منتديات كلك غلا - عرض مشاركة واحدة - أبيك في درب المحبة تخاويني للكاتبة الدكتورة غادة

09-15-2025, 05:32 AM

الجزء(15)

دخل علي البيت وهو ينادي على امه باعلى صوت , طلعت ام علي مخترعه لا يكون صار شئ
_ وشفيك تصارخ خير انشاءالله
علي: باركي لي لقيت شغل براتب زين
ام علي بفرح: مبرووووك ... الف مبروك يا علي وين لقيته
علي: بشتغل في ستار بكس اللي بالظهران مول
ام علي: زييين اهم شئ تقضي وقتك
علي: واساعدكم بعد .. وين ملاك بروح ابشرها
ام علي: بغرفتها نايمه
طلعت يوم سمعت اسمها
_ انا هنا توني قمت
علي: باركيلي اشتغلت
ملاك: مبرووك يا موظف .ههههههههههه
علي : الله يبارك فيك ... وانشاءالله بالفلوس اللي اخذها من الشغل ندفع غرامه السيارات ويطلع ابوي
ملاك: ذكرتني انا بعد اليوم استلمت راتبي وسحبته
دخلت لغرفتها طلعت الفلوس من شنطتها وعطها لامها
_هاك يمه ادري ما تكفي بس تغطي شوي
دمعت عيون ام علي لحاله عيالها و هدايه علي..قالت بصوت مبحوح : الله يبارك لكم في حياتكم و يوفقكم
ملاك: ليش تبكين حتى بالفرح دموعك قريبه ... خلاص يا الغاليه ترا ما يسوى
علي: افااا تبكين وانا جايب لكم الاخبار الزينه ... انا اشم ريحه حلوه من المطبخ
ام علي: أي سويت لكم كيك ..ذاك اللي تحبونه
علي: والله!! تسلم يدينك ...بروح اهجم عليه

بعد مراهقت علي و تمرده في البيت اخيرا عقل وصار يعرف ان الدنيا مو لعب و على كيفه ..هذا هو شد على نفسه و صار مسؤول ودور على وظيفه بسيطه يملي فراغه في الصيف الا ان تبدا الدراسه ..ومنها يساعد اهله ويساهم في دفع الغرامه اللي هو سببها ..
********************************************

فتحت باب غرفتها ولقت عهود ماسكه جوالها وبجمبها الدرج مفتوح
مشاعل تسحبه منها بقوه وتقول: من سمح لك تاخذينه
تفاجئت عهود من اسلوبها القوي : وشفيك ابي اشوف الرسايل اللي عندك
مشاعل: جوالي مالك حق تمدين يدك علي ... تبين شئ قولي لي وانا اعطيك
عهود: مشاعل!! وشفيك معصبه ترا مو اول مره اخذ جوالك
مشاعل: هذاك اول عادي تاخذينه بس الحين لا
ابتسمت عهود ابتسامه على الجمب وغمزت لها وقالت: هاااااه وشعندك تخبين علي ..اعترفي
مشاعل: ما عندي شئ .وجوالي لعد تاخذينه بدون علمي ..زين
مرت ام نواف وسمعت اصواتهم ..دخلت غرفه مشاعل تستفسر
_ وش صاير اصواتكم طالعه برا
عهود: مدري وشفيها عصبت علي يوم خذيت جوالها
مشاعل: مو من حق احد يفتش جوالي من غير علمي ..
ام نواف: اخبركم عادي جوالاتكم مع بعض وش الجديد الحين
مشاعل: هذاك اول اما الحين لا ... مو بس جوالي حتى غرفتي كلها ما ابي احد يفتش فيها انا اخواني وانتى ما تفتشون فيها علشان تجي هذه تفتش " واشرت على عهود" ثم طلعت
استغربت عهود وام نواف من عصبيه مشاعل و كلامها مو من عوايدها تهزئ بذي الطريقه
قالت ام نواف تهدي عهود: يمكن تعبانه او متضايقه ما عليك منها شوي وترجع مثل اول
بعد ما طلعت ام نواف جلست عهود وهي زعلانه وماخذه على خاطرها من كلام بنت عمتها ... وحست بالفعل انها مضايقه عليهم و طفشوا من وجودها بينهم ... خذت جوالها ودقت على ابوها يجي ياخذها لبيت جدتها و على السريع لمت اغراضها بدون علم احد في البيت..
احمد: ما سمعت الاقامه ..
نواف: الا الحين بقوم
احمد: وشفيك متضايق و واصله معك
نواف: مافيني شئ ..اووف
قام ودخل الحمام وسكر الباب بقوه ..
احمد: وشفيه ذا معصب ما قلت شئ وفار علي
استغرب من نواف وقعده على السرير يفكر وتاخره على المسجد مع انه اول واحد يطلع يصلي الا هالمره ولا كانه يسمع الاذان ..

