منتديات كلك غلا - عرض مشاركة واحدة - أبيك في درب المحبة تخاويني للكاتبة الدكتورة غادة

09-15-2025, 05:08 AM

الجزء (6)

بعد المعمعه اللي صارت و القلق في بيت ام سلطان هدت الامور نوعا ما لاكن ظلت معاملت ام سلطان لبنتها هديل متغييره ومو مثل اول .. ونفسها هديل صايره كارهه البيت و القعده مع اهلها طول الوقت بغرفتها اما تسمع في ذا الاغاني او تفرغ ما بداخلها في دفترها.

***************************************
العصريه كالعاده قاعده ام نواف في حديقه البيت مع كوب الشاهي اللي يمخمخ الراس ويهدي الاعصاب , و عيالها عبدالرحمن يسقي الزرع و الورود و الصغير فهد يلعب بالسيكل حقه ويدور, نزلت عندهم مشاعل
_السلام عليكم
ام نواف: وعليكم السلام .. صح النوم
مشاعل: والله ما كنت نايمه ذاكرت لي كم كلمه عشان اختبار الاحد
ام نواف: ليش صعب
مشاعل: تقريبا , المنهج طويل
ام نواف: الله يوفقك انتى و اخوانك .. ترا نواف يسلم عليكم كلمني قبل شوي
مشاعل: الله يسلمه شلونه القاطع والله له وحشه
ام نواف: الحمدلله بخير يقول قريب انشاءالله وراجع تقريبا نهايه الاختبارات
مشاعل: حلووو .. يقعد معنا الاجازه ..
ام نواف: متى رايحه عند شمس
مشاعل: العشا علطول لاني ما ابي اتاخر عندها كله بس تغيير جو
ام نواف: زين اجل لاني بروح مع فهد عند جدتك اليوم .. في واحد جاي يخطب خالتك ساره وجاي مع اهله
مشاعل: على البركه .. الله يسير لها
ام نواف: امين ... اقولك سالفه هديل لا تطلع لاي احد خاصا جدتك وخالاتك لا يدرون ..
مشاعل: انشاءالله يمه
ام نواف: اااااهـ الله يهديها هالبنت ما كان ودي احط اختى بمثل هالموقف صعب والله .. صعب
مشاعل: الله يعينهم

******************************************
ابو عبدالله : وين ثوبي جاهز خلاص ومكوي
ام عبدالله: ليه وش عندك اليوم .. زواج او عزيمه
ابو عبدالله: لا ذا ولا ذا , في خطاب جايين لساره
ام عبدالله بتعجب : صدق !! واخيرا ما بغوا يجوون
ناظرها زوجها بنظره حاده ... وهي حست فيها و رقعت الموضوع
_ أي .. الله يوفقها و يسير لها امورها ... الا الرجال من الاهل ولا من بعيد
ابو عبدالله: لا مو من الاهل بس انه ولد ناس محترمين
ام عبدالله: يعني من برى العائله .. غريبه وانت كنت اول واحد رافض هالشئ وش اللي غيرك
ابو عبدالله: ساره مهب صغيره علشان نتشرط .. اللي يجي فيه الخير والبركه
ام عبدالله: ليت كلامك ذا كان من اول .. كان الحين هي ام لعيال
ابو عبدالله: كل شئ مكتوب ومقدر .. خلينا نسمع الاخبار

