منتديات كلك غلا - عرض مشاركة واحدة

10-20-2011, 10:06 PM

العنود..راحت عند المراجيح وبطنها تقطع من الضحك..
ريم تطالعها بحقد: انذل منك بحياتي ما شفت..
العنود: ههههههههههههههههههههههههههه
ريم: اقول اسكتي لا اذبحك الحين..
العنود: وربي لو شفتي وشلون يطالعونك كان صدق ذبحتيني..
ريم: اوريك والله ما اسكت لك بردها لك..
وقعدت هي وياها يلعبون بالمراجيح وسكتوا شوي..
ريم: اقول عنيد وش فيك ساكته وش عندك...
العند تنهدت: بصراحه ضايق صدري...
ريم خافت: ليش؟؟
العنود: كلكم بتروحون وتخلوني..
ريم: وانا وين رحت شوفيني عندك..
العنود وهي تناظر بالارض: انتي بتلهين مع سليمان..وتنسين اللي جابوا العنود..
ريم كسرت خاطرها العنود وراحت جنبها: افا يا العنود ما هقيتها منك..انا اتخلى عن بنت عمي واختي وصديقتي..والله ما اسويها لو يجي تركان بكبره مو سلميان..
العنود: ههههه حلوه لو يجي تركان..اصلا لو يجي تركان انا بتركك..
"تركان مغني تركي يقطع القلب شويه عليه.."
ريم: ههههه اوريك يا الجحده..
وبدت الحرب بالرمل عندهم..وجات عبير..
عبير: خير خير وش تسون انهبلتوا..
ودخلوها في الحرب معاهم..
شجون: الحمد لله والشكر بس..مهبل...
ريم: شجون تعالي معانا والله فله...
شجون: انا بروح اناااااااااااام تعبانه...
وخلصت الحرب التي دامت عشر دقايق..وكلهم تسدحوا على الرمل..
عبير: يالله تعبت وجاني النوم..
العنود: خلونا نتروش وننام..
ريم: يله...
ومشوا وهو يغنون لسرين عبد النور..
لو بص في عيني مره بس..
حيحس اوام بشوقي ليه..
لو بص في عيني مره بس..
حيحس بأني دايبه فيه..
لو قلي تعالي قلبي دق ..
انا رحلوا اوام مقولش لا..
&&&&&&&&&&&&&&&&&&&&
رغد: تروك يله الحين ابي انام و ارتاح ..اشوفك بعدين...
تركي: اوكيه...اوصلك هناك..
رغد: لا وصلني عند مشاري عشان اخذ الهنوف...
تركي: بعد احسن عشان انكد عليه...
وراحوا لعند مشاري...
رغد: هنوفه قلبي يلا سرينا..
مشاري: على كيفك يوم مليتي من زوجك تجين تاخذين زوجتي...
رغد: وانت وش عليك انا ابي صديقتي....
الهنوف: ما عليه ميشو اشوفك بعدين...
مشاري: بس عشانك ولا كان ما وافقت...
تركي: مسكين اخذوا زوجته منه...
مشاري: احسن منك...اللي زوجتك ملت منك...
تركي: على قلبي مثل العسل...
رغد: هههههه يلا باي...
الهنوف: بااااي..
الاثنين: باياااااااات..
مشاري: بعد احنا نروح ننام..
تركي: يلا...
وراحوا عند العيال...
سليمان: توك تجي...توك تذكرني..
تركي: اصلا ما ذكرتك انا جاي انام...
سليمان: وبعد يا اللي ما تستحي على وجهك..
تركي: امزح معاك..كيفك بدوني...؟
سليمان: تبي الصدق...
تركي: ايوه...
سليمان: والله انا بدونك ما اسوى...
تركي: تسلم والله...والله انك اخوي قبل لا تصير صديقي..
طلال: وش عندكم تودعون بعض...
تركي: مثل مانت عارف مقبل على زواج ولازم اودع صديقي...
ماجد: واالله صار عندنا معاريس..طلال ما انت بناوي...
طلال: قريبا ان شالله راح تسمعون خبر زواجي..
فواز: ومن تعيسة الحظ..
مشاري: اللي داعيه عليها امها...
طلال: مسكين ..هذي امها دعت لها وين ما تروحين تشوفين الخير قدامك..
تركي: وانت الخير ان شالله...؟؟؟
طلال: اكيد..انا نعمه من الله على الناس وعليكم بس ما راح تحسون الا اذا فقدتوني...
ماجد: الاخ ماخذ في نفسه مقلب...
وضحكوا العيال...
طلال: اضحكوا اضحكوا اصلا انا عندي مناعه..
سليمان: هههه والله انك حفله بدون كيكه..
