح الخير وين ولي الامر
امها:جاي الحين
شوي دخل احمد وقال له الدكتور:اخوي الحين ننقلها لعيادة ما قبل الزراعه عشان تحاليل الدم تخلصها وترجع
احمد:اوكي
راحو للعياده وخلصو كل التحاليل ورجعو للغرفه
بالغرفه طالع احمد بروان وابتسم وهي قالت بتعب:دوخوني
احمد:معليش خلاص هانت
شوي دخل دكتور وبدا يفحص روان ويتأكد من حالتها الصحيه وبعد الفحص قال لأحمد وهو خارج:الحمد لله كل شي تمام
احمد:الحمد لله
...
ببيت ابو احمد
البيت فااضي سعود راح لبيت اهل عمه عشان عمه لزم عليهم يتعشون عندهم بس خالد تعذر انه معزوم عند اصحابه اما سعود ما فوتها وراح لعمه ع طوول
خالد ما كان معزوم ولا شي كان متضاايق حييل وما يبي يطلع مكان
كان جالس بالصاله وانوار البيت كلها مقفله الا نور الصاله الأصفر وع اخف شي وهو منسدح ع الكنب ومشغل التلفزيون والطفايه ع الطاولة وعلبه الدخان جنبها وحبه بيده وقاعد يدخن
له فتتترة ما دخن يمكن من يوم ما بكت روان بذاك اليوم وطلبت منه ما عاد يدخن وبطل عشانها وما كان يبيها تشوفه ابد وهو يدخن
لكن يوم سافرو اهله وسعود صار يا بالجامعه يا عند عمه يا مع ربعه وهو وحده حاول يقضى وقته مع اريج بس خربها من اول مرة
رمى الدخان في الطفايه وطلع اللي بفمه بقهر وقام وهو خلاااص ما عاد يبي يدخن ولا يقرب منه
راح للمطبخ واخذ عصير وجلس ع الكرسي وصار يطالع بالعصير ويتذكر ابوه بذاك اليوم اللي تأخر فيه مع اصحابه
%%%
كان خالد طالع مع ربعه وكان بثالث ثنوي ع النهايه المهم
واحد من ربعه كان يدخن وهو كان جالس جنبه وجات ريحة الدخان بخالد وبالربع كلهم بس من هالواحد
رجع خالد البيت وشاف ابوه جالس ويتقهوى مع امه بالصاله راح له ونزل عليه وحبه براسه ويده
رفع راسه بيمشي الا وكفففف ع وجهه
خالد طالع بأبوه مو مصدق وقال:شفيك يبه
ابوه بحزم:وش هالريحه اللي فيك تدخن؟؟ مو هذا اللي استفدته من هالربع
خالد:يبه والله ما ادخن واحد من ربعي دخن وحنا جالسين وانتشرت ريحته والله ما قربت من الدخان حتى
ابوه خلاه يطلع كل اللي بجيوبه وفتش سيارته وما لقى فيها شي بس طبعا ابوه كان اذا غلط ع اولاده ما يعتذر ابد لأنه ما غلط عليهم كره فيهم لا عشان يربيهم وحتى اولاده ما كانو يزعلون من هالشي بس بوقتها تكون عصبيه وتروح
%%%
تنهد وقال:لو يدري اني صرت ادخن الحين آآخ بس يبه ليتك ما مت
مسك جواله وصار يطالع برقم اريج تأفف وقال:انا ليه غبي كذا ما اعرف اتصرف بهالمواقف
دق ع جوال امه وع طول ردت:هلا يبه شلونك
خالد:هلابك يمه بخير والله انتي شلونك
امه:الحمد لله ماشي حالي
خالد:وروان كيفها واحمد
امه:بخير الحمد لله
خالد وهو يجلس ويتنهد:هاه وش صار ع العمليه؟
امه:والله كل يوم يطلعولنا بتحليل ولا فحص وباقي ما حددو متى
خالد:الله يعين وروان كيف صحتها
امه:على ماهي عليه ما تغيرت
خالد:الله يتممها لها ع خير تقدر تكلمني؟
امه:ايه دوبها صحيت الحين
خالد:زين بالله اعطيني اياها
امه اعطت الجوال روان وقالت:خالد يبيك
روان اخذت الجوال بفرح وقالت والتعب باين بصوتها:هلا خلود
خالد:هلا والله عاش من سمع صوتك اخباارك
روان ابتسمت وتجمعت دموعها بعيونها وقالت وبكوتها باينه بصوتها:تمام مو ناقصني الا شوفتكم