**************************************
سلطان كان يمشي بسيارته توه طالع من محل الكمبيوترات واخذ جهازه الاب توب .. الا يدق جواله
"swetty يتصل بك "
تضايق يوم شاف الرقم و ما وده يرد مو بالعاده يحتويه هالشعور اذا دقت سمر الا هاليومين صاير مو طايقها مدري ليه
رد بثقل: الووو
سمر: هلااا سلطان كيفك
سلطان: الحمدلله بخير انتى كيفك .. كيف اهلك
سمر: ماشي الحال تمام.. وينك من زمان عنك
سلطان: اعذريني هالايام مشغول ..
سمر: اهااا وكل ذا الشغل يلهيك عني وعن السؤال علي
سلطان: لا والله بس الشئ مو بيدي مشاكل مع الاهل و قلق يعني نفسيتي كانت مو مره
سمر: اهم شئ انك بخير
سلطان: بخير دامك بخير ... انتى كيفك .. وش مسويه
سمر بتنهيده : ااااهـ الحمدلله ماشيه
سلطان: دووم
عم بينهم السكوت و المحادثه بينهم بااارده ..
سمر: شفيك ساكت
سلطان: سلامتك مافيني شئ
سمر: سلطان بقولك شئ انت ما مليت
سلطان: من وشو امل ؟!
سمر بتردد : يعني ... من الدنيا و الوضع هذا
سلطان يستغبي عليها: تقريبا مليت بس ما فهمت قصدك بالوضع هذا
سمر: يعني لمتى بنقعد كذا .. بعيدين عن بعض
سلطان: ومن قال اننا بعيدين انا ما اشوف كذا
سمر: بس يا سلطان اوقات تمر علي ابي اتطمن عليك واعرف اخبارك ما اقدر يعني قلبي دايم يعورني لو ما سمعت صوتك او كان فيك شئ
سلطان: يا عمري انتى ارتاحي ولا تعورين قلبك بشئ .. انا بكون بخير اذا انتى بخير
سمر وبدت تعصب عليه لانه ما فهمها
_ سلطان افهمني .. ابيك تكون لي قربي و حولي .. تعبت وانا بعيده عنك
قاطعها سلطان: دقيقه .. شلون يعني تبيني افهمك سمر تكلمي بوضوح قولي وش اللي بقلبك
مره لحظه سكوت ثم قالت سمر : متى بنتزوج
وقتها رفع سلطان حاجبه و لوى فمه كنه الموضوع ما عجبه ..
كملت سمر: متى اكون جمبك و قبالك اصحي وانام وانا حولك ... ما ودك هالشئ يصير
سلطان: الا اكيد ودي بس يا سمر انتى مستعجله تدرين انى هالسنه واخلص دراستي وعلى ما توظف و اقدر اوفر شئ للزواج بعدين انتي وش فكرك بهالموضوع مو كم مره قلتي لي عن الزواج وقلت لك اصبري .
سمر: اصبر لمتى الين ما اصير لغيرك .. تدري امي الله يرحمها و ابوي مسكين وكبير في السن يعني أي واحد بيتقدم لي بيوافق خوفا علي
سلطان: يا سمر .. يا عمري لا تحطين هالشئ في بالك انا احبك وبيجي اليوم اللي بدق بابكم واطلب يدك .. كل شئ بوقته حلو يا حلو
سكتت سمر و كن الكلام عجبها نوعا ما و رضت به .. مع انها متخوفه من النهايه .. المشكله يا كثر هالقصص و المسلسلات اللي نقراها و نسمعها وبعد نشوفها عن علاقات الشاب مع البنت و المماطله و اللف والدوران الا ان اللي " تحب" يروح عن بالها هالامور و تصدق كل شئ يقوله حبيبها و هي في يوم من الايام كانت تنتقد اللي يصدقون الشاب .. مثل ما يقولن " الحب اعمى"
*****************************
نغيير شوي عن عائله ام نواف و ام سعود .. ونجي عن ام عبدالله
قامت العمه عهود من نومها و صحصحت بعد ما خذت لها شور ينشط .. جت للصاله وقعدت على التلفزيون مع زوجه ابوها ام عبدالله .. هم بالعاده ما يتهاوشون كثير ولا يمونون على بعض كثير اوقات تصير بينهم خلافات و اوقات يرضون على بعض .. يعني هيك وهيك
عهود : للحين ما خلصت سنوات الضياع
ام عبدالله: لا توها ... الا قولي نور اللي للحين ما خلصت والله وفيهم الخير يوم عرضوا هالمسلسلين غيرنا جو من كئابه الخليجيين و قله حيا المصاريه
عهود: انا اتابع نور ويكفي لو شفت سنوات الضياع بتلخبط بينهم ... الا وين ابوي ما اشوفه
ام عبدالله: قبل شوي طلع .. راح يشوف العمال و البيت ... ما دريتي عن عمتك ساره
عهود بحذر : بسم الله عليها شفيها
ام عبدالله: اليوم بيجونها خطاب ... و ابوك على غير عادته موافق عليهم رغم انهم مو من الاهل
عهود بفرح: لااااااا ... مبروووك يا حياتي يا عمتوو .. الله يوفقها يارب
ام عبدالله: اميين والله انها تكسر الخاطر .. عمرها في الثلاثين وللحين ما تزوجت
عهود: الله يسهل عليها ويارب يكون ولد حلال .. اجل اليوم الحبيبه مستانسه
ام عبدالله: اهم شئ تتزوج وترتاح تدرين لو انها مكانها كان جتني حاله نفسيه
عهود: من وشو
ام عبدالله: اول شئ بحس اني منبوذه ومحد يبيني غير كلام الناس كل ما رحت مكان بيقولون " عانس" وتخيلي نظرتهم لي ان اكيد فيني بلاء ... يوووه الله لا يقوله لبناتي
عهود: مو شرط .. اللي واثقه من نفسها ما همها كلام الناس ونظرتهم , والله لو مشيتي على كلام الناس منتب عايشه .. شوفي ان تزوجت البنت وتوفقت حسدوها على زواجها الزين وان ما توفقت تشمتوا فيها , غير كذا ان ما تزوجت قالوا اكيد و بصموا على العشره ان فيها شئ ومحد يبيها .. يووه على هالناس ما يخلون احد في حاله.
ام عبدالله: اتركيك من الناس الحين الا الغريبه ابوك شلون موافق على الرجال وهو من برا .. تذكرين تفكير ابوك اول شلون كان يرفض أي واحد من برا العائله حتى عمتك عبير سمعت انها بالقوه تزوجته
عهود: وش بعد بتشرط الحين خلاص معد ينفع وزين انه غير هالنظريه ولا كان رحت فيها انا وخواتي .. بصراحه ابوي تفكيره غلط ليش ما يبي الا من العائله افرضي جا واحد من برا وماشاءالله عليه رجال بعلم و مال و الزمن يشهد على افعاله ويرفظه .. اصلا غلط في غلط ذا التفكيير
ام عبدالله: غلط وبس .. حنا اللي طحنا فيها والله
عهود ترفع حواجبها باستغراب: يعني ما كان ودك تتزوجين ابوي لانه من العائله
ام عبدالله: لا يا بنت الحلال مو قصدي كذا .. بس يعني هاه .....
سكتت وما كملت كلامها
عهود: يعني وشو !!
ام عبدالله: اقول اسكتي خليني اتابع المسلسل ما بغى يجي بعد سنه من الدعايات

