منتديات كلك غلا - عرض مشاركة واحدة - أبيك في درب المحبة تخاويني للكاتبة الدكتورة غادة

09-15-2025, 05:37 AM

الجزء(16)

اخيرا و الحمدلله اكتمل المبلغ المطلوب لدفع الغرامه وخروج ابو علي من الحجز وكله كان بفضل الله ثم شغل ملاك وعلي البسيط .. يوم شافت الجده اهتمام احفادها بابوهم رجعت لهم نص المبلغ الخاص فيهم وحطت الباقي و دفعوه وطلع ابو علي ..
بعد اسبوع رجعت ام سلطان وعيالها للسعوديه بعد فتره من التغيير و الترفيه عن النفس قبل الدراسه و الكرف مره ثانيه ..
**********************************

حنان: دووم فرحانه وش الطاري
ملاك: يدوم عزك يا عمري انتي ... فرحانه لشيين اولهم طلعت ابوي من الحجز
حنان: الحمدلله على السلامه ... اخيرا قرت عينكم بشوفته
ملاك: الله يسلمك ..اسمعي الثاني و الاهم
حنان: هاتي اشوف
ملاك: نواف ..
حنان: وشفيه جا خطبك
ملاك:لاااا بس شكل النتايج بدت تظهر تخيلي رجع امس وسمعت خالتي تقول غريبه رجعته وهو ما عنده اجازه
حنان:لاااااا... يا حركااات عقبال ما يدق بيتكم ويطلب يدك
ملاك:اميييييين الله يسمع منك ... ما تتصورين شكثر انا فرحاانه بتشقق من الوناسه
حنان:هههههههههه يا حبي لك وانتى مروقه ومستانسه تهبلين
ملاك: يووووه يا حنان ما تتصورين قد اش اعشق هالانسان واتمناه تعبت احلم انه يكون قربي
حنان: بتكمل فرحتك وانتى جمبه انشاءالله
ملاك: انشاءالله يارب

صحيح كلام ملاك ان نواف رجع للخبر مع انه ما وعد اهله برجوعه وماله وقت طويل .. كان تعبان و مو على بعضه فاضطر ياخذ اجازه اضطراري كم يوم ورجع لاهله
*******************************************8
ام نواف بفرح: دام نواف رجع ما بفوت علي الفرصه
مشاعل: ليه وش بتسوين
ام نواف: نسيتي انه خاطب لميس و انا حددت مع امها أقرب اجازه له يجي فيها يملك على لميس و يصير العرس هو اللي بقى لنا
مشاعل: والله فكره حلوه ... قلتي له
ام نواف: بقوله لا قام من النوم و ان وافق كلمت رنا وخبرتها ... يارب يسهل عليه انا ما بيرتاح قلبي لين يتزوج او على الاقل يملك
مشاعل: ماشاءالله العالم كلها بتتزوج حتى هند مدري متى بتملك
ام نواف: الله يوفقهم ..اهم شئ ولدي يستقر
********************************************
داخله جو مع دقات الاغنيه وتستشور شعرها بعد الشور اللي خذته ... دخل سيف وطفى الاغنيه وقفت شمس الاستشوار و التفت عليه
_اهلين خيو كيفك
سيف: شو عندتج تحرقين في هالشعر عازمه احد
شمس:لا مو عازمه احد بس توني متسبحه لا اكثر
سيف: الا شلون ربيعتج مدري وش اسمها نسيت <<< مسوي لي نسى مشاعل
شمس:منهي مشمش ..مشاعل من زمان عنها
سيف: أي مشاعل ...ليش هي مسافره
شمس: لا موجوده بس مدري من فتره ما كلمتها تقريبا اسبوع
سيف: مالتج خاتمه دقي شوفيها يمكن تعبانه او فيها شئ .. هي ما قصرت يوم كنتي بالمستشفى زارتج هناك وبالبيت
شمس: اوك ..بكلمها باتشر
سيف: اقولتج شئ ما تصدقينه صار لي قبل اسبوع
شمس: شو صار