خالد لاحظ نبرة البكا وقال:رورو بس عاد ترى والله ما اتحمل بصيح ع طول
روان ضحكت مع بكوة وقالت:لا خلااص
خالد:وكيف احمدووه
روان:تمام والله انت شلونك ووشلون اريج
خالد ما حب يضيق صدرها وقال:تمام والله
روان:شلون علاقتكم ان شاء الله احسن
خالد تنهد وقال:احسن الحمد لله
روان:وسعود شلونه والله وحشني حييل
خالد:مبلط عند اهل عمي يقول يبي اكل البيت
روان:هههههه الله يفشله لا يكون قايل هالكلام قدام عمي
خالد:لا كان قد ذبحته هناك يا ياكل يا يتناقر هو وريم مسكينه بهذلها
روان:ههههههه عاد هي تشب بس لو سمعت صوته ع طول تعصب
خالد:هههههه والله مسكينه احزن لها الا احمد شفيه قاطعنا ما كأن له اخوان ناسيهم بجده
روان:انتو بالله تعالو
خالد:رورو دوامي وجامعة التفخه اللي معاي
روان:يوووه
خالد:لو جيت بخلي الشركه لمين اذا انا واحمد بنروح ما يصير
روان:زين متى تجون بنطول بالرياض
خالد:بنجي قبل عمليتك بكم يوم ونرجع
روان:يالله الله يجيب هاليوم بسرعه
خالد:آمييين يارب
.. .. .. .. جلسو يسولفون لين ما دخل احمد وقال:روااان يلا الدكتور جاي
روان:يلا خالد الدكتور جاي باي
خالد:باي
قفل الخط والدكتور دخل وصار يشيك عليها وخرج بعد ما طلب من احمد يحظر بكرة عشان موعد التطابق النسيجي بين المتبرع وروان وتطابق الدم وبعدها يقررون بخصوص العمليه
...
فهد طالع من عند الدكتور بعد ما قال له الدكتور انه لازم يجي عشان (الخزعه) ياخذون عينه من نسيج الكليه من المريض والمتبرع عشان يطابقون بينها ^-^
...
باليوم الثاني دخل فهد التنويم ع اساس ياخذون العينه من نسيج كليته وروان خلاص اخذوها منها واخذو عينه الدم
تخدر فهد وبدا الدكتور شغله وهي ما تحتاج جراحه بس ياخذونها عن طريق انبوب يدخل من جنبه يعني جراحه بس مو ذيك القوييه *-^
بعدها طلعوه وحطوه بالتنويم ع بال ما يفووق ويطلع
ارسلو العينات ع المختبر وبدا الإختبار والجزء الأصصصعب من الزرااعه *~*
...
بعد يوم من الخزعه طلعت النتايج فهد عند الدكتور ويستنى كلامه بفارغ الصبر وقلبه بيخرج من صدره من قوة نبضاته
اما احمد كان عند روان والمثقفه الصحيه هي اللي بتبلغهم بما انها عقدت صحبه مع ام روان ^-^
فهد:وش النتيجه يا دكتور
الدكتور ابتسم وطالع فيه وقال:الحمد لله متطاابقه بشكل عجييييب يعني بإذن الله نسبة نجاح العمليه لو تم الموافقه عليها 98%
تنهد فهد بإرتياح وقال:والباقي من النسبه
الدكتور:عاد هذي تعتمد ع تقبل الجسم للكليه ولا انتظام المريضه بالأدويه من دون تفريط ولا اهمال
فهد حس انه ارتاااح وقال:الحمد لله
...
المثقفة الصحيه فتحت باب غرفة روان وهي تقول:الف مبرووووك الدم والأنسجه متطابقين
روان حست بفرحه ما تنوصف وامها نفس الشي احمد مو مصدق وزااد فضوله حول المتبرع وقال وهو يقوم:المتبرع موجود بالمستشفى الحين
المثقفه:لا للأسف طلع قبل ربع ساعه والدكتور ارسلني ابلغكم بالنتائج
احمد جلس بضيق وضرب بيده ع فخذه وقال:طيب وش اسمه
المثقفه:ما اعرف والله بس هو شاب طويل بشرته سمرا سمار متوسط ودايم اذا جا المستشفى ثوب وشماغ احمر
احمد يحاول يتذكر بس ما فادته بشي من وصفها يعني ما وفته حقه وقال بضيق:شكلي ما اعرفه
...
