ورموشها تشبه صفوف الطوابير
والخد نوره ساطع وزايد اشعاع
وزينك تعدّا زين كل الغنادير
يابنت انا مغرم ولي بالهوا باع
واليا بغيت اقفى تحول المقادير
قلبي على مثلك كما الحر لافاع
يكفخ ولاتردّه كثير المحاذير
ويرجع وهو مسكين مكسور ملّاع
يصبح نصيبه بس ضرب المشاوير
عجزت اعذله عن هوا البيض ماطاع
يقول بكره يلفين لي مسايير
وراع الهوا مسكين بالبيض طمّاع
تلقاه في ليله عيونه مساهير
كم شخص من حب الغنادير قد ضاع
قرمن ويحسب من حساب المشاهير
ترا لهن في حبّن فن واطباع
من فعلهن تحتار كثر التفاكير
انشد مجرّب عارفن كل الاوضاع
ايطيّحنّك ثم يقفن مدابير
وان جيتهن بالطّيب واسلوب واقناع
يجيك من زينه يفوق المعايير
واللي عشق من صدق مايلبس اقناع
يصبر على خلّه ولو به تقاصير
وراع الهوا يابنت ماهوب جزّاع
في حب خلّه مايحسب المخاسير
هذا كلام اللي من الحب ملتاع
وهذا كلامي مايبيله تفاسير