************************************************** *******
الجده"ام خالد" تطلب من شغالتها تنظف وحده من الغرف الفاضيه
ساره: ليش في احد بيجي
ام خالد: أي عهود راح اخوك يجيبها
ساره: غريبه مو هي قاعده عند عبير وش يجيبها
ام خالد: مدري عنها كلمته وقالت له يجي ياخذها بعد الصلاه بيمرها
ساره: اييي تلاقينهم ملوا منها ومن لقافتها ... قاعده في بيت الناس احترمي نفسك الا تقط نفسها بكل شئ ,,الله يعينا
ام خالد: مسكينه البنت مالها احد امها تركتها وراحت و ابوها مابيكون نفس حنان الام .
ساره: لها الله ..هي تبطل خبالها وتكون بخير ...يمه شرايك نطلع نتعشى برا ما مليتي من القعده
ام خالد: والله فكره زينه وبعد نمر علي نوره وعيالها نفرحهم دام ولدها علي اشتغل
ساره: يوووووووهـ هذا اللي ما ابي نوره في كل شئ تدخل لا بالحزن ولا بالفرح ... وبعدين أي شغل اللي اشتغله علي
ام خالد: لقى له وظيفه بوحده من المقاهي احسن من دوارته بالشوارع
ساره: أي زين ..بس محنا ماريين احد , مو كل مره بنطلع الا ونمر على احد
ام خالد: تبين تستانسين خلي غيرك يستانس .. بيقعدون على قلبك
ساره: وانشاءالله من اللي بيدفع العشاء
ام خالد: انا ادفعه لا تخافين ...
ساره: طيب ..كلميهم قولي لهم بعد ساعه يكونون جاهزين
************************************************** ******
ابو عبدالله: السلام عليكم
عبدالرحمن: وعليكم السلام ..هلا خالي حياك
حيت ام نواف اخوها وعلى بالها جاي يسلم لا اكثر بس شوي نزلت عهود مع اغراضها
ام نواف مستغربه: عهود على وين
عهود ببرود: بروح بيت جدتي
ام نواف: افاااا ليش .. يا بنتي اقعدي كملي الاجازه عندنا سهر و وناسه مع مشاعل
سكتت عهود ما تكلمت وقال ابوها
_ ما ودنا نثقل عليكم ... الفتره اللي قعدت فيها كافيه المره الجايه انشاءالله
حست ام نواف ان عهود زعلانه وماخذه على خاطرها من كلام مشاعل واسلوبها القوي
ابو عبدالله: يالله انا استاذن سلمي على نواف و اخوانه
ام نواف: انشاءالله ... مع السلامه