وحكى لها سالفته مع احمد اخو مشاعل اللي صارت له بمحل البلياردو الين ما وصل لبيته
شمس: من جد ... زين ما تهورت اكثر وذبحته كان انا وهي بنفترق
سيف: اقولتج ما صدقت يوم شفت نفس البيت ويوم سالته قال أي ... حسيت اني احلم
شمس: شفت الصدف شلون باتشر اذا كلمتها بقولها اكيد اخوها قالها
سيف: عااد لا تزيدين الموضوع قولي ان اخوي ما كان يدري انه اخوها و وقتها كنت معصب و الاخلاق شينه
شمس: طيب ... الحين ممكن اكمل شغلي
سيف: هاتي انا بسوي لتج تراني خطير بهالامور
شمس: لااااا اخاف تحرق شعري تراه غالي واحبه
سيف: عاادي ينحرق اليوم بعد ساعه نحلقه لتج على الصفر وبعد شهر يطول خخخخخخخخخخخ
شمس: بسم الله علي .. ما ابيك تسوي شئ هات
***********************************************
ابو علي: من صدقك انت تشتغل بمقهى
علي: أي قلت بدل ما اقعد بطالي و الوقت طويل ما عندي شئ اسويه اشتغل احسن لي
ام علي: و الشغل مو عيب
ابو علي: بس مو بياع في مقهى ... انا يوم قالوا لي تشتغل على بالي شغل زين
علي: يبه تدري انا حتى ثانويه ما خلصت انشاءالله السنه الجايه اخر سنه , ما عندي الا شهاده متوسط و الشغل اللي انا فيه مو دايم بس فتره الاجازه
ابو علي: ياخوفي تتعود على هالشغل ويعجبك وقتها عاد تترك الدراسه و تتفرغ له
علي: لا انشاء الله بكمل دراستي و برفع راسكم بالمعدل الزين
ابو علي: نشوف مع اني ما ضنتي انت خلقه فاشل

بعد هالكلمه سكت علي ونزل راسه ضل يفكر بكلام ابوه ياما تمنى أي كلمه حلوه او تشجيع له منه بس للاسف لسانه طول ما تكلم وهو ينتقد او يحطم ... الشغل مو عيب ويحمد ربه ان ولده عقل و صار يحس بالمسؤوليه ويعتمد على نفسه مو كفايه هو نفسه ضايع يبي يضيع عياله بعد .
************************************************** ******
في بيت الجده ام خالد كانت قاعده مع بنتها ساره وحفيدتها عهود ماعندهم شئ غير التلفزيون و ساره على اللاب توب تحوس بالنت
عهود وهي تقلب مرت على قناه مغربيه فيها طبخ ... طلبت ام خالد توقف عندها
عهود: ما نفهم شئ كلامهم معجن
ام خالد: خليه نشوف اكلهم شكله زين ..
عهود: يوووه حطت بصل كثير ... عااد ما احبه
ام خالد: هو حلى الاكل
عهود:الحين لازم بصل في الاكل
ام خالد: أي معضم الاكل الا الحلى وفي اكلات ثانيه بدون
عهود: فاضيه والله اقعد اطبخ الله يخلي المطاعم
ام خالد:لا والله... المطاعم مو دايمه لك عيوني ... والله بكره لا تزوجتي و اعتمدتي على المطاعم ابشري ثاني يوم بحرمه ثانيه في بيتك
يوم سمعت ساره كلمه زواج التفت عليهم وقالت
_ انتى بتتزوجين ؟!
عهود:هههه لا من قال
ام خالد:شفيك اخترعتي ..اقول لو تزوجت وانشاءالله تتزوجين وافرح فيك انتى و الباقي
قالت عهود بنفسها:امين يارب ..الله يسمع منك اليوم قبل بكره
تغيرت ملامح ساره بعد دعوت امها و ضاق صدرها على حالتها المحزنه .. تحس ان كل عيال خواتها بيمشون بحياتهم ويتزوجون الا هي بتقعد في بيت ابوها ولا احد داري عنها .