بعد 3 ايام ع صدور النتائج
فهد بالفندق ومن يوم ما طلعت النتايج وهو مرتبك ينتظر اللحظه اللي يحددون موعد العمليه
جلس ع الصوفا الصغيره قدام البلكونه وهو ماسك جواله بيده وارسل لصباح ع البيبي"صبوحه ارسلي لي اكككبر كم هااائل من صور ليونتي"
صباح"هههههه من عيوني"
وبدت ترسل له يمكن 15 صورة وباقي يبي زياده
شوي الا جواله يدق وكان مكتوب"الدكتور ......."
رد ع طوول وبدى نبظه يزيد:هلا دكتور
الدكتور:هلا اخوي اخبارك
فهد:تمام الحمد لله
الدكتور:اوكي اخوي تحدد موعد عمليتك بعد بكرة ضروري تجي اليوم بالليل عشان تتنوم ما قبل العمليه
فهد بإرتباك:طيب يصير خير
الدكتور:يلا موفق فمان الله
فهد:فمان الله
قفل الخط وتنهد وانسدح ع ظهره وقال وهو يقفل عيونه بتعب:ياااارب كوون بعوووني
...
عند احمد
كان نايم بالفندق لأنه رجع متأخر من المستشفى وما صحي بدري
صحى ع صوت جواله جا بيرد وتقفل اخذه وشاف لقى 5 مكالمات من الدكتور جا بيدق عليه الا وصلته رساله منه يقول فيها"اخوي تحدد موعد عملية المريضه روان ال....... وهو بعد بكره واتمنى لها الشفاء العاجل"
قراها احمد وتنهد بفرح وع طوووول دز لكل اللي يعرفهم مسج يبلغهم بهالشي ومن ضمنهم فهد وسعود وخالد وعمه
دقو وباركو له <<طبعا فهد خرّاش يعني انه ما يعرف
اما سعود ع طول راح وحجز تذكرتين ع الرياض ورحلتهم بعد المغرب
...
ببيت رغد
كانت جالسه شوي الا توصلها رساله من رقم ام روان مكتوب فيها"ابشرك روان بتسوي العمليه بعد بكرة دعواتك لها يا بنتي"
صرخت بفرح:واااااااااااااااااااو روروووو
مازن:الله يشفييك سلامات
ابوها:هههههه متى تبطلين هالخبال تثيرين فضولنا ترى
امها:شعندك
واللي صارت تضحك عليها حنان مرة اخوها
ضحكت وقالت بفرح:روان صديقتي بتسوي العمليه بعد بكره
كل اهلها فرحو وقالو :الحمد لله الله يتمم لها ع خير
مازن:اوديك لها تزورينها
رغد ضحكت وقالت:ايه بس هي بتسويها بالرياض
مازن بضحك:معصي ما تشوفينها
رغد:هههههههههههه جامل طيب
مازن بضحك:لا ماعندي
...
فهد كان منسدح ع سرييره ويراسل صباح:صبوحه بعد بكرة عمليتي قولي لأمي وابوي إذا بتجون
صباح:من جد خلااص تحددت
فهد:ايه دوبه الدكتور مكلمني
صباح:الحمد لله اوكي الحين اقول لهم واكيييد بنجي
فهد:امي باقي زعلانه *~*
صباح:لا عادي انحطت بالأمر الواقع
فهد:صبوحه اذا حسيتي انها بتزعل اذا عرفت لا تقولين لها
صباح:شلون حرام عليك بتزعل اذا ما قلت لها
فهد:زين بكيفك دعواتكم
صباح حست انه مرتبك وقالت:الله يتمم لك ع خيير ولا يورينا فيك مكرووه ويجعل كل اللي سويته بموازين حسناتك
فهد ابتسم وكتب:آميين بعد خلي امي تدعي لي ولا تززعل والله ما يهون علي هالشي
صباح:طيب
قامت وراحت عند امها وورتها الجوال وقالت:اقري يمه
امها صارت تقرا كلام فهد وتجمعت دموعها بعيونها وقالت:الله لا يحرمني منه ولا يوريني فيه مكرووه ويسلمه لي ويحفظه من كل شر ويجعلها بميزان حسناته
صباح بلغت ابوها بس ابوها كان مشغول وقال لها:زين خلي انور يحجز لنا التذاكر وبكرة ماشين واذا بتجين معانا انتي وياه
صباح:ايه يبه اكييد
ابوها:زين احجزو التذاكر
صباح اخذت جوالها ودقت ع انوروهو رد ع طول:هلا حياتي
صباح:هلابك وينك
انور:جااايك يلا بس اجهزي
صباح:وين؟!
