منتديات كلك غلا - عرض مشاركة واحدة - أبيك في درب المحبة تخاويني للكاتبة الدكتورة غادة

09-15-2025, 05:22 AM

الجزء(14)

في بيت الجده ام خالد كانت قاعده مع ولدها ويتكلمون بسالفه علي و تصريفات ابوه عن دفع الغرامه اللي عليه
ام خالد: والحل الحين ... هو ما يستحي على وجهه بهالحركات اللي يسويها
ابو عبدالله: قلتيها ما يستحي على وجهه وبعد اخر مره كلمته وقالي ماعندي فلوس انتوا ادفعوها وانا بعدين ارجع لكم فلوسكم .طااح من عيني وقال كلامه غيره ...
ام خالد: الله يعين اهله عليه ..واذا ما دفع وش نسوي
ابو عبدالله: محنا مسوين شئ ... يكفي يوم طلعنا ولده لامنا وقال ليش طلعتوه كان خليتوه يخيس ..يكفي اذا سوينا لهم معروف نكروه ..خلاص الشرطه تتفاهم معه وتوقفه عند حده ان ما دفع اللي عليه بيسجنونه
ام خالد: لا حول ولا قوه الا بالله ...ما يصير والله ما يصير وعياله وش يسوون
ابو عبدالله: والله الدنيا ما ترحم ..هو ما احترم نفسه من الاول خليه يستاهل اللي يجيه انا شلت يدي من كل شئ يخصه ..
توه خلص ابو عبدالله كلامه الا دق الجرس ودخلت ام علي و ولدها علي ووجها متغيره ملامحه
ام خالد: بسم الله ..خير انشاءالله وشفيك
ام علي بصوت شوي وتبكي: الشرطه خذت ابو علي من البــ....... ما قدرت تمسك نفسها وبدت تبكي
ام خالد: لا حول ولا قوه الابالله .....
مسكتها وقعدها على الكنب ترتاح وقالت لولدها : الله يعافيك روح وراهم شوف وش السالفه
ابو عبدالله: وين اروح وراهم انا قلت لك ان ما دفع مابيخلونه ..
ام خالد تاشر له بعيونها على اخته : على الاقل شوف القصه وخذ معك علي
طلعوا من البيت لمركز الشرطه و وقتها نزلت ساره هي بعد متضايقه من مشاري لاكن ما تفاجئت من جيت اختها وقعدتها تبكي قالت اكيد عندهم مشكله ثانيه
ام خالد: ساره الله يعافيك جيبي مويه لنوره
وبعد ما جابت لها المويه وهدت شوي ..قالت لهم كل اللي صار ..انها من كم يوم تلح عليه يروح يدفع اللي عليه ويجاوبها انه ما يقدر بحكم المبالغ كبيره جدا وهو ما يقدر حتى على اللي اقل ... وفجاءه دق الباب وكانت الشرطه طلبته يروح معهم للمركز
ام علي: يا خوفي لو سجنوه عندهم انا وعيالي وين نروح
ام خالد: لا انشاءالله ..الله لا يقوله ..انتى هدي بس
سالتها تبي تغير الجو : شلون ملاك واخوانها ..كيفكم بعد المسبح
ام علي: الحمدلله كلنا بخير
ام خالد: دووم انشاءالله هونيها يا بنتي و ربك رحيم
كانت ساره قاعده معم من الجهه الثانيه وساكته معصبه ومتضايقه نزلت تبي تشكي امها عن مشاري ولقت اختها نوره هي بعد جايه تشكي وتفضض اللي في قلبها ..والام بقلبها الطيب تستقبل هموم عيالها ومشاكلهم وكل ما يخصهم من اخبار سواء كانت حلوهـ او مرهـ ...
ساره : يمه انا ما ابي مشاري
التفت عليها امها واختها وعلى وجهم علامه استفهام
قالت ام خالد: نعم ..!! ما تبينه ليه ؟
ساره: متسلط ومعقد ويحب التامر والتشرط .. والمشكله مغرور
صرخت فيها ام خالد: مو هذا اللي تبينه وهذا اللي اخترتيه وكل ما قلت لك شئ زعلتي وحسبتيني ابي اخرب عليك
ساره: الحين انا جايه اشتكي لك وانتى تتشمتين فيني اجل البعيد وش يقول ..وماشاءالله جايه نوره كل بعد كم يوم تشكي وتبكي وانتى تاخذينها بالاحضان وتمسحين على راسها
ام خالد: ساااره ..انا ما فرقت بينكم وبين بعض كلكم عندي سواء صغير كان او كبير ..وش هالكلام اللي تقولينه
ساره: أي مره واضح انك ما تفرقين .... وش معني نوره اول ما جا زوجها يخطبها وافقتي علطول و عبير وعيالها تعتبرينهم ملوك وامراء و مها ذراعك اليمين وعيالها قمه الاخلاق و الادب ..اما خالد حبيب امه لحد يكلمه وكل كلامه صحيح و زوجته هالسنكوحه على انها فاشله الا حاطتها فوق راسك وانا وين رحت ... ولا علشاني عانس وموصله الثلاثين وللحين ما تزوحت يعني ناقصه او فيني بلا ... هاه .عندك رد لكلامي ...وانتى سيده نوره عند رد وتفسير
صرخت الجده فيها وصوتها بدا يهتز من كلام بنتها و وجها احمر من الصدمه
قالت: هذه نهايتها يا بنت ابوك ...بعد ما ربيت وعلمت وكبرت تقولين هالكلام يا النتفه ...انقلعي عن وجهي ...
طلعت ساره وفي عيونها دموع من الضيقه و ام خالد وجهها محمر ومكتومه لان الضغط ارتفع عندها وبجمبها بنتها نوره تهديها ..
ام علي: خلاص يمه ما يستاهل تعصبين لهدرجه
ام خالد : شفتي شلون هذه نهايتها بعد عمر طويل اربي واعلم تجيني هذه وتطول لسانها علي بكم كلمه