******************************************
دخلت ام نواف بابتسامه حلوه على ولدها:صح النوم
نواف: هلا يمه ... حياك
ام نواف: هاااه عساك ارتحت
نواف: أي الحمدلله
ام نواف:زين قبل لا تطلع بغيت اقولك شئ
نواف: امري
ام نواف:دامك جيتنا هالايام وما عندك شئ والناس باجازه للحين شرايك تملك على لميس وما يبقى لنا الا العرس
ما تفاجئ نواف من كلام امه لانه كان داري ان جيتها لذا الموضوع .قال ببرود:
_ يمه ليش مستعجله
ام نواف: ابي اتطمن عليك والله اخاف عليك من هالغربه تضيع .. بعدين انت كامل والكامل الله املك الحين ويمديك تجهز البيت و حنا نجهز حفله الزواج ترا منا للعيد باقي وقت ولا شرايك .. عندك كلام ثاني
نواف: لا ما عندي كلام ثاني اللي تشوفينه
ام نواف: ترا الموضوع خاص فيك وهذه حياتك أي شئ في بالك قوله
تنهد نواف وقال بنفسه" وااضح ان الموضوع خاص فيني و الدليل بتزوج غصب"
قال: لا خلاص يصير اللي تبينه
ام نواف: زين الله يوفقك و يسهل عليك يمه وعقبال اخوانك يارب... يالله اخليك بروح اكلم ام لميس واقولها
طلعت ام نواف فرحاااااانه من موافقت ولدها وما تدري انها كل يوم تقتله اكثر وهو يتالم بصمت .. صاير هادي و بارد واحاسيسه ميته تجاه الكل مدري شلون بيكمل حياته ويتزوج ويعيش ... يمكن يتغير بعد الزواج او يمكن يظل نفسه .. غير كذا يمكن ما يصير اللي تبيه امه ويظل مثل ما هو او يتقدم لملاك ويتحقق حلمها..
كلها احتمالات و احداث مو اكيد تصير فقط توقعات .. محد يعرف وش يصير بكرهـ ..
************************************************** **
هند بالمطبخ تقلي السمبوسه اشتهتها ام سلطان وقامت هند سوتها .. دخل سعود
_يمممم في ريحه اكل ومو أي اكل ... لايكون رمضان بكره
هند: لا امس شرايك
سعود:باخذ هذه باكلها
هند: تستخف دمك هذه توها ما انقلت شوفها لينه
سعود:اووووه الجووع اعماني ..خلاص برميها في الزيت
هند: لا ترميها ترا يطش الزيت حطها شوي شوي
سعود: لا تخافين وانا اخوك شوفي المهارات ولا الشيف اسامه
ورمى السمبوسه في الزيت .. وطش على يد هند .. رمت اللي بيدها وصرخت من حرارته
_ااااااااااااااااااااااهـ يدي يا غبي ااااي
سعود بخوف:يووه والله ما ادري ..حطي لها مويه
مسك يدها وهي بعدته عنها :
_وخر عني ... عاجبك اللي سويته
دخلت ام سلطان بعد ما سمعت الصرخه : وشفيك عسى ما شر
هند: ولدك الغبي حرقني ..اااااي
ام سلطان:يووء بسم الله عليك ... روح جيب مرهم الحروق
سعود بتناحه:وين مكانه
ام سلطان: بالصيدليه اللي بالحمام بسرعه تحرك
هند: ااااااااي و الله يعور
بدت عيونها تدمع من الالم و الحراره هذا زيت مو أي شئ
رجع سعود يركض:هاك
ام سلطان:انشاءالله بيخف بعد المرهم
جت هديل وشافت الحادث البسيط اللي صار وشاركتهم عمليه الاسعاف , وبعد ما خلصوا هزئت سعود على جرح لاختها العزيزه
هديل: مو علشانك اخوي وصديقي في هالبيت بسكت هذه اختي العزيزه هند ما ارضى عليها
سعود: قولي قسم ..على بالي العزيزه تريزا ... جايتلي تدافع بعد ..فكيناا زين
هديل: عمتك هديل اذا تكلمت تسكت وتسمعها بدون ما ترد
سعود: عمتى طل ... الا شفيق غسال السيارات
طلعت ام سلطان وهند من المطبخ تاركين المهبل هديل و سعود يتهاوشون ..
ثاني يوم مشاعل جاها اتصال من شمس وردت عليها .. وبين السوالف قالت شمس لمشاعل عن سالفه اخوها سيف واحمد
مشاعل: أي قالي احمد بس ما كنت ادري انه سيف
شمس: الا هو كان وقتها معصب و اخلاقه شينه ...اقوله زين ما ارتكبت جريمه في الولد كان انا وياتج افترقنا
مشاعل: أي صح
وطول المكالمه وبالها مو مع شمس كانت تفكر بسيف وحركته مع احمد تحاول تحلل الموقف هل كان متعمد الحركه ولا ما يدري عن احمد ..