وليد كان حاضر بس بعيد عن الكل والجميع ومعتزل الناس والكلام..وما يعلق ولا على أي شي...
وناموا العيال..
&&&&&&&&&&&&&&&&&&&&&&
العصر البنات نايمين..فتحت عيونها...شافت اشكال البنات ضحكت عليهم...دخلت دورة المياه اللي يكرمكم وتوضت للصلاه وطلعت..صلت وبعدها طلعت من الغرفه...شافت الجو كان خيال الشمس بدت تغرب والسما لونها اورنج واحمر...اخذت حجابها ولفته عليها..وقررت تتمشى شوي..مشت...مشت..وهي تفكر بكل شي...وبالتحديد في وليد وموقفه من تركي..اكيد عرفتوها رغد...
رغد حصلت نفسها وصلت عن الخيول...ووقفت عند السياج تتفرج على الخيل..اللي قاعد ياكل..واللي يمشي بشموخ...ولفت انتباهها..فارس خيل..راكب الخيل بمهاره..ويركض فيه وكأنه خيّاله..دققت في الشخص وعرفته من شعره الي يطيرها الهوا ..ومن لونه الاسود مثل الليل وظلمته....كان يركض فيه وكأنه معصب او مقهور وكل شوي يزيد سرعته...صارت تتفرج عليه..جذبها هالفارس...الفارس هذا انتبه ان في شخص موجود وعارفه زين ..حس بمشاعر غريبه.بمشاعر الشموخ والعزه..ما كان وده انها تنتبه له انه شافها..بس ماحس بنفسه الا وهو يقرب منها..
رغد حست بقربه لها ما خافت ولا انصدمت..بالعكس ابتسمت له...كان ودها تتكلم معاه..تفهمه..تشرح له..تعتذر له..اكيد عرفتوه..الفارس هذا كان وليد...
رغد بأبتسامه وهي رافعه راسها عشان تشوفه: مشا الله ...تعرف للخيل...
وليد ما رد عليها وصار يطالعها...مو نظرات كره ..ولا حقد ..بالعكس شوق طاغي عليه الجمود...وحاول انه ما يبين لها انه ما زال يحبها...حاول يبين انها خلاص انتهت من حياته...
رغد ما عجبها سكوته بس كملت: تصدق انا ما اعرف اركب خيل الا لازم مشاري معاي او ابوي...
وليد بعوفيه وغصب عنه: تجربين؟؟
رغد انصدمت وودها تقول لا بس خافت تقولها...فهزت راسها بالايجاب..
نزل وليد من الخيل: يله تعالي ادخلي..ولا اقول نطي من فوق السياج..
رغد: لالا بروح ادخل مع الباب احسن...
وراحت للباب وفتحته ودخلت وسكرته...ووصلت لعند وليد اللي كان يطالعها طول الوقت..
رغد: يله تراني متحمسه...
وليد مد لها ايده عشان يساعدها تركب الخيل...
رغد طالعت ايده شوي بعدين مسكتها..ما تدري وش الي يجبرها على كذا هذا...الحزن اللي بعيون وليد...ولا شعورها بالذنب...ولا كنوع من الاعتذار..
وليد مسك ايدها وكأنه مسك قلبه وقاعد يعصره...قاعد معاها وهو عارف انها مستحيل تكون له..او مستحيل تحبه..او حتى تفكر فيه...
طلعت رغد فوق الخيل..وتستنى وليد يمسك اللجام ويحرك الخيل..لكن المفاجأه ان وليد طلع وراها..رغد حست ان الدم تجمد بعروقها..ووقف شعر راسها...وليد وراها بالضبط...تحس بنبضات قلبه السريعه..وتحس بسرعة تنفسه..مد ايده عشان يمسك اللجام..صارت رغد بين ايديه وبينه هو..
وليد مشاعر كثيره اجتاحت قلبه وعصفت فيه...قريب بالمره من حبيبته سابقا عطرها صار في هواه اللي يتنفسه..حس برجفه في كل جسمه بس قاوم هالشعور...ويحس انها اخر لحظالت راح يقضيها مع رغد.. لانه خلاص بيسافر ويبتعد عنها وعن الكل واولهم عن تركي اللي كل لحظه والثانيه يطالعه وكأنه شمتان فيه..وفي نظرته نظرة النصر..
حرك وليد الخيل وصار يمشي بهدوء ..بعد دقايق صمت وكل واحد في عالمه..
وليد بصوت مبحوح: رغد...
رغد حزنت اكثر على نبرة صوته وردت بهدوء: هلا...
وليد وكأن العبره خنقته: مبسوطه معاه..
رغد حست فيه..هالسؤال يجرح..يقتل ليش يعذب عمره..ليش يعذب قلبه ويسأل..ليه...
رغد بصوت حزين: وليد ليه..