انور:لبيتنا مو كأنك هجرتيه!
صباح:ههههههه زين بس ابوي يبيك تحجز تذاكر وانا بساعد امي بالأغراض بكرة بنمشي الرياض عشان عملية فهد
انور يبي ينرفزها:طيب اهلك بيسافرون انتي وش عليك بحجز لهم تذاكر وانتي يلا ع البيت
صباح:انوووور اخوي بيسوي عملية !!
انور وهو كاتم ضحكته:حياتي وانا زوجك انا اولى دوامي ماقدر اسافر هو خلاص ان شاء الله يقوم بالسلامه
صباح بضيق:انووور تكفىىى
انور:يلا بس ابروح احجز التذاكر واجي اخذك وليان بعد خذيها وحشتني
صباح:مو كأنك شفتها اليوم الصباح
انور:بعد تحاسبيني ع بنتي
صباح بقهر:زين زين بخليها يعني!؟ مافي فهد تنام معاه فمان الله
انور:ههههههه فدييييتك مع السلامه
قفل الخط وراح ع المطار وحجز 4 تذاكر له ولصباح ولعمه وعمته
...
صباح تجهز الأغراض مع امها وتقول بقهر:ما بسافر معاكم
امها بضيق:ليه؟؟؟
صباح بقهههر:انور حبني فجأة
امها:يوووه
صباح وهي تحط ملابس امها بضيق بالشنطه:يقول دوامه ما يقدر يسافر
امها:يلا مو مشكله بيعذرك فهد
صباح وهي تضرب بيدينها ع فخذها:مو يعذرني ولا عساه ما عذرني انا ابي اشوفه وابي اشوف روان
امها:ما عليه بتلحقين عليهم اهم شي زوجك
صباح وهي تقوم بضيق عشان تجهز اغراضها:ياربي يا هالزوج
جهزت اغراضها ولبست ليان وجلست تستناه بالصاله
شوي الا الجرس يدق راحت وفتحت الباب وكانت مكشرة انور ابتسم وقال:سلام
صباح بنفس الملامح:وعليكم السلام
اعطاها تذاكر امها وابوها وقال:خذي اعطيها ابوك ويلا شوفيني بالسيارة
صباح تطالع بيده مافي امل يعطيها تذاكر زياده تأففت وقالت:زين جايه
وهو قال:صبوحه اعطيني ليان ابطلع انا وياها
مشت لين ليان وشالتها واعطتها اياه وراحت لغرفة ابوها تعطيه التذاكر
هو اخذ ليان وطلعو وجلس بالسيارة وليان بحظنه ويلاعبها شوي استند ع المقعد وصار حاضن ليان ومسررح وبخاطره يقول:هه قال بتتعود علي ويتغير شعورها الحمد لله ع النعمه الله رزقنا ببنت تربط بيننا وباقي صبوحتي ع حالها ما تغيرت يالله قدها حياه فانيه
شوي الا صباح طلعت وركبت السياره بضيق وقفلت الباب
انور حرك السياره وكان مبتسم نفس الإبتسامه اللي كل يوم مرسومه ع وجهه بس مو من قلبه
طالعت بوجهه وحست بقهر فضييع ولفت وجهها جهت الشباك وهو يسوق الا شوي بدت السيارة تلفلف انتبه ومسك الدركسون زين وصباح قالت بخوف:شفيك ما تشوف؟!