في غرفتها بعد ما تركت جرح في قلب امها شالت جوالها ولقت فيه مسج يوم فتحته كان (كول مي من مشاري) يطلبها تكلمه وهذه عادته يرسل كول مي بحكم ما عنده رصيد او فلوس علشان يشحن ..دقت عليه ورد
ساره بعصبيه وصوتها باين انها كانت تبكي: نعم
مشاري ببرود: نعم الله عليك وشفيك تبكين لايكون احد داس لك على طرف ولا زعلك
ساره: حتى اسلوب ما عندك ولا حنيه و احساس ... انت من وين جااي من أي كوكب
مشاري: اقول لا تكثرين علينا كلام .... اسمعي
قاطعته ساره: انت اللي اسمعني زين ..انا ما ابيك زين وما ابي اعيش مع واحد مثلك معقد و مريض نفسي طلقني الحين
مشاري: نعم !! اطلقك وعلى كيفك الموضوع
ساره: تقدر تعيش مع انسان ما يبيك ..انا ساره ما ابيك يا مشاري .. ويوم فرحي اللي بنفصل عنك
مشاري ويبي يستفزها: هيه انتي مو زين لك الطلاق يكفي انك عانس وبعدين مطلقه وش بيقولون الناس
ساره: يقولون اللي بيقولونه .... المهم انا ما ابيك
مشاري: اوكي ما تبيني خلاص عادي ترا اطلق ما عندي أي مشكله ..اطلق اليوم وبكره اخطب غيرك ..ولا مين يبغى وحده قضى عليها الزمن و عجوز متشببه
وصلتها حدها من كلامه و لو عليها تدخل من التلفون وتقتله ..قالت: اصلا انت واحد ا....
قطع كلامها وسكر التلفون بوجهها ..ما صدقت اللي قاعد يصير و المشاكل اللي هي فيها ,رمت نفسها على السرير ودخلت في نوبه من البكاء بصوت مسموع ..
بكت وبكت الين ما صفى راسها وبعدها خذت الجوال ودقت على اختها ام نواف وقالت لها تحي الحين ..وام نواف حست بضيقه اختها وان صاير شئ فطلعت مع احمد يوصلها لبيت اهلها
دخل نواف البيت ومالقى احد ...اخذ ينادي مشاعل وجته
نواف: وين امي ... مالها حس
مشاعل: راحت بيت جدتي
نواف: ليه وش عندهم
مشاعل: مدري مشاكل صايره مدري من وين جايه
نواف: وش مشاكله بعد ؟!
مشاعل: خالتي ساره مدري وشفيها وخالتي نوره زوجها ما خذينه الشرطه
تنهد نواف وقعد على الكنبه يرتاااح
مشاعل: بغيت شئ
نواف: لا ....
شاف اختها لابسه كنها بتطلع ..سالها : وين رايحه
مشاعل: عند شمس انا عهود بنروح لها قبل لا تسافر
نواف: اوكي لا تتاخرون

طلعت مشاعل تكمل زينتها و تحط الميك اب .. ونواف ظل في الصاله يفكر باللي قاعد يصير بالدنيا ..هو جاي وكله قوه بيقول لامه انه ما يبي يتزوج لميس وما همه ردت فعل الكل ..هذه حياته وهو ادرى فيها لاكن بعد ما سمع اللي صاير في بيت جدته وروحه امه لهم سكت واجل الموضوع لين وقت ثاني .

سيف: هلا مهند
مهند: وينك ياخي .... لا يكون مشغول بشئ
سيف: لا والله قاعد في البيت مالي خلق اطلع اليوم ... خليها مره ثانيه
مهند: افااااا وشفيك لا يكون تعبان
سيف: لا بخير دامك بخير ..بس بقعد في البيت ابي اريح شوي
مهند: اوكي حبيبي ..اشوفك على خير

شمس :غريبه منت طالع اليوم مو من عوايدك
سيف: الدنيا حر وابي اقعد في البيت .. عندك مانع
شمس: لا ما عندي .. شفيك واصله معك ويالله تتكلم
سيف: ما فيني شئ
قام طلع لغرفته يهدي اعصابه يحس انه متوتر و مو على بعضه من يوم ما درى ان مشاعل بتجي لاخته ... وهو باله مشغول ويفكر باشياء غريبه مالها داعي ..يبي يشوفها ويبي يكلمها لو على الاقل كلمه بس ما يدري باي طريقه.
انسدح على سريره ويحاول يسترخى ..على الحان اغنيه محمد عبده

تعال وانظر في خفوقي وسارع
الصبر طال وخايف يتلفه ياس
عجزت وانا مع خفوقي اصارع
حبك ولذة شوفتك واجمل احساس
شديت احساسي بأسلوب بارع
وخليتني في الناس ماني من الناس

سمع صوت جرس الباب وفز من سريره ... ينزل من الدرج بسرعه ولمح اخته بتتجه عند الباب
سيف: بنت...ارجعي انا بفتح
شمس مستغربه من تصرفاته : هذه مشاعل توها مكلمتني قالت انها وصلت
سيف: حتى ولو انا بفتح يمكن يكون واحد
وطلع للباب وهو داري انها مشاعل وفتح
مشاعل : مساءالخير
الجو حار و تاهت الحروف بلسانه حتى نظراته وعيونه موجهه عليها مو قادر يغض بصره ..قال بتردد: مساء النور
شافت شمس صديقتها وجت عندها
شمس: هلا مشاعل حياتج
ناظرت اخوها نظره قويه علطول دخل للخيمه تاركهم..وشمس متفشله منه قدام البنات..