**************************************************
يوم الاربعاء ..الساعه تقريبا 12 الظهر .. رجعت ملاك من دوامها و بعد ماسلمت على امها دخلت غرفتها ترتاح شوي ومن كثر فرحتها برجوع نواف ما جاها النوم قعدت تتسمع في اغاني الحب و تحلم فيه ..
دخلت امها بسرعه وبفرح وعلطول اتجهت لدولاب ملاك حق الملابس , فتحته وكانها تدور على شئ
ملاك تسأل: يمه وش عندك تحوسين بالملابس عندك طلعه ولا شئ
التفت لها بابتسامه على وجهها :لا ادور لك لبس حلووو علشان عزيمه اليوم
ملاك: أي عزيمه ..وش السالفه
التفت عليها مره ثانيه وقالت: ما تدريتي اليوم ملكت نواف
ورجعت للدولاب تدور على لبس لبنتها اللي من لحظه سمعها للخبر واستيعابها للي قاعد يصير اغمى عليها
ام علي : وشرايك بــ
التفت ولقت ملاك طايحه على الارض..صرخت تنادي عيالها
ام علي: ملاك شفيك ...بسم الله عليك يمه وشفيك
علي: وش صاير شفيها ملاك
ام علي: ما ادري وشفيها شغل السياره بناخذها لاقرب مستشفى
وطاروا فيها للمستشفى وهم متازميين من حالتها المفاجئه بلا أي مقدمات
كشف عليها الدكتور و طلع يطمن اهلها
الدكتور: الحمدوولله حالتها كويسه دلوئتي بس تعب وارهاق بسيط مع انخفاض في الضغط .. ركبنالها المغزي << "المغذي" وكلو كم ساعه وتخرج بالسلامه

جلست ام علي على اقرب كرسي لها ودمها متحجر بمكانه مستغربه من طيحه بنتها المفاجئه و خايفه لا يكون السبب في حالتها شئ كبير ... ما رضت ترجع البيت وقعدت بجمب ملاك اللي فاقت بعد دقايق ومنسدحه على السرير بعيون حايره
ام علي: الحمدلله على سلامتك ما تشوفين شر يا الغاليه
علي بابتسامه:خوفتينا عليك ... ما تشوفين شر
حست ملاك انها تحلم وقامت تلتفت حولها تتفحص المكان وسالتهم
_انا بالمستشفى ليش
ام علي: خوفتينا عليك يا بنت ...
قاطعت امها و قالت: نواف وشفيه
ردت ام علي بعفويه ولا تسالت عن سبب هالسؤال :
_مافيه الا العافيه اليوم ملكته وكلنا معزومين عليها عقبالكم يارب
تجمعت الدموع بعيونها و هي تحاول تمسك نفسها عن البكاء قدام اهلها .. ودقات قلبها مرات تتحرك بقوه ومرات توقف , ما ادري وش تحس فيه اندهاش من الخبر اللي سمعته و خوف و انكسار للروح .. ودها تصرخ وتبكي بصوت عالي والناس كلها تسمع وتفهم حبها لنواف .. ما تدري ليش الحظ معاكسها كل ما قالت شئ صار شئ ثاني وكل ما قربت للشئ يبتعد عنها و امورها دايما بلا نهايه ..
********************************************
هي تعبانه و ضايق صدرها من حركه الزمن و غدره .. وهو اكثر منها تعب وضيقه من حالته قاعد حول الناس ببرود وهم رايحين وجايين يجهزون لليله
جاء عبدالرحمن يسال اخوه عن ابوهم
_نواف..ابوي بيجي اليوم
ناظره نواف ببرود وقال
_لا ..كلمته و وافق على كل شئ ..يمكن مشغول
عبدالرحمن: اييي مو شئ جديد ... الشغل عنده اهم من عياله
نواف: عن الهذره الزايده و رح كمل شغلك
نزلت له مشاعل بفرح وقعدت جمبه
_يا حبي لك يا نونو ...اليوم من قدك عريس
اكتفى نواف بابتسامه بارده على جمب
قالت: اسمع مني شويه نصايح علشان تكبر بعين لميس , اذا قعدت جمبها ناظرها بنظرات الاعجاب و بين لها كانها ملكه وانت منبهر من شكلها و جمالها و لا تصير مستحي من اللي حولك اعرف في الملكه كل الحريم حول العريس حتى لو ما يقربون له بس حشره و زحمه زايده .. اوكي وبعد اذا شربتها العصير قولها هني على قلبك
التفت عليها نواف وعلطول سكتت
مشاعل: وشفيك تناظرني ..اكمل
نواف: اقول اذلفي عن وجهي مو ناقصك
مشاعل: وشفيك ياخي هذا جزاي لاني احبك واتمنى لك الخير
نواف: لا يكثر بس
مشاعل: من متى ونواف يهزئ بهدوء ..شكلك تتدرب عن برود الاعصاب علشان تقضي على التوتر حاسه فيك يا اخوي
عطاها نظره قويه خلتها تسكت وتتركه لحاله .. تحت غيمه الكابه اللي حلت عليه .