وليد قاطعها: اسألك مبسوطه معاه..
رغد بلعت ريقها وعيونها امتلت دموع: وليد ليش تبي تعذبني...ليش تبي تحسسني بتأنيب الضمير..
وليد بأصرار:مبسوطه معاه..
رغد استسلمت: الحمد لله...
وليد: وانا؟؟
رغد تعبت معاه ما تدري وش تقول....سؤاله مكون من ثلاث حروف بس جوابه اصعب جواب..وش ممكن تقول له..وش ترد عليه...
وليد بصوت ضعيف: رغد انا من بعدك ذقت المر..من بعدك عرفت الويل..من لما رفضتيني وانا انتهيت..وش اسوي علميني..انتي علمتيني كيف احبك..بس ما علمتيني كيف انساك..
رغد:وليد ممكن تنزلني..
وليد: بس انا احتاجك..والله احتاجك..
رغد بكت: وليد بليز نزلني..
وليد وقف الخيل ونزل ومد ايده ونزلها بس ما فك ايدها..
وليد: بتروحين عني مره ثانيه..
رغد ما لفت عليه: صدقني يا وليد الزمن كفيل انه ينسيك..انساني يا وليد انساني..انا مستحيل اكون لك مستحيل..
وليد سحبها من ايدها وقربها عنده ومسك وجهها بأيده: حرام عليك تعذبيني والله حرام عليك حسّي فيني لا تصرين انانيه...
رغد وخرت ايديه عنها: انا ماني انانيه...لكن مستحيل ينجبر قلب على قلب..افهم يا وليد افهمني..
وليد: وليه مو انتي اللي تفهميني...
رغد: وليد انا عندي لك كلمتين مو اكثر...اول شي ودي اعتذر لك عن اللي بدر مني..واعتذر لك اذا قسيت عليك وادري اعتذاري ما يفيد بس هذا اللي اقدر عليه..ثاني شي..انا ماعاد احل لك..حرام الحين المشاعر اللي تكنها لي...وانا ما عاد في ايديني أي شي لك يا وليد..ونصيحه مني كأخت لك يا وليد..شيلني من بالك بأي طريقه ولو حتى انك تكرهني انا راضيه بس انك تتعدى مرحلة رغد..وتصير من الماضي..واسهل حل دور لك على بنت الحلال وصدقني انك راح تنساني وتقول رغد مين رغد انا ما اذكرها..
وراحت رغد وتركت وليد في دوامه ما لها اول ولا تالي..
&&&&&&&&&&&&&&&&&&
لين: شعولي..
مشعل: هلا..
لين مكشره: وين صديقك النشبه..
مشعل كاتم ضحكتها: نايم..
لين قربت جنب مشعل مبسوطه: اوف الحمد لله...ما ادري وشلون صادقت واحد مثله...يالله مره فضيع..
مشعل: ههههه عاد صار صديقي..
لين: تصدق مشعل حنيت لايام قبل...قبل محمدوه اكيد..والله كنا مبسوطين...
مشعل: احس ما تغير شي..
لين: كل هذا ولا تغير شي..
جا محمد:يالله مساء خير..وانتي ما صدقتي على الله اختفيت شوي لزقت في الولد..
لين: اوووووووووف جاء النشبه..
محمد: على قلبك..
مشعل يضحك على خبالهم.,,,
&&&&&&&&&&&&&&&&&&&&
اجتمعوا البنات بعد صلاة العشا...
ريم: بصراحه طفش وش نسوي..
العنود: خلونا نفكر بشي يسلينا ومشترك..
رغد: تقصدين بينا وبين العيال...
فجر: ايه احسن ابي زوجي...
ريم: جاتني فكره جهنميه وخطيره ومدهشه بعد..
عبير: اخلصي علينا جلست تمدح في عمرها ساعه...
ريم:وش رايكم نسوي مسابقة شعر..
العنود: والله فالحه..واللي ما يعرف الشعر...
ريم: ادري ان الاغلبيه ما عندهم سالفه..بس مسموح استعارة قصائد الغير..
نوف: الله وناااااااسه..
ريم: الشروط هي..
اولا: كل منافس يبحث عن القصيده بمفرده..
ثانيا: ما تقل القصيده عن بيتين ولا تكثر عن عشر...
ثالثا: ان تكون القصيده حلوه..مو مثل وجهه..
رغد: وش هالشروط تقولين تعبير في المدرسه..
ريم: المهم الكل يلتزم بالشروط ولا راح يطلع..وثاني شي عطوا العيال خبر...ثالث شي راح تبدى المسابقه الساعه 12 بالليل عشاني رومنسيه....
العنود: ايه هين قابليني...يله نروح نبلغ العيال...
&&&&&&&&&&&