""انا وش سويت ليش فتحت الباب وليش نزلت من غرفتي ...اوووف يا ربيي وشفيني صاير كذا ليش هالحركاات .."" قعد سيف يلوم نفسه و ضميره بانبه على اللي سواه من حماقات ..ما قدر يصبر دق على مهند علشان يمره ويطلع معه يفضض له شوي..

************************************************
وصلت ام نواف لبيت جدتها ولقت امها قاعده مع اختها ام علي ينتظرون ابو عبدالله يجيهم باخر الاخبار ..
ام نواف بعد السلام : وين ساره بغرفتها فوق
ام خالد: أي منقلعه فوق لا بارك الله فيها
طلعت لساره تشوفها .. وبعد ما دقت عليها الباب ودخلت سلمت وقعدت بجمبها على السرير
ام نواف: وشخبارك ..وش مسويه
ساره: الحمدلله تمام .. امي قالت لك شئ
ام نواف: لا ..وش صار مشاري فيه شئ
ساره: ايه انا ما ابيه وطلبت منه يطلقني معقد و متخلف لابعد درجه تخيلي يبيني اقدم استقالتي من الشغل
ام نواف: طيب هو لقى شغل ولا من وين بيصرف عليكم
ساره: مدري عنه يستهبل ويستخف دمه بطلباته الغبيه واسلوبه وقح لابعد درجه وطرار وصلت فيه انه يرسل لي كول مي واذا خلصوا يدق علي من جوال احد اللي معه ويقول دقي علي ..معليش لحد هنا وخلاص هذا مو انسان
ام نواف مستغربه من اللي تسمعه يعني مو لهدرجه توصل القصه ..
_ وش قله الادب هذه طلباته وبلعناها اما يدق عليك برقم واحد رجال وغريب هذه قويه ما يغار ماعنده دم ...
ساره: قلتيها ماعنده دم وابيه يطلقني اليوم قبل بكره
ام نواف: خالد يدري ؟!
ساره: لا توه ما درى مشغول بالسيد ابو علي مخلوق بالمشاكل الله يغربله
ام نواف: استغفر الله العظيم ..قبل كم يوم كنا نهبل مرتاحين ولله الحمد ..والحين قلبت الدنيا علينا و المشاكل كثرت
لحظه سكوت ..ثم كملت ام نواف: انتى الحين متاكده من طلبك ..يعني اكيد تبين تطلقين منه
ساره: أي متاكده
ام نواف: يجي خالد ونقوله وقتها نشوف عااد ...

***********************************************
في مركز الشرطه وهم في جدال ومعركه بخصوص الغرامه
ابو علي: قلت لكم ما عندي المبلغ اللي تبونه لو عندي كان عطيكم ما ببخل عليكم تفهمون وش اقول
الضابط : انت اللي ابيك تفهم اللي اقوله لك اكثر من اسبوعين او ثلاثه وبيمر الشهر وحنا نلاحقك ونطالبك بحق عليك لازم تدفعه وان ما دفعته بنحجزك عندنا وهذا اخر كلامي .. نسايبك ما قصروا طلعوا ولدك و كانوا ورا السالفه اما انت بعيد مشغول بدنياك ولاهي فيها وكثير مثلك ما عندهم مسؤوليه ابد
ابو علي: اووووف استغفر الله العظيم
وناظر اخو زوجته يستنجد فيه لاكن ابو عبدالله سوا نفسه ما انتبه له واستاذن من الظابط يطلع من المركز مع علي لان مافي فايده من قعدتهم ..وطلعوا تاركين ابو علي مع مناقشاته واعذاره المزيفه..

**********************************************
بعد ربع ساعه وصلوا للبيت والكل درى باللي صار ... نزلت ساره يوم سمعت صوت اخوها رجع
ام نواف: يعني مايعطونه فرصه ثانيه
ابو عبدالله: لا ما يعطونه ..لو عطوا كل واحد فرصه محد تادب وعرف غلطه
تكلمت ساره بكل قوه و وقاحه : اسمعوا كلكم انا طلبت من مشاري يطلقني مالي قعده معه بعد اليوم
الكل تفاجئ منها ما عدا ام نواف اللي ما عجبتها طريقه كلامها وخاصا بهذا الوقت
ابو عبدالله: نعم..!! طلاق انتي تبين تطلقين من مشاري
ساره : أي ابي وطلبت منه اليوم بلساني
صرخ ابو عبدالله: وليه انشاءالله ... شايفه نفسك صغيره و الخطاب طابور عند الباب علشان تطلقين
ساره وتصرخ اكثر: ما ابي اعيش مع واحد معقد غبي وطرار بوجه مغسول بمرقه ما عنده دم واحساس
ابو عبدالله: وليش وافقتي عليه من البدايه كان رفضتي قبل هالزحمه اللي سويناها و الملكه ولا على بالك السالفه لعب وعلى كيفك الدنيا
ساره: ما كنت ادري انه كذا وقح وقليل ادب .. انت لو تدري وش يسوي
ام نواف: ساره مو وقته الحين
ساره: الا وقته بقول كل شئ ..تخيل يا اخوي جواله مفصول وكل مره يرسل كول مي زين ومرات يدق علي من رقم واحد من اصدقاءه ويقولي دقي علي ..من الرجال الصاحي يسوي مثله هذا ما يغار ما يحس
بعد اللي سمعه خالد "ابو عبدالله" فاار دمه وارتفع الضغط عنده
ساره تكمل: غير كذا مغرور على باله هو اللي صح ..ويوم درى بحادث علي قام يتشمت ويقول عليك اهل مدري شلون جايين ..يرضيكم هذا الشئ يصير ..سكت كم مره يهزئني فيها و اقول خلاص يمكن يعقل واعديها لاكن ما قدرت الوضع زاد عن حده .. عيشه معه مانيب عايشه ابي اتطلق
عم السكوت في المكان بعد كلام ساره القوي محد توقع هذا الشئ يصير ولو بالحلم يعني وش هالوقاحه يسب اهلها قدامها وهم ما سووا له شئ ... في هالدنيا ناس غريبه .
قامت ام خالد لغرفتها وسكرت الباب وراها بدون ما تقول أي كلمه وخالد طلع راح لبيته وهو متضايق لابعد درجه من اللي شافه وسمعه اليوم .. ام علي خذت ولدها ورجعت لبيتها مكسوره .. راحت ام نواف لغرفه امها تطمن عليها بس رفضت تستقبل احد وقالت انها بتنام .. فكلمت ولدها وجا خذااها ..اما ساره قعدت بالصاله وحيده ..حزينه .. بدمعه حايره في عيونها ما تدري ليش تبكي على حالتها ولا على حظها اللي بالدنيا .. ما حولها احد لا حبيب ولا صديق حتى القريب و الاهل راحوا .. ما غير صوت دقات الساعه تحاكيها بصمت تعزيها على موت مشاعرها وتواسيها بجرح قلبها ..