*****************************
بعد المغرب في بيت ام خالد " الجده" ريحت البخور تملى ارجاء البيت و النور مشع في كل مكان ..
وصل ابو عبدالله وسحبته امه تتكلم معه
ابو عبدالله: هلا يمه وش بغيتي
ام خالد: اسمع وانا امك .. ابيك تسال الرجال عن كل شئ بالتفصيل الملل , وين بيسكن و هل هو بيشتغل ولا لا .. و هل قد تزوج من قبل .. وكل شئ لا تخلى شئ ما تعرفه عنه ..هذا زواج مو أي شئ
ابو عبدالله: انشاءالله يمه يصير خير بس انتى لا تسوين زحمه
ام خالد: الحين هذا وانا خايفه على اختك وابي لها الخير تقولي زحمه
ابو عبدالله: لا يمه ما اقصد شئ الله يجزاك الجنه يارب ..
وصلوا بناتها ام سعود وام نواف .. وتركوا عيالهم الصغار " علي و فهد" يلعبون في غرفه الالعاب ..
ام سعود راحت عند امها تتكلم معها ببعض الامور , و ام نواف طلعت لاختها ساره في غرفتها
طق .. طق
دخلت ام نواف بابتسامه: السلام عليكم
ردت ساره: وعليكم السلام هلا عبير حياك
ام نواف: شلونك وشخبارك
ساره: الحمدلله طيبه اتى كيفك وشلون العيال
ام نواف: والله كلنا بخير يسلمون عليك... هاه مستعده
ساره: انشاءالله
ام نواف: توكلي على الله .. وهدي نفسك واعصابك انشاءالله خير بيجون وبنقعد مع اهله نشوفهم ونعرف كل شئ عنهم بعدين بتدخلين عليه يشوفك وتشوفينه الشوفه الشرعيه .. امور بسيطه بتعدي باذن الله
ساره بتنهد: الله يستر
ام نواف : هاه طلعتي وش بتلبسين !! ولا اختار معك
ساره: لا ما طلعت .. ابي رايك