*******************************************
طول الوقت وام نواف تدور ..تجهز وتسوي ومعها احمد كان انشط واحد فيهم ويحب الفزعات وخاصا اليوم ملكت اخوه لازم راسه يكبر .. بيسوون الملكه في بيت لميس وبتكون بسيطه تقتصر على الاهل من الطرفين و بعض القرايب و الاصدقاء .
************************************************** ********
انواااع الضيقه و القهر اللي عايشتها ساره .. كل بعد دقيقه تتأفف و مكشره وجهها و مرفعه حواجبها
ام خالد: لا اله الا الله ..وشفيك كاره نفسك و الدنيا
ساره: مافيني شئ اووف
عهود: يالله خالتي ما خلصتي نبي نروح للصالون الحين قبل الزحمه
ساره: يختي ازعجتينا تبين تروحين روحي بلحالك
عهود: طيب وشفيك معصبه كذا ما قلت شئ
ساره: كيفي ابي اعصب كييييفي
ام خالد لعهود: خليها يا بنيتي طالعه شياطينها اليوم وما كانه ملكه ولد اختها
ساره: ما يكفيكم حضوري ولا تبوني انط واصرخ من الفرحه ... ملك اليوم مبروك ما تدرون عن بكره يمكن يطلق
ام خالد بعصبيه: فال الله ولا فالك, وش هالكلام اللي تقولينه والله ان سمعتك اختك لا تقص لسانك ..عمى بالحسود
احتقرت عهود حركت خالتها وكلامها , مو علشانها ما توفقت بزواجها تدعي على غيرها وما تتمنى لهم الخير ..
يعني بيوم الفرح والكل مستانس ممكن يكون شخص زعلان ومتضايق و ممكن يكون شخص حاقد وما يتمنى الخير ... اللي قلبه ابيض , ابيض مهما صار واللي قلبه اسود حتى بالفرح شري..
************************************************** **
سيف: على وين الليله اسمع امي تقول معزومين
شمس: ما دريت الليله ملكت نواف اخو مشاعل
سيف:لاااااااا؟! زين والله , هذا اخوها الكبير
شمس: أي اكبر واحد .. عقبال ما نفرح بكبيرنا بعد
سيف: زين من بيوديكم
شمس: اكيد سفرجل ولا مين بعد الا لو تبيني اسوق عطني الليسن وموترك ما اعدمه ابد
سيف: لا لا الا انتى ..خلاص انا بوديكم
شمس: اوكيك ..وشرايك تقعد تبارك لهم وبالمره يطيح الحطب اللي بينك وبين احمد يمكن شايل بقلبه شئ
وكان الفكره عجبت سيف ..قال
_اوكيكيين ليش لا
******************************************
طلعت ملاك من المستشفى على العصر ودرى ابوها بتعبها
ابو علي: اكيد من قله الاكل لايكون مسويه رجيم
ملاك: لا مو مسويه
ابو علي: اجل كلي وتغذي ....
التفت على زوجته وقال
_ اطبخي لهم اكل خلهم يتغذون زين شوفي كل واحد منهم اضعف من الثاني
ام علي: و انت كل ما صارت مشكله حطيتها براسي
ملاك: يمه خلاص , يكفي هواش و كلام كثير
ام علي: اللهم طولك يا روح .. روحي غرفتك ارتاحي على ما يجي وقت الروحه للعزيمه
ابو علي: أي عزيمه , بتطلعون من وراي
ام علي: لا من وراك ولا من قدامك , اليوم ملكت نواف ولد اختى
ابو علي: اهااا وش عندهم اهلك كل بعد فتره ملكه وزواج
ام علي: الله يوفقهم ويبارك لهم بحياتهم
تركت زوجها الغبي بكلامه الفاضي ودخلت لغرفتها ما تبي صداع وتعب زياده اللي فيها كافيها .