************************************************** **
ناس حزينه وجرحها تغلب عليها وناس منصدمه من الدنيا و الاحداث اما سيف محتار مو على بعضه قاعد على الكرسي ويهز رجله بتوتر
مهند: لحووووول وشفيك متوتر احكي وش صار
سيف: سويت شئ غبي ..تخيل يا مهند وقفت قدامها متنح ما ادري وش جاني ما قدرت اتكلم ولا انطق بحرف ..عيوني عليها ما قدرت انزلها ... الله يقلع الحب يا شيخ
مهند وفيه الضحكه على شكل صديقه بس كتمها وقال: انت مكبر القصه وهي ما تستاهل .. يمكن كل اللي صار لك البنت ما انتبهت ولا حطت في بالها
سيف: اوووف ياربييي ... طيب قولي وش اسوي تعبت يا مهند مو قادر اتحكم بنفسي طول الوقت افكر فيها واتصرف تصرفات ما ادري وش تبي
مهند: قول لا اله الا الله
سيف: لا اله الا الله محمد رسول الله
مهند: اشرب العصير وانشاءالله ترتاح وبعده خل نقوم نمشي شوي ابي اشتري غرض
سيف: يالله اجل مشينا ما ابي اشرب
طلعوا من الكوفي شوب وقاموا يتمشون بالمول ..مهند يحاول يضحك سيف بمزحه وتعليقاته لاكن سيف مو معه ويبتسم بس يجامله مو اكثر

***********************************************
كانت هديل قاعده بالصاله اللي فوق وتتفرج على برنامج اغاني ... جتها هند تركض عندها سالفه خطيره
هند: هديل اسمعي وش صار
هديل: وشو .... بكره بتملكين
هند: لااااا انا وين وانتى وين ..تخيلي سمعت قبل شوي امي تكلم خالتي عبير واظاهر ان خالتي ساره بتنفصل عن مشاري
هديل: اااحلفي .. من جد
هند: أي والله سمعت كذا بس ما ادري وش السبب
سمعهم سلطان دخل معهم بالحكي : بيني وبينكم احسن هالرجال انا ما ارتحت له و واحد ما يصلح نناسبه
هديل: اصلا يفشل شفتوه بالملكه شلون مرجوج مو شايف خير
هند: بس خالتي ساره تكسر الخاطر
سلطان: هذا نصيبها
تركهم و نزل للمطبخ يدور له اكل لانه جوعان وتوه صاحي من النوم .. اما هم كملوا كلامهم
هديل: اجل ما في عرس يعني بخلي فستاني لعرسك ولا شرايك
هند: بس هذا انتي تفكيرك اعراس و لبس وكشخه ...
هديل: أي ولا تبيني اصدع راسي بمشاكل كبيره ... اوووف من الهم والضيقه
هند: اللي قلت عليه لا يطلع يمكن مو اكيد
هديل وترجع تتابع التلفزيون: اوكي ..خلاص خليني اتفرج
************************************************** *****
اقولها ولا ما اقولها طيب اذا قلت لها ما ابي البنت بتسالين ليش ما عندي سبب مقنع لرفضي وان وافقت وتزوجتها ..طيب انا ما ابي اتزوج مو مستعد ياربي وش هالمصيبه اللي انا فيها يعني هذه حياتي انا حر واقرر على كيفي ليش في احد يحكمني ويتامر علي ...
هذا اللي كان يدور براس نواف ويفكر فيه ... محتار شلون بيقول لامه عن رفضه للزواج من لميس نفسها مع انه يوم شافها كانت برائيه حلوه ومقبوله ..
************************************************** *********

اما ملاك بعد رجعه امها واخوها باسى وحزن ... ضاق صدرها على ابوها وخافت لا تطول السالفه وتكبر اكثر غير كذا كانت ما خذه هم الموضوع اللي سوته مع حنان وخططوا له من فتره هل بينجح ولا ..بيخذلهم الحظ ويفشلون عاد وقتها تفقد عقلها وتخط نواف بكبره.