واول ما طلعوا من البيت راحت للحديقه كانت مشاعل قاعده فيها
ام نواف: عاجبك اللي سويتيه
مشاعل: وشو
ام نواف: البنت زعلت من كلامك و كلمت ابوها جا خذاها
مشاعل ببرود: انا ما قلت شئ يزعل كلامي صح ..اغراضي ما ابي احد يفتشها.. حلووه والله ناس تزعل من الصدق ولا تبيني اقولها تفضلي الغرفه كلها فتشي و حوسي على كيفك
ام نواف: بس اسلوبك معها كان قوي ... البنت ما توقعتها منك وانتى اقرب وحده لها , هذه هي راحت حتى ما شفتيها او سلمتي عليها
مشاعل: الجيات اكثر
ام نواف: معصبه وتطلعين حرتك فينا ..خير انشاءالله
مشاعل: طبيعي بعصب طفش و زهق كل يوم نفس اللي قبله وما تبوني اعصب ... ودامي معصبه ليش تكلموني خلوني بروحي
احمد كان توه راجع من المسجد ..
_السلام عليكم
الكل: وعليكم السلام
احمد: وشفيها معصبه العالم كله معصب اليوم وش السالفه
ام نواف: مدري عنها طالعه شياطينها تنافخ على كل صغيره و كبيره
احمد: حتى نواف معصب ومو على بعضه ...وش ما كلين او وش شامين
ام نواف: اخوك فيه شئ
احمد: مدري عنه ... يالله يرد علي و متغيير عن اول
ام نواف: بروح اشوفه .. وش قصه الاخلاق الشينه هذه
احمد: وين عهود روحي اقعدي معها يمكن تهدين
ناظرته مشاعل وعيونها فيها شرار
احمد: بسم الله الرحمن الرحيم ..والله ولا عيون انسان ..كنك شيطان مقعد
مشاعل: احمد ترا مو فاضيه لك ... وخر عني احسلك
احمد: طيب طيب يا ابو عنتر لا تنفجرين بس

بعد ما راح الكل وتركوها بحالها .. ظلت تفكر وتحس بتانيب الضمير على عصبيتها لعهود واهلها وانهم مالهم ذنب باللي هي فيه ..كانت معصبه من سيف وسخافته و اعصابها متوتره .. وخايفه و الافكار الشيطانيه تجيها وتروح ..مرات تقول ان شمس لها يد بالموضوع ومرات تقول انها ما تدري عن اخوها ..كل اللي بداخلها انعكس على تصرفاتها مع اللي حولها.
يعني سيف لا ارتاح ودايم يفكر فيها .. ولا مشاعل ارتاحت ودايم تفكر فيه ..
************************************************** **

ام نواف: شفيك يمه وش متضايق منه
نواف: مافيني شئ ..انتوا اللي شفيكم كل ما شافني احد سالني
ام نواف: طيب ليش تنافخ انا اكلمك بالطيب
نواف: ما ابي اتكلم طيب .. انا طالع

طلع من البيت بكبره تارك امه في حيرتها من حالت عيالها و عصبيتهم الغريبه ... و اخذ يدور بالشوارع ما يدري وين يروح ... حتى ما فكر يكلم صديقه حسين او ولد خالته سلطان .. ضاايق صدره مررره و يحس انه بيختنق ..اخرتها مسك خط جسر البحرين وراح هناك بدون أي تفكير .
***********************************************
في السياره
ابو عبدالله: غريبه تبين تقعدين عند جدتك وانتى من اول طلبتي تقعدين عند مشاعل
عهود: ما ابي اثقل عليهم
ابو عبدالله: ليش صاير بينكم شئ
عهود: لا
ابو عبدالله:اسمعي ترا محد بيتحملك غير امك وابوك وامك مو معك يعني مالك الا انا ... الناس يالله تتحمل نفسها مو مستعده لغيرها .. ولازم تعرفين بهالدنيا ان في حدود ما تتعدينها سواء كان مع أي شخص قريب لك او بعيد .
عهود تتنهد بعد كلام ابوها وقالت: انشاءالله
ابو عبدالله: يالله وصلنا ..خلي اغراضك انا بنزلها
نزلت ودخلت بيت جدتها لقت خالتها ساره نازله من الدرج بعبايتها ..وبعد السلام
ساره: يالله امشي معنا طالعين نتعشى برا
عهود: طيب بس ادخل اغراضي للغرفه
شافت جدتها وسلمت عليها وبعد كذا طلعوا لبيت ام علي ياخذونها مع عيالها ويروحون للمطعم .