انور بنفس الإبتسامه:لا بس ليان لفته وقال لليان وهو يبوسها:تبي تموتينا ههههه
صباح تنهدت وقالت:هاتها عنك
انور ما رد وهي اخذتها من حضنه وخلتها بحضنها
سرحت بالقزاز وهي تقول بخاطرها:اووف والله نفسي اروح لفهد بس انور من سنتين ع زواجنا وبرضو باقي يعابطني
تذكرة ذاك اليوم اللي جا عندها ابوها وقال لها ان انور يبي يتزوجها بس هي رفضت كذا عباطه ما عندها سبب وتقول مالي خلق للزواج بهالوقت انور جاب لها عذر وقال راح يستناها لين ما تفوق للزواج بس هي صارت تصرف لين ما اجبروها اهلها تتزوجه وهي قالت له هالشي بليلتهم الأولى كانت تبكي وقالت وهي متنرفزة
"اصلا انا مجبورة علييك مابيييك وخر عنيي"
تنهدت بضييق وقالت:بس هالشي تغير الحين
سكتت شوي وتذكرة كلام امها لها يوم عرفت باللي قالته صباح لأنور قالت
"تراه رجال وانتي جرحتيه في كرامته وحتى لو بين لك انه نسى صدقيني انه بيتذكرها باليوم الف مره وما راح يسامحك عليها وبعدها خلي طيشك ينفعك"
تنهدت وقالت:اجل ما يعابطني من فراغ
وصلو البيت ونزلو
بالغرفه صباح طالعه من الحمام وهي تقول لليان اللي ع السريير:يلا ليون ننام
اخذت رضاعتها وجلست وصارت ترضعها
انور كان جالس ع طرف السرير وقام وراح للكومدينا واخذ التذكرة حقتها ومشى لين عندها وجلس قبالها وقال وهو يمد لها بالتذكرة حقتها بس:خذي صبوحه ولا تزعلين
صباح طالعت بالتذكرة وطالعت بوجهه ورجعت طالعت بالتذكرة بصدمه سكتت وحسست انها حقييييييرة
وقالت بتردد:لي انا
انور نفس الأبتسامه:ايه لك مو تبين تسافرين
صباح ضحكت وقالت وهي تحضنه:احبببببببببببببببك
ابتسم انور بدون نفس وقال وهو يبعدها عنه بخفه ويقوم:بس عاد ادري انك فرحانه بس مو لدرجه تحبيني
صباح طالعت فيه وقالت بحزن:انور والله احبك
انور وهو يفسخ ثوبه ويعلقه:يلا بس نامي وراك سفر
صباح بضيق:وانت ما بتسافر
انور انسدح وتغطى باللحاف وقال وهو يطالع فيها:تبيني اسافر؟ ما اضن !
صباح تضايقت زياده وقالت:شدعوه انور اكيد ابيك تسافر
انور:ليش مو مهم اهم شي مع اهلك
صباح وهي تمسك يده ودموعها بعيونها:انت اهلي
انور طالع فيها وتذكر ليلتهم الأولى وقال وهو يتنهد:زين نامي ويصير خير
لف وجهه عنها ونام وهي صارت تطالع بليان وهي نايمه ودموعها بعيونها ومقهوووره ع حياتها القشرا
...