**********************************************
كل"ن" رقد و اخفى على جسمه لحاف
وانا همومي طول ليلي لحافي

************************************************
مرت الايام بحلوها عند البعض وبمرها عن البعض الاخر ... اول الاحداث تطلقت ساره وانفصلت عن مشاري وكل"ن" رجع لحياته مثل ما كانت قبل ..
ابو علي للحين بالحجز ما يطلع لين يدفع اللي عليه باي طريقه ... الدنيا مو لعبه وعلى كيفه الغلطان ياخذ جزاه ..
نواف كلم امه بقراره وزعلت منه لاكن ما قدر على زعلها فرضى بطلبها ورغبتها بانه يتزوج وسلم امره لله ..
اما ملاك للحين عندها امل انه يكون لها وبيجي اليوم اللي يكون نواف قدامها بعيونه وضحكته يتامل فيها و يرفعها فوووق عن الكل ويطير بها في الاحلام..
سيف في معركه مع مشاعره قرر يرسل لمشاعل ويقولها عن حبه لها لاكن خاف انها تقول لشمس وتشوف ان الرقم رقم سيف .. وخاف ان مشاعل تكون مسلمه قلبها لغيره وفي حياتها واحد مرتاح وعايش في هواها ..
ام سلطان وعيالها حجزوا لمصر بيقضون باقي الاجازه هناك بعد ما هدت الامور و انفصلت ساره عن مشاري يعني مافي لا عرس ولا شئ وباقي على الدراسه فتره طويله..

************************************************** **
يوم الثلاثاء ..على طاوله الطعام يتغدون
نواف: ترا الجمعه تنتهي اجازتي وعندي سفره السبت لــماليزيا
ام نواف: لاااا مسرع خلصت اجازتك يا سبحان الله الايام تمر بسرعه .. والله ما شبعنا منك
نواف: وانا بعد ودي اقعد معكم اكثر بس وش اسوي الشغل ما يرحم
احمد: يا حظك سفر وسياحه والله شئ
نواف: لو جيت للواقع ترا تعب مره .. وقلق .. احمدربك انك مستقر بمكان واحد مو مشتت نفس حالتي
ام نواف: الله يوفق ويوديك بالسلامه وترجع لنا سالم غانم
عبدالرحمن: وش رايكم نروح
احمد: أي والله يمه شرايك
ام نواف: لا ما اقدر عندي شغل .. الاسبوع الجاي عندي اجتماع في جده لازم اروح
نواف: الاسبوع الجاي ... الله يعين
ام نواف: أي والله ..الله يعين ويسهل
فهد: ماما بروح معاك
ام نواف: يا قلبي ما اقدر اخذك هذا شغل واجتماع دكاتره انشاءالله اذا كبرت تروح
فهد: خلاص اذا كبرت بصير دكتور علشان اروح معك
احمد:هههههه تخيلوا عاد رجال بطول وعرض مع امه في الاجتماعات
ام نواف: وليش لأ ..فديته فهوودي بعد قلبي
عبدالرحمن: فهد وش تبي تصير دكتور اش؟1
فهد بعفويه: دكتور حريم علشان ماما اذا تعبت اعالجها
الكل:ههههههههههههههههههههï؟½ ï؟½ههههههههههههههههههههه
احمد: والله انكـ خطييييير ..ام التفكير اللي انت عايشه
نواف: هههههه ... منت بسهل يا ولد امك يا الدلوع
عبدالرحمن: اشوه اني منب حرمه ولا رحت فيها منك
ام نواف وهي تضمه: هووو وشفيكم على ولدي ... هذا عمكم كلكم و تاج راسكم فهد
**************************************************
في غرفه مشاعل كانت هي وعهود نايمين وغارقين بالاحلام ... الا قامت مشاعل على صوت جوالها يدق ونفس الرقم الغريب اللي قبل كم يوم... ما انتبهت له وردت بصوت ناايم وهاادي
مشاعل: الووو
سيف ويحاول يمسك نفسه: الوو اسف على الازعاج
مشاعل بتذمر: نعم .... مين تبي
سيف: مشاعل ممكن تسمعيني شوي
فتحت عيونها واعتدلت في جلستها بعد ما سمعت اسمها ينطقه رجال غريب
قالت: نعم من معي
سيف: ممكن تسمعيني زين وتفهميني ....
مشاعل: مين انت ... شكلك غلطان
سيف: لا مو غلطان ..مشاعل انا احبك
هو قال احبك وهي توقف الزمن عندها لحظه مصدومه ومستغربه من اللي قاعد تسمعه ... منهو ذا وليش يحبها ومن متى وكيف و وش القصه بالضبط ...اسئله و استفسارات تدور براسها وقلبها عايش بلحظه خوف و ضرباته زادت واطرافها ترتجف
حس سيف بتغيرها وخوفها فقال: والله احبك يا مشاعل وتعبت من حبك ... تعبت افكر فيك وتعبت شلون اقولك .. صدقيني ما العب ولا جاي اتسلى
مشاعل بعصبيه مصطنعه وصوتها يرتجف من الخوف: لو سمحت انا مو فاضيه للخرابيط اللي قاعد تقوله ومو ملزمه اصدق التمثيليه اللي تسويها ...اووووف
وسكرت السماعه بوجه
بعدها النوم طار من عيونها وقعدت تفكر باللي يقول انه يحبها ويفكر فيها ... يعني هي كانت بعالمها لاهيه و مشغوله بناسها واصحابها وغيرها في شخص يفكر فيها وتعبان من حبه لها... التفت جهه عهود لقتها نايمه وحاولت انها ترجع تنام مثلها لاكن ما قدرت صوته وكلامه يتردد على مسامعها ..
"" هالصوت مو غريب علي قد سمعته بس وين !! صوت سلطان لا ولا هو صوت سعود او علي طيب مين .""" جلست تفكر وتحاول تعرف صوت مين اللي سمعته ولا جاء ببالها سيف ابدا .تعبت من التفكير و قامت من فراشها تاخذ لها شور تصحصح فيه.
************************************************** ********
ام سلطان: اليوم رتبوا شنطكم علشان ما تنسون شئ ضروري ولا تعبونها ترا كلها اسبوع وراجعين
هديل: بس رايحين مصر محنا لافين على بيروت
هند: لا ما نبي بيروت ... نروح المغرب احسن
ام سلطان:لا بيروت ولا المغرب من مصر على هنا ...
سعود: ترا اليوم عندي طلعه مع العيال يعني مشغول
ام سلطان: مع مين بتروح ولوين
سعود: انا و عبدالرحمن وعلي و صديقي فيصل والشله... نتمشى ونتعشى
ام سلطان:زين انتبهوا لانفسكم وعن المشاكل مع خلق الله
هديل: يا حظكم ودي انا بعد اليوم نطلع
هند: أي والله ..شرايكم نروح البحرين
سعود: لا البحرين اذا انا كنت موجود لا تروحون بدوني
هديل: لا و الله ومن حضرتك انت
ام سلطان: شوفوا سلطان اذا ما عنده شئ يروح معنا ما ابي اروح مع السواق
سعود: يارب ما يوافق ويكون مشغول
هند: بروح اقوله وانشاءالله يرضى