************************************************** ***
مرت الايام وسيف بمشاعره المتضاربه و توتره بعد فعلته مع مشاعل .. ومشاعل نفش الشئ خايفه و افكارها توديها وتجيبها ..
سافر نواف ورجع لشغله كالعاده بروح متغييره مررره عن قبل وباسلوب غير مع الكل حتى مع اقرب اصدقاءه "حسين"
داخل الشقه في ماليزيا , طلع حسين بصحن ساندويتشات سواها بيدينه له ولنواف
حسين: يالله مد ايدك وكل .. وجهك اصفر وصاير كنك في مجاعه
نواف: ما اشتهي كل انت
حسين: اقول عن الدلع وكل ربي جسمك وعضامك
نواف: اووووف
حسين: شفيك منت على بعضك من اول ما بدينا الشغل ,, ترا كلنا ما شبعنا من الاجازه بس وش نسوي هذا الشغل
نواف: مو سالفه اجازه او شئ ..تخيل امي تبي تزوجني
حسين: مبررررررررررروك عقبالنا
نواف: بس انا ما ابي ..رافض هالشئ وبقوه... رافض البنت ورافض فكره الزواج اصلا
حسين: ليش فيها شئ مو عاجبتك
نواف: البنت ما فيها شئ بس انا ما ابيها ولا ابي اتزوج الحين
حسين: طيب وش يمنعك وظيفه والحمدلله متوظف و رجال الكل يتمناه خلاص توكل على الله
نواف: اوووف
حسين: طيب قلت لامك انك ما تبيها وما تبي تتزوج
نواف: قلت وصرخت في النهايه زعلت .. مو بيدي شئ وافقت علشانها بس
حسين: والله مدري وش اقولك ... هونها وتهون
************************************************** **
في مصر ...
سعود: اليوم نبي السينما في فلم لهنيدي
ام سلطان: وووع يا شينه ذا الانسان اليوم بنروح السوق بلا هنيدي و بنغالي
هند: أي نبي السوق
هديل: لا السينما .. السوق لاحقين عليه
سعود: ترا من جينا وانتوا سوق ..سوق و في الخبر سوق سوق خلاااااص ارحموا نفسكم
هديل: وشرايكم انا وسعود نروح السينما وانتوا روحوا سوقكم
سعود: أي احسن بعد
ام سلطان: لا اخاف تضيعون ولا يخطفكم احد
سعود: ما عليك هنا الامبراطور سعود ولد ابو سلطان اعجبك
هند: ارحمنا يا الامبراطور
ام سلطان: ولو ..تعالوا معنا السوق والسينما مره ثانيه
هديل: يمه .. هذا فلم ما ينعاد الا بعدين , الله يخليك يمه نبي السينما
ام سلطان: طيب ... بس انتبهوا لنفسكم و من السينما للبيت علطول بدون لف و دوران
هديل و سعود يناظرون بعض : انشاءالله
طلعوا مع بعض هديل وسعود راحوا للسينما و ام سلطان وهند وعلي للسوق ...
في وسط الزحمه و القلق ناس منا تشتري وناس تبيع كنهم بحراج ..
هند وامها يمشون الا مر بجمبها واحد يركض جاي من بعيد و خطف شنطتها
من الصدمه وقفت وصرخت : شنطتي ..شنطتي
ام سلطان ما كانت اقل منها خوف: حراامي الشنطه خطفها
والتفتوا حولهم يبون أي احد يساعدهم لاكن الكل مشغول يشتري ولا احد يمهم , انتبه لهم واحد شكله خليجي قال:
_ وانتى صاحيه تمشين في مصر جذي بدون ما تيودين شنطتج زين.. محد يقدر يلحقه خلاص راح يعوضتج ربي
هند وشوي بتبكي اول مره تكون بموقف مثل هذا
_ الله يحرق قلبه ولا يوفقه يارب يموت قبل لا يوصل لبيته حيوان
ام سلطان: حسبي الله عليه من ولد ... جعله بالضربه ..كم فيها شنطك عسى مو كثير
هند: فيها 100 ريال وجوالي و عطري ذاك الزين
ام سلطان: حسبي الله عليه ... مالك الا تدعين عليه هالحقير امشي نكمل بس الوقت يمشي علينا و كل شئ بيرجع لك انشاءالله
*************************************************
شمس اول ما ردت مشاعل رحبت فيها باحلى ترحيب
_ عاش من سمع هالصوت ...شحالتج يا الغاليه
مشاعل ببرود: هلا بك ..انا الحمدلله بخير انتى شلونك
شمس: منيحه ..ابشرتج رجعت للخبر امس
مشاعل: الحمدلله على السلامه شلون اهلك في الامارات
شمس: كلهم بخير و بنات خوالي يسلمون عليتج
مشاعل: الله يسلمهم
شمس: زين يا قلبي حبيت اسلم عليتج ولو انتج قاطعه ..وسلمي على الوالده
مشاعل: الله يسلمك
شمس: اشوفتج على خير..مع السلامه
مشاعل: باي