من طبيعه ام نواف قلبها طيب وحنونه كثير .. دايما مبتسمه و تتلكم بالخير الا وقت ما تعصب تتغير و ما تسكت عن حقها وحق عيالها مثل ما سوت في سالفه هديل .. كانت محبوبه اكثر من قبل امها و خواتها .. ماشاءالله عليها كريمه وما تبخل على احد بشئ على كثر ما تشوف من اشياء ما تعجبها احيانا تعديها و تسوي الخير.
تقريبا ام سعود نفس طبيعتها بس اشد .. وحازمه اكثر .. لاكن كل وحده منهم فيها الخير.

****************************
في المستوصف وكان دوامهم الثاني " ليلي / مساءي"
حنان: بشرى ساره ..
ملاك: هاه لقيتي لي حل
حنان: أي حل يا بنت الحلال .. اسمعي المدير طالع شرايك نسحب ونروح لبيوتنا
ملاك: .... سكوت ما ردت
قعدت جمبها حنان وحطت يدها على كتفها وقالت:
_ امس مدري وش جابك على بالي كنت اشوف مسلسل مصري و البطله نفس حالتك تحب واحد مو داري عنها تخيلي وش سوت .. سحرته
التفت عليها ملاك بدون ما تعلق او تتكلم..كملت حنان
_ سحرته المجنونه علشان يحبها , والله هالمسلسلات ما خلوا شئ , وقتها علطول ذكرتك قلت الله يستر من هالجنيه ملاك لا تسويها
ملاك : وبعدين وش صار
حنان: ما كملته قمت ونمت .. سخافه يا بنت الحلال وش ذا الحب اللي يخلي الوحده كذا
ملاك: الحب يسوي اكثر انتى ما جربتيه
حنان: الله لا يقوله اجربه .. ذا جنون مو حب .. يالله بس عن الهذره وتضييع الوقت ترا كلمت " شفيق " وقلت له يجي ياخذنا الحين بنلطع دام محد ورانا واليوم اربعاء ابي اروح ارتاح
ما عقبت ملاك على موضوع الطلعه من الدوام لان بالها كان مشغول باللي سمعته من صديقتها و حركت بطله المسلسل المجنونه..
******************************************
مشاعل وشمس في قمه الوناسه و الافتلال
شمس: حيا الله شعوله .. نور البيت
مشاعل: منور باهله .. تسلمين يا قلبي
دخلت ام سيف عليهم تسلم على صديقه بنتها
ام سيف: حياالله مشاعل شحالتج عيوني .. شلون اهلتج
مشاعل: الله يحيك خالتي والله الحمدلله كلنا بخير .. امي تسلم عليك.. .. انتى اخبارك وش مسويه
ام سيف: بخير دامتج بخير ... شلون الدراسه معتج و الاختبارات انشاءالله سهالات
مشاعل: والله ماشيه ... ما بقى شئ ونخلص ..
ام سيف: الله يوفقكم جميع و يسهل عليكم
شمس+ مشاعل: امين
ظلت ام سيف كم دقيقه مع البنات يسولفون بشكل عام .. وهي معجبه بشخصيه مشاعل و مرحها ونعومتها .. بعدها قامت عشان تخليهم على راحتهم
مشاعل: يا حليلها امك .. قعدتها ما تنمل
شمس: الله يسلمتج كله من ذوقتج ... الا ما قلتي لي وش مسويه بنت خالتج بعد ذيك السالفه
مشاعل: سالفه طويله .. الله يستر عليها
شمس وفهمت ان مشاعل ما ودها تقول
_ الله يعينها في هالدنيا مافي احد مرتاح
كملوا سوالفهم و ضحكهم ... بين القهوه والحلى ثم الشاهي مع المعجنات و البيتزا ... كانت مسويتها شمس بعد عناء طويل واللي ساعدها في الاختيار سيف .. اختار لها البيتزا وكانت بطريقه مختلفه عن البيتزا العاديه وطعمها حلو .. اما حلى القهوه سوته مشاعل و جابته معها لان امها عودتها اذا بتروح لاحد ما تروح ويدينها فاضي على الاقل تاخذ شئ بسيط ..