راحت هند لاخوها وطلبت منه يطلعون على البحرين يروحون للسينما و يتعشون ..وافق على طلبهم و انقهر سعود منهم فكر يأجل طلعته مع العيال .. لاكن ما صار و بيروحون بدونه.
***********************************************
دخلت ملاك على امها باغرفه ولقتها قاعده على سجادتها توها مخلصه صلاه العصر وتستغفر..
جت وقعدت جمبها لين تخلص
قالت ام علي: ملاك ادعوا لابوكم ان الله يسير عليه بهالمصيبه ويسهل ... مهما سوا ومهما فعل هذا ابوكم يحبكم ويخاف عليكم
تهز راسها ملاك بالموافقه ..كملت الام : ولا تتكلمين على ابوك و تضهرين مساؤه قدام اخوانك لو وش صار هم صغار وممكن أي كلمه عن ابوهم تبعدهم عنه شوفيهم امس عادي عندهم الوضع ولا كان اللي بالحجز ابوهم وعلي اليوم بيطلع مع عيال خالتك يتمشى ... شفتي شلون قلوبهم ميته مو على ابوهم
ملاك: طبيعي راح تكون ردت فعلهم مثل كذا اللي سواه ابوي مو سهل هواش وصراخ على الفاضي والمليان
ام علي: ولو ..قلت لك مهما سوا لو يقتل واحد منكم بيضل ابوكم انتوا سووا الواجب اللي عليكم طاعته و البر اليه وادعوا له ان ربي يهديه ويحنن قلبه ...
ملاك: الله يعين ..انشاءالله يمه .... الا شلون خالتي عبير
ام علي: الحمدلله بخير تقول نواف بيسافر الجمعه خلصت اجازته
ملاك: بيسافر ...مسرع توه جاي
ام علي: أي هذا شغله ما يرحم ..وخالتك مها هي بعد بتسافر مع عيالها لمصر ..الكل يسافر يغير جو الا حنا مكانك سر... الحمدلله على كل حال
ملاك وبعد ما جابت امها طاري نواف وبالها مشغول ... طلعت من عندها وراحت تكلم صديقتها حنان
حنان: هلا والله كيفك
ملاك: تمام ...اسمعي وش اخر الاخبار
حنان: هاه طلعت النتائج
ملاك: لا .. تخيلي نواف بيسافر الجمعه ..بيرجع لشغله
حنان: لااااا ...
ملاك: أي والله ... وللحين ما صار شئ لا حس ولا خبر
حنان: اصبري كم يوم ترا باي على الجمعه يومين
ملاك: خايفه والله
حنان: وش خايفه منه ..حتى لو سافر مصيره بيرجع واهم شئ انه ما صار اللي تبيه امه من خطبه
ملاك: أي ما سمعت احد قال انه خطب ..اشوه ..يعني في امل
حنان: أي فيه لا تستعجلين بس ..... شلون ابوك
ملاك: ما ادري عنه .... هالموضوع يعور الراس خليه على جمب انا يهمني موضوعنا مع نواف
حنان: ااااهـ منك ... لا بغيتي الشئ سويتيه غصبا عن الزمن
************************************************** ******
قاعده بالحديقه تفكر باللي صار لها قبل ساعه وفهد يسبح مع احمد بالمسبح ... فكرت تقول لعهود بس ما تظمنها عهود فضيحه بجلاجل ... وتسوي من الحبه قبه ,,اما شمس مسافره لو موجوده كانت قال لها وهند وهديل لابعد المستحيلات تقولهم علشان الخبر علطول عند امهم وامها .. ما لها الا شمس تنتظر لين ترجع وتقولها بكل اللي صار .... في وسط تفكيرها جاء عبدالرحمن مسرع ويناديها
عبدالرحمن: مشااااعل مشاعل
فزت من جيته : بسم الله علي خوفتني يا غبي
عبدالرحمن:خخخخخخخ احسن
مشاعل: خير نعم
عبدالرحمن: تعالي سوي لي شعري
مشاعل: نعم ؟! ليع عندك عرس الليله
عبدالرحمن: تستهبلين مع وجهك ..لا بطلع مع سعود والعيال ..قومي سوي لي ...ابيه فلافل
مشاعل: يوووه منك ..قال فلافل ..امش قدامي
طلع احمد راسه من طرف المسبح وقال: انتبه لا يحسبونك صحن فلافل مسروق من مطعم هاشم
عبدالرحمن: هي هي هي ..اسكت بس
فهد والا ويتدخل ..قال بالمصري : قرب يا ولد قرب الفلافل والطعميه هنا هو ببلاش ما يفوتكش
مشاعل+ احمد:ههههههههههههههههههههï؟½ ï؟½هههههههههههه
عبدالرحمن: فهد احسلك اعقل
مشاعل: والله رهيب هالولد يحكي مصري بعد
فهد بصوت صغير ورافع يده : اعجبكـ
عبدالرحمن: مالت عليك يالله بس مشينا
************************************************** ***
كانت ام خالد قاعده بالصاله على التلفزيون تتابع مسلسلاتها كالعاده ..عااد الحريم حتى وهم كباار ما يخلون المسلسلات و التماثيل , نزلت لها ساره وقعدت معها
ساره: يمه انا اسفه بكل اللي صار وكل اللي سويته ... والله ما تدرين وش الي كان بقلبي من ضيقه وخوف ... مرت علي ايام الله لا يرجعها لدرجه ما انام الليل من التفكير
ام خالد ببرود: مسموحه
ساره تقرب لامها : لا يا يمه ابيك تسامحيني صدق من قلبك لاني بالفعل كنت غلطانه واسلوبي مو شئ مع الكل ..اسفه يا الغاليه
وباستها على راسها
قالت ام خالد: مسموحه يا ساره مستحيل الام تشيل بقلبها على عيالها ... حطي في بالك الام تخاف على كل ولد من اولادها صغير كان او كبير و ماترضى تشوفه يتعذب بهالدنيا و يتبهدل .. انا يوم كنت مو موافقه على مشاري ترا مو لاني ما ابيك تتزوجين بالعكس اتمنى هاليوم ..بس كنت مو مرتاحه له يعني شوفي حركاته اول من يوم جا يخطب واهله قشرين لابعد درجه خفت عليك شلون بتعيشين معهم ..ويوم شفتك راضيه فيه واخوانك مو عاجبهم كلامي سكت وشلت نفسي من الموضوع..
ساره: احمدربي وصلت لهنا وما صار العرس ...
ام خالد: أي والله الف الحمدلله ..وعسى ان تكرهوا شئ وهو خير لكم ...الله يعوضك يا بنتي بالرجال الصالح ..وربك ما ينسى احد وكل"ن" بالدنيا بياخذ نصيبه