سكرت منها و تمدت على الكنبه تفكر " شفيني يالله اتكلم معها وهي اعز صديقاتي واقربهم و الانسانه الوحيده اللي اثق فيها .. يمكن مالها دخل بسالفه سيف وهو اللي خذا الرقم بدون علمها ..ويمكن لها دخل وهي اللي عطته , بس شمس ما تسويها اعرفها لا ما تسوي هالشئ ... استغفر الله العظيم ..خلاص يكفي شكوك في البنت اهم شئ اني صديته وكل شئ راح يبان في الايام الجايه"
*****************************************
في الظهران مول , علي يشتغل بالكوفي شوب بكل راحه , كان اللي معه واحد طيب و متعاون علشان كذا ماشيين مع بعض , جت بنت بتطلب منه
علي: تفضلي اختي
البنت: مساء الخير
علي: مساء النور تفضلي
البنت: اثنين كابتشينو ..الحجم العادي
علي: اوكي 20 ريال
وبعد ما جهز طلبها وسلمها الكوفي مدت له واحد
_ هذا لك عزمتك عليه
متفاجئ علي من حركتها الوقحه: نعم !!
البنت: شفيك مستغرب هذا لك وبليز لا تردني
علي: مشكوره بس انا ما ابي
البنت بدلع: افااااا ترد ريمي ..
علي متضايق منها : مشكوره بالعافيه عليك
شافه صديقه "محمد" بوضع محرج وكان يعرف يتفاهم مع هالنوع من البنات جاء وخذاه بابتسامه
_تسلمين والله
بعد ما راحت قال علي: وش قله الادب ذي اللي ترمي نفسها علي
محمد: مشي ياخي هذولا هم صاروا يمشون وراك و غصب تلزق ...اذا مرت عليك وحده مثل ذي خذ الشئ و ارميه بعد ما تروح
علي: والله خووش تطورنا
محمد: ههههههه يا حليلك توك ما شفت شئ