دخل سيف البيت وتوه راجع من القهوه .. لقى امه بالصاله تتابع الاخبار.. سلم وقعد معها شوي
سيف: اجل شمس مع ربيعتها بالمجلس
ام سيف: أي يا حليلاتهم .. مستانسات اسمع ضحكهم
سيف: تبين شئ من المطبخ بروح ادور الاكل اللي سوته بنتج المحترفه ابى اذوقه
ام سيف: ههه بيعجبك تلقاه بصينيه يم المايكروويف

****************************************
*ملاك و حبها الجنوني لنواف , ما نتيجيه؟*
* رجعه نواف من فينيسيا وما الجديد في حياته؟*
*هل سلطان بيوفي بوعده و يتزوجه حبيبه القلب سمر؟*
*هديل و حياتها المميته ما نهايتها؟*
*كيف علاقه شمس بمشاعل هل بتتغيير ام تبقى على ما هي مجرد صديقات؟*
*سارهـ و الحدث الجديد في حياتها , خطبتها و زواجها كيف راح يكون؟
*****************************

الجزء(7)

ملت من قعدتها بالغرفه لساعات طويله فنزلت للصاله تغيير جو , مالقت احد الا اخوها سعود و اختها هند طالعه من المطبخ مع كوب عصير لها ولسعود , جت هديل وقعدت معهم بدون ما تتكلم , وهم يتابعون التلفزيون بصمت جا سلطان
_السلام عليكم
الكل رد: وعليكم السلام
سال اخته هند: وين امي بغرفتها
هند: لا راحت بيت جدتي
سلطان: وش عندها رايحه الابعاء
هند: في خطاب جايين لخالتي ساره
سلطان:اهااا .. على البركه ...
قعد معهم وما عبر هديل .. سال هند وسعود عن دراستهم الا هديل مطنشها , حست هي بهالشئ و حز بخاطرها انها مهمشه في البيت
سلطان: بكره شرايكم نطلع نتغدى برا
سعود بفرح: اكيد أي .. نبي البحر
هند: اوكي ما يخالف ... وش رايك هديل
ما امداها تقول رايها الا تكلم سلطان وقال: مين تسالين انتي , في احد غيري انا سعود تكلمينه , اذا امي وافقت خلاص نطلع
حست هديل بالدنيا تدور فيها ,, و الدموع بعينها شوي وتنزل ,, من متى صارت ولاشئ بالبيت ومن متى صاروا اهلها يكرهونها ,, كرهت اليوم اللي انولدت فيه ولا تكون عاله و غثه على غيرها
قامت واتجهت لغرفتها بقلب مكسور و روح مجروحه.. بعد ما اختفت عنهم قالت هند
_ سلطان وش ذا الكلام , حرام عليك
سلطان: وش سويت قلت الصح محد غيرنا الثلاثه قاعدين .. سعود انت تشوف غيرنا بالصاله
سعود سكت ومارد هو بعد تفاجئه من اسلوب اخوه و كلامه القاسي
هند: ولو , ما تقول هالكلام هي ما اكفرت ولا قتلت احد
سلطان: واللي سوته شئ سهل بنظرك
طبعا سعود ما كان يدري بالضبط وش القصه و اخته اقرب وحده له ما توقع يطلع منها أي شئ.