************************************************** **********
تجمعوا الشباب في الكورنيش عند مطعم ماكدونالدز... تقريبا كانوا 7 ... سعود وعلي وعبدالرحمن والاربعه الباقيين اصدقاءهم
سعود: ما ودكم بايسكريم
فيصل: الا بس على حسابك
سعود: اوكي يالله
خذوا لهم ايسكريم وطلعوا يمشون ويسولفون وهاك ضحك على الناس واستهبال .. كان اهداهم عبدالرحمن
مروا من عندهم مجموعه بنات شكلهم بالمتوسط صغار وعليهم حركات مراهقين المعروفه
علي: لا يفوتكم ام التميلح الا غصب كشخه
سعد: يا شينهم هالسلق ... لو علي لانسفهم كلهم
سعود: لا يفوتكم ..بسرعه شوفوا
وكان يقصد عبايه وحده من البنات من ورا عليها صوره بنت مغطيه وجها بشعرها
فيصل: لا يكون صورتها
سعد: اجل ليش تغطي دام رازه الصوره ورا
علي: شرايكم نلعن خيرهم ونعلمهم من حنا
سعود: لا تتهور يا ولد
فيصل: لا عادي يالله ... تعال علي
ومشى فيصل مع علي قدام وقربوا منهم
عبدالرحمن: وش بيسون ذولا لا يورطونا ما نبي مشاكل
سعود: الله يستر

البنات يضحكون بميوعه ودلع مصطنع و علي و فيصل جمبهم يسمعونهم ... وللحين ما سووا شئ ... من بعيد في ناس يلعبون كوره وبالغلط واحد شاتها بقوه على جهتهم وطارت على ايسكريم علي وعلطول صقعت بالبنت وطبع الايسكريم على عبايتها
صرخت البنت: يا حيوااان وش هذا
علي وفيصل موقفين مكانهم من الصدمه و الولد ابو الكوره مناك متفاجئ من اللي صار والناس كلها انتبهت للي صار وحطوا الغلط على علي وكانه يقصد الحركه ..شوي سمعوا صوت رجال يصارخ
_تعال يا ولد والله لا اادبك يا قليل الادب
التفتوا على جهه الصوت ولقوا ابو جاي مع ولده مسرعين شكلهم اهل البنات
صرخ سعود: اركضوا يا عيال
والكل حط رجله واللي رمى الايسكريم ...ركضوا باقوى ما عندهم والرجال يناديهم ويصارخ
فيصل: الله يغربلكم وش ذي البلوه
سعد:هههههههههه خل نوصل للسياره بامان اول
واخيرا وصلوا لسيارتهم وكل واحد يلهث من الركض و ضربات قلبه سريعه
عبدالرحمن: مويه ابي مويه
سعد: بروح اخذ لي مويه تعال
وجابوا مويه على القد من أله البيبسي ... ركبوا السياره يرتاحون من الكابوس اللي عاشوه قبل دقيقه
سعود: حسبي الله عليكم من عيال ... خربتوا علينا الطلعه
علي:ههههههههههههه والله الموقف ونااسه جت من ربي تستاهل
فيصل: أي والله ...وين تبون تروحون غير ذا الحر و الرطوبه
عبدالرحمن: أي مكان نلعب بلياردو
سعد: أي والله اهم شئ ابي اكل تراني جعت مع الركض
سكتوا شوي بعدين الكل ضحك تذكر الموقف اللي صار وشكل البنت منخرعه وابوها يهدد ويتوعد.