باليوم الثاني ع العصر سعود وخالد خلاص ضبطو امورهم للسفر ورحلتهم الساعه 6 المغرب
كانو جالسين بالصاله وسعود قال وهو يطالع بالطفايه:انت بالله اقلب وجهك ولا تدخن عندي
خالد طفى الدخان بضيق وشال الطفايه ورجع جلس شوي طلع لغرفته وبدل ملابسه وتضبط ونزل
طالع فيه سعود وقال:وين وين
خالد:بروح لأهل عمي
سعود وهو يفصفص ويشرب شاهي:اهاا عند المره يلا الله يسهل لك
خرج خالد من دون ما يرد عليه وهو بالطريق وجواله بيده ويقول بخاطره:ابي اشووفها قبل لا اساافر مو متحمل كل هالصد ولا حتى صوتها ما اسمعه
قرب من بيت عمه ومسك جواله ودق عليها
كل مرة ما ترد بس هالمرة كان مشغول
استنى شوي ودق برضو مشغول
وصل لبيت عمه ونزل لقى عمه خارج سلم عليه وقال له عمه:تفضل البيت بيتك ابروح عندي شوية اشغال وراد
خالد:لا ابد عمي خذ راحتك بس ابسلم ع اريج ومسافر
عمه:الله يسهل لك يلا فمان الله
دخل البيت وهو يقول بخاطره:الحين ما ترد علي شلون بتجي وتخليني اشوفها
كان منزل راسه ورفعه وشافها واقفه عند نافورة صغيرة بالحوش وكانت لابسه بيجاما نااعمه بدون اكمام وقصيرة لنص الساق
شعرها كانت لامته عشوائي وحاطه كحل خفييف ومسكرة وروج
كان شايفها من الجنب وع طول مشى لين قرب منها وسمعها تكلم بالجوال كانت تكلم وحده من صحباتها
صار واقف ويطالع فيها لين ما قفلت الجوال ومشى بتردد لين وصل عندها ومسكها من ذراعها وهو ينطق بإسمها:ارييج
اريج عرفت الصوت ولفت وهي خايفه بس لقته مبتسم والضيقه باينه بوجهه
عقدت حواجبها بضيق ووقفت بدون ما تتكلم
وهو صار يطالع فيها وبخاطره كلاام كثييييير وده يحكيه لها تنهد وضمها بقووه لصدره وهي ما حركت ساكن
بعدها عنه وقال بضيق:مع السلامه انا مسافر الحين
اريج وهي تلف وجهها عنه:مع السلامه الله معاك
خالد تنهد وقال وهو يضغط ع يدها:انتبهي ع نفسك
اريج ما ردت وهو فك يدها وخرج
اريج عيونها ما فارقت الباب وحست بألم فضيييع يعصر قلبها ودموعها صارت تنزل وهي تقول بخاطرها:بتوحشني حييييل
...
ركب سيارته الا وجواله يدق طالع لقاه سعود ورد:هلا
سعود:يلا مرني ما بقى شي ع الرحله
خالد:زين جاي
سعود:يلا فمان الله
خالد:مع السلامه
قفل الخط وراح للبيت وصار واقف وسعود يحط الشنط بالسيارة وبعدها ركب ومشى خالد
جلسو شوي ومد يده سعود وشغل المسجل وهو يقول ابي طرررب
سمعو صوت راشد الماجد وهو يغني"يا حبي افهم انك بخافقي شي ... "
سعود بطفش:يوووه ناقصين هم جا بيقفل المسجل بس خالد قال:خليها
سعود بطفش:كئيبه
خالد:انطم
على الصوت وانندمج مع كلمات الأغنيه وسعود حس بكأآآآبه ولف وجهه جهة الشباك واذنه مع المسجل
شوي طالع بخالد وقال:اخوي نفسي؟؟
خالد بدون اهتمام:قلت انطم
سعود:آمر
شوي قربو من المطار وقفل سعود المسجل خالد شغله بضيق وقال:يالله ع اللقافه مو كأنك بسيارتي
سعود:سيارة اخوي
خالد:لا بالله
شوي وقفو عند المطار وقفل السيارة من دون ما يقفل المسجل ونزل واخذ شنطته ونزل سعود واخذ شنطته وصارو يمشون ويتناقرون
سعود:يا ابله ما قفلت المسجل
خالد:يلعن شكلك سيارتي لا تتدخل
سعود:على تراب من زينها الكابرس احلى منها
خالد:اغلى منك
سعود:روح مووت بالله
خالد ما رد عليه ودخلو للمطار وجلسو بصالة الإنتظار
...