*****************************
في غرفتها راميه نفسها على السرير و غرقت بدموعها ... . تشهق من كثر البكا وتتمنى ان روحها تطلع وترتاح .. ما توقعت انها في يوم من الايام بتكون في مثل هالموقف عله على اهلها و موقعها في البيت ولاشئ .. حتى الشغاله احسن منها على الاقل لها صوت مسموع اما هي مافي فرق بينها وبين الجدران اللي حولها كل هذا لانها تعرف واحد غريب وحتى ما صار بينهم شئ كبير .. بس الزمن ما يرحم يا هديل .. اللي غلط يتحمل غلطه وهذه القدر مكتوب يصير كذا .
*********************************

وصلت ملاك للبيت , دخلت على هواش وصراخ ابوها يصرخ وامها تصرخ كل"ن" يرفع صوته على الثاني , سلمت ولا احد عبرها اعصابهم ما تسمح لهم بالانتباه للي جا البيت .
دخلت غرفتها وهي واصله حدها مو كفايه جايه من دوامها وتعبانه تبي ترتاح تلقى اهلها يتهاوشون..
ابو علي: خلااص انا قلت كلامي ونهايه اختبارات العيال يكون كل شئ جاهز لا تفشليني عند الرجال
ام علي: هذا هو اهم شئ نفسك اما انا عادي اتفشل قدام الخلق و الكل يتشمت فيني
ابو علي: والله مشكلتك عااد .. عمى فيك عيشه تقصر العمر
طلع وسكر الباب باقوى ما عنده , مسكين على باله رجوله الصراخ .. ما امداه ابو علي يطلع الا فتح علي باب غرفته وطلع متجه هو الثاني للباب
ام علي لمحته و قالت: على وين انشاءالله دجه وصياع وقله حيا
علي: مانيب رايح مكان هنا بس عند الباب .. البيت كله ملل وصراخ بطلع اشم هوا نقي
طلعت ملاك : هوا نقي انت و وجهك ولا تشم هالسم و تدخن
علي: وش عندك انتى داخله عرض السالفه بيني وبينها , وانتى مالك دخل فهمتى ولا لا << قالها وهو يرفع يده في وجه اخته
نزلت ملاك يده بقوه وصرخت فيه : اولا نزل يدك جعلها الكسر وثانيا هذه اسمها امي وتاج راسك .. على مين رفعه الراس ونفخه الصدر ترا كلك كلك حشره
عصب علي وارتفع ضغطه من كلمه اخته .. حتى عيونه شوي وتطلع من مكانها ... اخذ كف و وجهه لملاك بلا سابق انذار
شهقت ام علي وملاك من حركته ومن الصدمه ما يدرون وش يسوون .. قال علي: هذا اقل شئ اسويه , وقعده في البيت ما نيب قاعد
طلع وملاك من وراه تصارخ عليه : بحريقه جعلك ما ترجع يا حمار
وخانتها العبره وبدت تبكي .. مصدومه من حركه اخوها و الموقف اللي كانت فيه .. اما ام علي قعدت على اقرب كنبه وحطته يدها على راسها كالعاده , هذه هي كل بعد مشكله تاخذ ذي الوضعيه قعده ومسكه راس ..
ملاك بصوت مخنوق: شفتي شلون ذا الحيوان وش سوا قدامك وساكته بعد ما تقولين شئ
ام علي : .............. سكوت
ملاك : لو ما قدرتي توقفينه عند حده وتكلمينه على الاقل هديني واسيني مو تسكتين , محد في هالبيت يحس كلكم عديمين احساس .. تجرح ذي الكلمه بس هي الصدق .. حياه كلها هواش و صراخ و جفا .. ودي لو لحظه احس بالحنان واحد يكون حولي .. دام كذا لا تلوميني لو سويت أي شئ .. زين
زوج يهاوش و يلوم .. و ولد يصارخ ويفرد عضلاته .. في نهايه المطاف بنت تتشره و تتذمر .. هذا اللي مر على ام علي باقل من ساعه .. و تقريبا مثل هالمواقف تمر عليها كثير بحياتها .. يعني متعوده ..
بكل بساطه دخلت غرفتها و بدت تبكي بصمت , تطلع مافي قلبها يمكن تطفي نار مشتعله بداخلها ناتجه من قهر و ندم غير الحزن و الهم و الخوف من بكرهـ .