************************************************** **
مرت الساعات بسرعه على عكس ما يتمنى نواف و الكل اجتمع من اهل ومعازيم .. بجمب الشيخ كان قاعد نواف وبالجهه الثانيه ابو لميس يوقعون العقد , مسك نواف القلم ويده تهتز وقلبه يرتجف يحس بالجو حار وعيونه ما صار يشوف فيها زين
الشيخ: توكل على الله و وقع
اخيرا وقع وبعدها الكل قام يبارك له ويهنيئ و الرجال حوله يسلمون عليه .. كلمات التهانئ كانها كلمات عزا و مواساه له , هم فرحانين و يضحكون وهو وده يطلع اختنق من الجو و ريحه البخور ..
**********************************************
عند الحريم يسلمون على لميس اللي كانت مثل الورده بفستانها الوردي و الذهبي وميك اب يبين انوثتها و اللي محليها اكثر ابتسامتها و غمازاتها
عهود تهمس للبنات: مو تهبل
هديل: أي ماشاءالله تاخذ العقل.. يا حظ نواف فيها
وقتها ملاك ودها تمسك البنت و تقتلها تخرب عليها كل شئ .. راحوا الكل يسلم عليها الا هي لانها بتتهور ويمكن تتهمها بالحراميه اللي سرقت حبيبها منها وتخرب الليله ...
دخل نواف بعد اصرار امه على لميس علشان يلبسها الشبكه و يصورون مع بعض .. وجهه مكتم وممسوح منه الابتسامه و النور
وقت التصوير وهم بجمب بعض مشاعل تاشر له علشان يبتسم شوي و جاملها و ابتسم من دون نفس ..
ملاك اللي ما قدرت تتحمل اللي تشوفه تركتهم وراحت للحمام تبكي وتطلع اللي في قلبها ..وبهاللحظه ساره رجعت بها الذكرى يوم كانت مكان لميس وبجمب مشاري والدنيا موشايلتها من الفرح ... ما صدقت ان الايام مرت و تطلقت من مشاري ورجعت لحالتها الاولى من الوحده و الملل.
**************************************************
عند الرجال ..
احمد اسعد واحد ومن عيونه واضحه السعاده و الراحه .. شافه سيف واتجه له
سيف: السلام عليكم ...
تفاجئ بجيته ورد السلام
سيف: الف مبروك على نواف
احمد: الله يبارك فيك
سيف: شلونك بعد ذاك اليوم ..اعذرني كنت معصب و اخلاقي شينه ما دريت ان خواتنا صديقات
احمد: هههه لا عادي ما صار بينا شئ ... فرصه سعيده تعرفت عليك
سيف: وانا اسعد ... يالله اخليك الحين اشوفك على خير
احمد: خذ راحتك ..حياك

***********************************************
رمزت بحرف حرماني على صدر الألم ليتك
تحس بلوعه المجروح يوم انك تجاهلته
كتبت اخر قصيده حب "بحر خداع" سميته
انا العطشان و اغراني سراب لاح ما طلته
********************************************
ثاني يوم من الصبح طفت ملاك جوالها ما تبي تكلم أي احد ولا تسمع أي شئ ... طول وقتها قاعده بغرفتها تندب حظها و كل ما تذكرت اللي صار بالامس وصوره نواف وهو قرب لميس ينقبض قلبها اكثر والدنيا بعينها مظلمه وقاسيه الكل شايل نفسه يفرح لنفسه ناسي ان في غيره يتعذب و مجروح .
*******************************************
هند وهديل وامهم قاعدات بالصاله يتقهوون و يحللون اللي صار امس
هديل: شفتوا هذيك اللي لابسه احمر ...فستانها خطيررررر
ام سلطان: أي يقولون اخت لميس... ما شاءالله عليهم كل وحده احلى من الثانيه
هند: بس نواف متغيير شكله مدري وشفيه
هديل: يمكن مستحي , ومرتبك
ام سلطان: الله يوفقهم كانت ليله حلوه
هديل: أي والله دايم عزايم خالتي عبير حلوه ولها طعم
ام سلطان: لانها طيبه وعلى نياتها ربي يوفقها .. ما تتكلف ولا تحب المظاهر ابسط شئ تسويه يطلع حلو بعين الكل .. هذا الانسان الطيب ربي يوفقه اما اللي قلبه اسود لو شرا اغلى و واحلى الاشياء ما بيتوفق و بيظل بسواد قلبه .