ببيت انور
انور منسدح ع السرير وصباح ترتب ملابسها وتتمنى انها تسمع منه كلمة "رتبي ملابسي معاك"
شوي الا صوت ليان تبكي انتبهو ولفو جهتها لقيو اصباعها عالق بلعبه من العابها
قامو ع طول عندها انور مسكها وصار يقول وهو يحاول يفك اصباعها:خلااص حياتي لا تبكين
صباح كانت ماسكه اللعبه وتقول:بشوييش لا تعورها
وليان تبكي بصوتها كله
بالنهايه طلع اصباعه وحملها وباسها وهو يقول:بس بس حبيبتي خلاااص طلعته شووفي
ويوريها اصبعها شوي هديت وسكتت
وصباح كانت تطالع فيه وهو يسكتها
انور حضن ليان واستند ع السرير وانتبه لصباح وهي تطالع فيه وقال وهو مبتسم:ما فيني شي جديد قومي خلصي ملابسك لا تتأخرين ع اهلك
قامت صباح وصارت ترتب الباقي من ملابسها
شوي قام هو وحط ليان ع الأرض وأخذ شنطته وفتح دولابه وبدا يحط ملابسه بشكل عشوائي ابتسمت صباح بفرح وقالت:بتجي معاي؟
انور ابتسم وقال:ايه وحشني فهد
ضحكت وقالت:زين انا برتب لك ملابسك لا تعفسها كذا
انور جلس وصار يتشرط ابي ذا ومابي ذا لين ما خلصت
شوي طالعت فيه وهو ياخذ تذكرته من ع الكومدينا وقالت بضيق:دامك حاجز لك من اول ليه توترني كذا وتقول انك ما بتسافر
انور طالع فيها ومشى وجلس قبالها وقال وهو مبتسم:صبوحه لا تمثلين علي انا عارف هالشي ما يهمك
تنهدت صباح وتجمعت دموعها بعيونها وقالت وهي تمسك يده وبكوتها باينه بصوتها:شلون ما يهمني
نزّلت راسها ونزلت دموعها وهو صار يطالع فيها وهي تبكي ورفع راسها وقال:بس لا تبكين
مسح دموعها وقال بحنان:يلا بنتأخر ع اهلك
قامت صباح ولبست عبايتها ولبّست ليان وهو حط الأغراض بالسيارة ومشو ع المطار وقابلو ابو وام صباح وجلسو ينتظرون رحلتهم
...
بعد صلاة العشاء
فهد دوبه طالع من الحمام بعد ما تروش لبس ثوبه بس من دون شماغ وراح للمستشفى
دخل وراح لمكتب الدخول وخلص اجراءات التنويم
بعدها مشى مع مسؤل قسم التنويم ودله ع غرفته لقى الممرض يستناه وع طول دخل للغرفة واخذ الممرض طوله ووزنه وبد يشرح له شلون يستخدم الأجهزة اللي بالغرفه بعدها لبس فهد ملابس التنويم واسترخى ع السرير ودخلت المثقفة الصحيه وبدت تعطيه الإرشادات وتجاوب ع كل اسئلته
خرجت المثقفه الصحيه وطالع فهد بالسقف وسرح وهو يقول بخاطره:يالله كون بعوني وتعدي ع خيير
شوي دخل الدكتور اللي بيسوي له العمليه وطلب منه كل الفحوصات اللي سواها واعطاه فهد ورجع فحصه فحص سريع وطلع
بعدها دخل الدكتور ومعه مجموعه اوراق وطلب منه يوقع عليها اللي هي الموافقه ع العمليه
...
عند روان واحمد
روان كانت تغسل كليتها واحمد كان جالس معاها وامهم معاهم شوي دخل الدكتور ومعاه اوراق الموافقه ع العمليه وطلب من احمد يوقع عليها
وقع احمد وطالع بروان وقال وهو مبتسم:الحمد لله خلااص بكرة العمليه ما بقى شي
امه:الله يتممها ع خير
شوي دخل الطبيب الجرّاح وبدا يشرح لهم العمليه
...
بمطار الرياض
وصلو سعود وخالد وبعد هم ينتاقرون ع اتفه شي شوي لقيو احمد واقف ويستناهم
ضحك سعود وهو ينادي:حمااااده وحشششتني
خالد طالع بسعود وقال:الله يشفييك
ضحك سعود وحضن احمد واحمد ضحك وحضنه سلم ع خالد ومشو للفندق حطو اغراضهم وراحو ع طوول للمستشفى عند روان
روان كانت منسدحه ع سريرها وتعبااانه
دخلو اخوانها وقال سعود:رورو
روان طالعت فيهم وابتسمت بفرح وقالت:فديييتكم وحشتوني
ضحكو وسلمو عليها وع امهم وجلسو يسولفون معاهم
...
نرجع لمطار الرياض
وصلو للرياض انور وصباح واهلها وبعد هم راحو للفندق وحطو اغراضهم وع طوول ع المستشفى جلسو مع فهد واستانسو وونسووه
وهو فرح حييل خاصه بلياان اللي من يوم ما دخلت وهي بحضنه
...