وهو صادق محمد ما شاف شئ ... حركه البنت بسيطه وتهون عن غيرها من الحركات الثانيه .
************************************************** **
طلعوا سلطان و احمد يلعبون بلياردو في احد الاماكن الخاصه بتجمع الشباب ... وداخلين جو مع اللعبه و كل واحد يتوعد الثاني بالهزيمه , في نفس المكان كان سيف ومهند يلعبون
فاز مهند على سيف : ياهووووو كذا اللعب ولا بلاش معك الفنان
سيف: مبرووك تراني اليوم مو شئ احمدربك لو اني مروق كان هزمتك انت و هالشله اللي حولك
مهند: أي نشوف المره الجايه
وقعد سيف يشرب له عصير وكمل مهند اللعب مع غيره ... وبالغلط كان احمد ماشي من جمب سيف و ضرب بالكاس طاح وانكسر
احمد: العذر و السموحه يا اخوي
سيف يناظره بنص عين: الله يخلي لي عيوني
احمد: نعم !!
سيف يعلي صوته ويرفع راسه: قلت الله يخلي لي عيوني ... ما فهمت وش قلت
احمد: الا فهمت ليه وشايفني باكستاني البقاله
سيف: مدري عنك انت احكم
احمد: اقول احترم نفسك
شاف سلطان الجو تكهرب وقرب منهم
_ هيه شباب ما صار الا خير انكسر الشر
احمد: شفته شلون نافخ صدره مدري على وشو
سيف: أي انفخ واصرخ عندك شئ
مهند: سيف وشفيك طاير علشان شئ بسيط اذكروا الله
الكل: لا اله الا الله
سلطان: يالله مشينا
مشى احمد وهو يناظر سيف من فوق لتحت وسيف نفس الشئ يبادله النظرات وكل واحد عيونه طالعه منها شرار
عند الباب صرخ سيف
_انتبه الباب
لف احمد وعطاه نظره اقوى من اللي قبل ورجع له
_اقوول هيه ترا مصختها انت و وجهك وبعدين يعني تبيني اعلمك شلون تتعامل معي
وقف سيف: ومن حضرتك علشان تعلمني ... ورني عرض اكتافك اشوف
كل من سلطان و مهند حاولوا يهدون الموقف ومسكوا احمد وسيف بعدوهم عن بعض
سلطان يهمس لاحمد: والله ما يستاهل نظره منك امش فكنا
احمد: مثل ما قال ما تستاهل نظره مني
وطلع خلا له المكان لاكن سيف مع عصبيته الزايده طلع لحقه ومهند وراه ..
مهند: اقصر الشر يا سيف خلاص انتهينا
سيف: لا ما انتهينا انا اعرف كيف اادبه الكلب
وركب سيارته لحق احمد وسلطان ...
في سيارتهم
احمد: كان خليتني عليه هالحيوان انتف شنبه اللي باز فيه
سلطان: هدي اعصابك والله واحد مثله ما يستاهل شئ ... انت اعلى من كذا
ناظر سلطان من المرايه يشوف السيارات اللي وراه علشان يلف وبالصدفه لمح سياره سيف ومهند
سلطان: يووووووه ... ربي بلانا بواحد عربجي شفه ورانا
التفت احمد: زين .. علشان اعرف اتفاهم معه زين .. وقف على جمب
سلطان : اقوووول اعقل وانا خييك وش اللي اوقف ... خل الليله تعدي على خير
احمد: بتعدي على خير ان قتلت هالحشره
سلطان: استغفر الله ... مانيب موقف طيب
احمد: اوكي بيلحقنا و بتوقف عند البيت وانزل له الكلب

ظل سيف ورا سياره سلطان من شارع لشارع ومن لفه للفه وهو متوعد في احمد لا يوريه الشغل زين , كان معصب و واصله معه الاخلاق فاي شخص قدامه يطلع حرته فيه وما يدري ان احمد اخو مشاعل ولا لاحظ الشبهه بينهم .
مهند ومل من الحاله: اووف خلاص ياخي فكنا وين حنا فيه تنتقم منه لشئ بسيط
سيف: اذا مو عاجبك انزل .. انا اليوم فيني شئ ابي اطلعه هالنتفه اللي قدامك لاوريه نجوم القايله
مهند: خير انشاءالله معصب ومتضايق من نفسك تطلع حرتك في غيرك ..سلاماااات
سيف: الله لا يسلمكم زين ..
حس مهند بقوه الرد و تضايق من اسلوب سيف , ما نزل وحب يكون مع سيف يشوف وش نهايتها لانه مجنون ممكن يسوي أي شئ اذا عصب.
************************************************** **
رجعوا للشقه و الكل فرحان الا هند ضايق صدرها على شنطها المسروقه
هديل: وشفيها هنووده متضايقه لايكون شفتي شئ حلو وماشريتيه اعرفك
سعود: أي والله وشفيك مبرطمه خيتووو
هند: شنطتي انسرقت
هديل+سعود: ااااااااااااش ..احلفي !!
هديل: شلون انسرقت؟
سعود: وين انسرقت؟
هند: كنا نمشى بالسوق الا جا واحد طاير وخطف الشنطه وفيها فلوسي والجوال وعطري
هديل وسعود فيهم الضحكه على شكل اختهم ..
هديل: كم فيها
هند:100...المشكله عطري ذاك ابيه
سعود: اشتري غيره
هند:قديم يالله القاه...الله يقطع يدينه هالحرامي
سعود: كان ركضتي وراه
هديل: أي والله وصرختي تعالا يا ولا تعالا
الكل ضحك حتى هند اللي متضايقه ضحكت من اسلوب اختها
ام سلطان : ادعي عليه وربي مابيضيع حقك
************************************************** *******
حسين له دقيقتين وهو يدخل غرفه نواف يصحيه من النوم ولا يقوم ..
حسين: نواااف ..نوااف قوم ما صارت نومه قوم صلي
نواف:همممم ..خلاص اطلع بقوم الحين
حسين: منب طالع الين ما تقوم .. لا تفوت الصلاه اهم شئ
نواف:لا حوووووول خلاص قلت لك بقوم
حسين: طيب قوم اقعد على السرير ابي اشوفك
نواف وهو قايم :هاه قمت خير
حسين: قم صلي
نواف: طيب اطلع اول فكني ياخي
حسين: طلعه منب طالع ..قوم <<< قالها بصراخ
وسمع له نواف وقام للحمام
حسين: ناس ما تجي الا بالعين الحمرا...لا تطول بسرعه ورانا طلعه