************************************************** ******
بعد العشا البيت فاضي الكل طلع نواف بالقهوه مع صديقه حسين و احمد مع امه وفهد للسوق ما بقى الا مشاعل وعهود يسبحون بالمسبح ... دق جوال مشاعل و عرفت انها شمس لان النغمه نغمه شمس الخاصه فطلعت بسرعه ونشفت المويه على السريع وردت
مشاعل: هلا والله عاش من سمع هالصوت
شمس : عاشت ايامتج ... شلونتج يا قمر
مشاعل: والله تمام انتى كيفك شلون دبي
شمس: الحمدلله كلنا بخير بكره بسافر لفرنسا ...وحشتيني
مشاعل: اجل انا وش اقول وحشتيني اكثر ... الله يردك بالسلامه ..لا تطولين
شمس: الله يسلمتج ..انتبهي لعمرتج يا الغلا وسلمي على امتج وعهود
مشاعل: يوصل ..مع السلامه
سكرت منها وجت بترجع الجوال لمكانه الا شافت مسج ..فتحته وكان من الرقم الغريب يقول فيه..
مساء الخير ... ممكن اكلمك شوي
دق قلبها ورجع لها الخوف مره ثانيه .. هذا الانسان ملزم عليها الا ويبي يكلمها و يقلب حياتها ..الا بيعيشها بخوف و حذر احتارت ما تدري وش تسوي تقول لعهود بس تراجعت عن قرارها و حبت تكتم الموضوع احسن
عهود: يالله وشعندك واقفه
مشاعل وتعبت من السباحه: خلاص بطلع تعبت
عهود: اوك انا بقعد استرخي

طلعت لغرفتها تغير ملابسها ... وهي تطالع الجوال وتفكر
منهو ذا ياربي ..كلامه صدق ولا يبي يتسلى ..طيب شلون عرف رقمي واسمي من وين جايه .ياربي وش هاللي انا فيه اكره ما عندي افكر بموضوع زي كذا ... وليتها ما طالعت الجوال الا دق وكان سيف
"يووه دق وش يبي ..ادر ولا ما ارد ..ان رديت بيدري اني ابي اسولف وان ما رديت يمكن يكون صادق ويحبني حرام اصده..خلاص برد "" غلبتها الافكار الشيطانيه وردت ..بس ما تكلمت وسكتت
سيف : الوو السلام عليكم ..قبل لا تسكرين في وجهي بقولك مشاعل انا سيف
وش تتوقعون مشاعل وقتها وش كانت حالتها وشعورها .. تجمدت مكانها و عيوني شوي وتطلع من مكانها من المفاجئه الكبيره واللي ما توقعتها ولا بالاحلام غير كذا الاحراج و الخوف باللي يصير لها
كمل سيف: مشاعل ابيك تسمعيني انا مو قصدي العب او اتسلى بس
قاطعته مشاعل: من وين لك برقمي
سيف: انا خذيته من جوال شمس يوم كانت بالمستشفى وهي ما تدري وقت ما رديت عليك ترا هي ما تدري باللي يصير ومالها يد بالموضوع
مشاعل: ...سكوت ما عرفت وش تقول
سيف: شفتك كم مره و عجبتيني وصرتي تجين على بالي كثير ودايم افكر فيك والله حبيتك يا مشاعل
سكرت الجوال بوجهه بعد ما سمعت هالكلام اللي ما يدخل العقل وش اللي شفتك ومدري وشو كلام مسلسلات و احلام مراهقين ... ليش يحبها وشلون وهو ما يعرفها زين بس بنظره وشوفه كم مره ..معقوله يكون حبها الا لو كان يتوهم بالحب فهذا شئ ثاني ..
سجلت رقمه عندها باسم (حلم) ... وحولت جوالها على الصامت وخلته بدرج مكتبها علشان ما تاخذخ عهود وترتاح منه ..
*******************************************
ركب مهند السياره وكان معه اثنين باربيكان ...
مهند: يالله على هالرطوبه اللي تذبح ..
تنهد سيف وهو يناطر الشباك من جهته ..التفت عليه مهند يوم ما سمع صوته وقال
مهند: هيه وين رحت يا الحبيب
سيف: معكـ ما رحت بعيد
مهند: أي معي وانت تتامل بالدنيا وتفكر بمدري وشو وناسينا
قام يغني مهند "" يا ناسينا يا ناسينا وش اللي ذكرك فينا ..ترانا ما توقعنا بعد هالغيبه تجينا""...شفيك ياخي اضحك تضحك لك الدنيا
سيف: مهند كلمتها وقلت لها كل شئ
فتح مهند عيونه من الصدمه وقال: وشو كلمتها ؟؟! متى وش قالت
سيف: قبل شوي قلت لها اني سيف واني احبها واختي مالها دخل
مهند: وربي انك مجنون ومسطل درجه اولى عيب عليك ...زين وش قالت
سيف: سكرت بوجهي
مهند: تستاهل انت صاحي يوم تسوي كذا ..سيف اصحى من اللي انت فيه ما تدري البنت وش بتقول عنك وش بتسوي بعد اللي شافته وسمعته منك
سيف: تسوي اللي تسويه بس اهم شئ قلت لها باللي في قلبي ما اقدر يا مهند احبها تعرف شلون كلمه احبها
مهند : يضرب الحب شو بيذل ...اجل تحمل اللي بيجيك ..اشهد انك مو صاحي
سكتوا ومحد تكلم سيف يفكر باللي سواه شوي يلوم نفسه وشوي يحس بالرحه انه قالها ...اما مهند مو عاجبه حالت صديقه واخوه يتعذب بشئ اسمه الحب بوحده ما تدري عنه ولا تفكر فيه ..