هند: وانتي الصادقه يمه ..
هديل: طيب وهند متى تملك
ام سلطان: قررنا قبل الزواج بفتره قصيره لاني ما احب فتره الملكه تكون طويله
هديل: ومتى الزواج؟
ام سلطان: في الاجازه بين الترمين والملكه قبلها
هديل: يووووخ باقي كثير
هند: احسن يكون خلصت لان باقي لي ترم واحد
ام سلطان: وبعدين تعالي كان الموضوع لاختك .. واسئلتك يا كثرها
هديل:خخخخخخخخ ابي اعرف وبس ... دامه الموضوع خاص باختي انشاءالله بيكون احلى عرس وبقوم وبقعد عليه
هند: ههههههه فديتك والله
ام سلطان بابتسامه : الله يخليكم لبعض .. زين يا هند عندك اختك شيطانيه تاخذ حقك وتخاف عليك اكثر منك
هديل: احم ... اعجبكم
*************************************************
طلعت من المطبخ بصينيه فيها قهوه تركيه لها ولامها .. يوم شافها فهد شهق وفتح عيونه
قال: يوووء ساحره زي اللي في التماثيل السوريه ...
مشاعل: أي بسحرك واخليك واحد دبي ما تدخل مع الباب
فهد: اتحداااك لو انك رجاله تسوينها
مشاعل:ههههههههههه رجاله بعينك ..طير مناك شف دحوم ينتظرك عند المسبح
وقعدت مع امها يتقهوون ويعدلون المزاج .. نزل نواف وقعد معهم بصمت
ام نواف: شلونك بعد امس
نواف: تمام
مشاعل: تبي قهوه تركيه ترا حلوه من ايدي
نواف: لا ما ابي مشكوره
التفت ام نواف على بنتها وتتسال وش فيه نواف يتكلم من طرف خشمه
ام نواف: نواف وشفيك
نواف: مافيني شئ
مشاعل: شكله رافع خشمه علينا بعد ما ملك من قده الاخ
ام نواف: لا ولدي ما يسويها ما يرفع خشمه على اهله .. بنت خلي اخوك بحاله
نواف: وين احمد؟!
ام نواف: للحين نايم مسكين امس ما قعد لين بعد الفجر
مشاعل: ههههه شفته امس كانه ابو المعرس
تنهدت ام نواف وقالت: كلمت ابوك
نواف: أي من قبل امس كلمته بارك لي ويسلم على اخواني
ام نواف: زين ..لا تقطعونه في الايام العاديه و المناسبات لازم تسالون عنه و يدري بكل شئ يصير لكم
تذكرت مشاعل شئ وطلعت جوالها
_ نواف .. ترا رقم لميس عندي ما تبيه
نواف: نعم !! وليش ذا السؤال
مشاعل: مو لشئ بس خذيته مو هي صارت زوجه اخوي .. افتح جوالك خذه
فتح عيونه وقال: من جدك انتى
مشاعل: أي علشان تسلم عليها وتطمن ولا ما تبي تسمع صوتها
نواف: اوووف ..طيب هاتي
ام نواف: يا حليلها لميس امس طالعه قمر ماشاءالله عليها مرره تجنن
مشاعل: تجنن وبس العالم خق عليها ...فستانها نعوم لايق عليها
ام نواف: حتى نواف كان رزه و يهبل ...شكلك وانت جمبها انما اييه ..ولدي اعرفه امير
مشاعل:ههههههههههه اوخص يا نونو امي تمدحك ... وحنا سفطه على جمب
ام نواف: من قال انتى سفطه ...انتى بس تزوجي وبتشوفين الدلع شلون
مشاعل:احم ..احم
نواف: خلاص بيتقطع حلقتك
ام نواف +مشاعل:ههههههههههههههههههه ه
ام نواف: متى بتسافر
نواف: الثلاثاء برجع للشغل
ام نواف: الله يعينك
التفت لمشاعل وقالت: هاتي التلفون بكلم امي اسلم عليها .
دقت ارقام امها وبدت تسولف وهذره معها ..نواف قام بدل ملابسه وطلع برا البيت يغير جو , اما مشاعل طلعت تسبح مع اخوانها .