اقول يمكن تنفرج في المقابيل
ولا ادري الا الارض تحتي تهايل
و بعد التعب و الهم و الحط و الشيل
توى عرفت ان البخت كان مايل

فهد المساعد..
*****************************

على الساعه 9 و نص سواق مشاعل و معه اخوانها عبدالرحمن والصغير فهد و اقفين عند باب بيت شمس .
مشاعل عند الباب الداخلي للبيت تودع شمس وامها
_ كثر الله خيركم الله يعطيكم العافيه , عاد زورونا يا خاله
ام شمس: الله يعافيتج , انشاءالله الجيات اكثر ونشوفتج يا عمري , سلمي على الوالده و الاهل
مشاعل: انشاءالله يوصل
شمس: نورتي يا دبه , قعدتج ما تنمل
مشاعل : تسلمين .. يالله مع السلامه
في هذه اللحظه وهي طالعه نازله من الدرجات الصغيره ومتجه للباب الخارجي , كان سيف قاعد في خيمته اللي برا و مستعد يطلع ويدخل البيت بياخذ له شئ , لاكن دق جواله ورجع لمكانه يرد على المتصل , اما مشاعل كملت طريقها وطلعت لاخوانها برا .. بلا أي تصادم بينها وبين سيف كالمعتاد في القصص..
********************************
في السياره..
مشاعل: وش عندكم طالعين كلكم بهالحماس
فهد: يختي بناخذك من بيت صديقتك ولا تبين تنامين عندها
مشاعل: هههه يا حلوك انت وتفكيرك
عبدالرحمن: بناخذ عشا من هارديز
مشاعل: كوووول , بس لا يكون بنروح نقعد وننتظر لين يخلص الطلب
عبدالرحمن: لا قبل لا نطلع من البيت سوينها الاوردر .. اذا رحنا لهم بيكون جاهز
مشاعل: أي اشوه .

******************************************
بعد هذا اليوم الاربعاء .. مرت الايام عاديه بلا احداث مهمه .. وكان وقت اختبارات نهائيه للطلاب بدوا الجامعات وبعضهم خلصوا والمدارس بقى لهم اسبوع ..
بيت ام سلطان كان الجو بااارد .. تطنيش لهديل و ام سلطان صارت اكثر شده وحزم مع الكل .. سلطان طفشان من حياته و الدنيا بشكل عام بالاضافه لسمر اللي معتبرها "شئ" يبهر و يزين حياته فيعا ويغيير جو معها .
اما بيت ام نواف .. بين الفرحه من قرب رجوع نواف و احمد , والخوف من الاختبارات و النتائج .
عند ابو عبدالله ... شويه تصادمات بين ام عبدالله و عهود و غرابه ابو عبدالله "خالد" ..
وبيت البائسه ام علي .. مشاكل × صراخ و كابه خوف من المستقبل و اللي بيصير بعدين
اما ساره الحالمه .. غارقه باحلامها و افكارها بخطيبها .. زوجها المنتظر .
***************************************
خلصوا مشاعل وشمس اختباراتهم .. فقررت مشاعل تسوي حفله دي جي في بيتها وتعزم شمس و صديقاتهم ..