طول الفتره اللي هم بماليزيا كانت علاقه نواف بحسين متغيره كلها هواش و صراخ من قبل نواف ومرات برود وكسل .. احتار حسين بامره واستغرب من اسلوبه الجديد ما صار نواف الاولي اللي يضحك ويمزح وراعي سوالف و وناسه .

************************************************** *****
وصلوا لبيت احمد وقف سلطان , نزل احمد بسرعه علشان يستقبل سيف ويتفاهم معه... اما سيف اول ما لف وراهم شاف ان الحي مو غريب عليه و صفت البيوت قد مر من قدامها بدا يخفف السرعه ويتلفت كانه يدور على شئ
مهند لاحظه وقال: وشفيك
سيف:لحظه ..هالشارع مو غريب علي مره جيته
يوم التفت لمكان سياره سلطان وقرب منها شاف احمد واقف عند باب بيتهم ومكتف يده ينتظره ينزل وسلطان بالسياره ما تحرك يبي يشوف نهايتها مع هالاثنين المجانيين
سيف يكلم نفسه بصوت شبه مسموع: وين ياربي وين
ومهند يناظره باستغراب الين ما اخترع من شهقت سيف
_معقوله ..لا مستحيل
مهند:وشفيك خوفتني
سيف:لحظه شوي
ونزل لعند احمد ..مهند يصرخ عليه: سيف ارجع تعوذ من ابليس
سلطان وهو في سيارته يتمتم: الله يستر وفتح الباب مستعد للنزول
قرب سيف من احمد بهدوء وقال
_هذا بيتك
احمد: لا بيت الجيران وشرايك يعني
سيف: لا ولا شئ ...
ناظره بهدوء وراح , وقتها ارتاح مهند وسلطان من هدوء اعصابهم , ركب سيف السياره دعس على البنزين ومشى بسرعه والكل مستغرب من حركته وتغييره المفاجئ
وسلطان بعد ما تطمن على الموقف مشى لبيته ودخل احمد يرتاح .
في السياره..
مهند: أي قولي وشفيك
سيف: تخيل هذا بيت مشاعل
مهند:نعم !! من جدك انت
سيف: أي والله بيتها تخيل بس..اذكر مره وديت اختي لها هو نفس البيت ونفس الباب ونفس كل شئ
مهند: زين ما تهورت اكثر ... يعني هذا اخوها
سيف: اكيييد...الله يقطع الشيطان يا شييخ
مهند: الف الحمدلله انه اخوها ولا كان ارتكبت فيه جريمه .. كل هدوء الاعصاب ذا علشان الشئ يخص الحبيبه
سيف: هذه مشاعل مو أي شئ
مهند : اوووخص وش ذا التطور هع هع ... كل ذا حب هذا وهي صادتك اجل شلون لا حبتك ..اااهـ منك يا حب عذبت قلوب الناس.