يوم الثلاثاء وهم يسولفون على التلفون بكل انواع السوالف .. حش في الناس و ضحك شوي شكوى .. صدق حريم

مشاعل: المهم يوم الخميس هذا بسوي حفله دي جي وبعزم البنات شو رايك
شمس: ونااسه .. احسن الخميس قبل ما يسافرون الناس
مشاعل: اجل بعزم شله اسيل و خلود
شمس: لاتنسين امونه تراها حلى القعده
مشاعل: اكييد هذه اول وحده .. يا حبي لها ذي البنت تنسيك هموم الدنيا و مشاكلها
شمس: زين وش بتقدمين من اكل ..
مشاعل: بسوي بوفيه و بحط معظم انواع الاكل حالي و مالح غير المشروبات و السلطات
شمس: اوكي انا علي السلطات والمشروبات وان لقيت شئ ثاني حلو بجيبه
مشاعل: لا تعبين نفسك يا سكره .. يكفي جيتك
شمس: لا تعب ولا شئ مو انتى ربيعتي
مشاعل: ربيعتك ونص
شمس + مشاعل: ههههههههههههههههههههههههه ههه
*********************************

ام سلطان قاعده بالصاله بلحالها , شوي نزلت هند وقعدت معها ..
هند: يمه بتكلم معك بشئ
ام سلطان: تكلمي
هند: ترا ما يصير اللي تسوونه مع هديل هي صح غلطت وعرفت غلطتها خلاص .. وبحركاتكم هذه انتى وسلطان راح تتمرد اكثر , يعني شوفي كم لها وهي ما تقعد معنا الا على الاكل و ساكته حتى باوقات قهوتنا و سوالفنا ما تنزل , تدرين كم مره ادخل عليها الاقيها تبكي شكلها يكسر الخاطر . اصلا حرام اللي تسوونه لها
ام سلطان: خلصتي كلامك... اختك اللي سوته مو سهل غير انها تكلم غريب كذبت علينا و فشلتنا قدام العالم , ولا تبيني امسح على شعرها واقولها خلاص يا قلبي ولا تبكين , هذه بنتي وانا اعرف اربيها .
في هالوقت نزل سلطان من غرفته وسمع النقاش الحاد بين امه واخته , دخل بالسالفه وقال
_ وش عندك انتى بعد عاجبك اللي سوته اختك , قله حيا و كذب .. تحمد ربها ما قطعت لسانها هالكلبه
قامت هند وهي منقهره من اسلوبهم .. صرخت فيهم
_ هذا انتوا .. ناس ما عندكم احساس تشوفون نفسكم صح والباقي غلط .. قال نخاف عليكم .. أي تخافون علينا ..انا اعرف اللي يحب انسان يحتويه و يحن عليه مو يرميه ويطنشه عشانه غلط ترا كلنا نغلط
سلطان : هيييييه انتى احترمي نفسك ولا ترا قسم بالله تشوفين شئ ما عمرك شفتيه.. انقلعي على غرفتك اشوف

عطتهم ظهرها و طلعت لغرفه هديل .. دقت الباب و دخلت
هند: وش تسوين .. مشغوله بشئ
هديل: لا ما عندي شئ حياك
هند: كيفك
هديل ببرود: تمام
هند: سمعتي الحرب اللي صارت تحت
هديل: أي سمعت .. مو شئ جديد
هند: ولا يهمك يا هديل .. لو طنشوك امي وسلطان انا موجوده .. بكون صديقتك اكثر من اختك .. صح اني كنت بعيده عنك ذيك الايام وبدايه المشكله بس لا تشيلين هم انا موجوده .. تكلمي معي واشكي لي وطلعي كل اللي بقلبك ..
هديل: بس صعبه انك تشوفين امك ما تكلمك ومو معتبرتك شئ في البيت
هند: ادري انها صعبه .. بس هذا اللي صار يمكن اختبار من ربي ولازم تصبرين وتدعين ان يحنن قلب امي عليك .. اما سلطان ما عليك منه .. اهم شئ انتي هونيها وتهون.. بدت الصيفيه و ملكه خالتي ساره قريبه فليها يا بنت و اطلعي من غرفتك ترا اغراضك تشكي تقول مليت من وجه هديل
ابتسمت هديل.. وكملت هند: أي كذا اضحكي تضحك لك الدنيا .. شرايك تقومين معي نشوف مسرحيه لطارق العلي ترا تموووووت من الضحك
هديل: وين اذا بالصاله منب طالعه
هند: لااا عندي بالغرفه .. يالله امشي