لكي , نتزوج , نتزود , هيا , بنا

هيا بنا نتزود لكي نتزوج

هيا بنا نتزود لكي نتزوج

يآولكم يآولكم .. يالله مير انك تحييهم هالكبكات الحلوين
والبكلات الشطورين الملقوفين مو عيب عليكن ناطاتن في ذا
لان البنت تتزود بالطبخ والنفخ مو بهذآ الوشسمه النصايح عشان تعرس يالله برا
دوعابه دوعابه اقلطوا يالله حيكم جميعا

جيت بمحاضره للشباب العزابيه فكاهه اكثر من كونها نصايح

اعزااائي العزاااب ...انصتوآ إلي>حسيت اني دختوره
فـ والله انني لكم لناصحه فاستمعو جيدا كي تبدأ
اول مرحله بالزواج بطريقه سليمه لايشوبها شائب



بادىء ذي بدء

اذا خطبت ووافق لك ابو العروس ..خلك هادىء وعلى طبيعتك
لاتفرح فرح مبالغ وتحسسننا انك ماخذ كأس العالم
اركد واثقل واعطي ابتسامه خوقاقيه
وقوم حب راس عمك وانت طالع ..
مو تروح تحب راسه وترجع تجلس ..ثم يقولون وش هالنشبه
ولاتتحمس وتحب يده راسه يكفي

الشيء الثاني
وقت النظره الشرعيه ....لاتستحي ترى انت العريس مو العروس ..
ركز اوكي مانبي سكارى وافخم نوع حشيش
يعني ارفع راسك وتمقل زين مو تنزل راسك بالارض وصوتك
يالله ينسمع ثم لااسالوك اهلك هاه كيف شفتها تقول ماركزت> وانت قازها قز
رد السلام ..حتى لو ماسلمت البنت .. وقولها اخبـارك ...ولايجي ببالك تستخف دمك
ترى البنت على اعصابها وبلحظه فقدان للوعي وهي جالسه يعني مو معك بالمود
واذا استظرفت شيء طبيعي اليوم الثاني ابوها يقول لك
نصيبك مو عندنا ياعادل امام وقتها ظرافتك ماتنفع

....لذلك رد السلام اذا سلمت او ماسلمت ..وطالع فيها تمقلها زين ..مع كلمه اخبــارك وقضينا
النظره ترى حدها حدها 3 دقايق..استغلها ..ماهي سياره عشان تفحصها خمس ساعات



الشيء الثالث
لنفرض انك صرت انسان عاقل وما استظرفت ووافقو لك
لاتنصب عليها بالجوال ...خلك طبيعي ..وقولها كل عيوبك من البدايه عشان بعدين ماتقول لك
خدعتنني يازااالم يامفتري
وخل المزايا هي تكتشفها ..هذا اذا كان فيك مزايا انت وخشمك تقل حبة برجونه
مو تجلس تعدد ايجابياتك ..وتقلبها فلم هندي
ومافيه احد ماكفخته ..ترى ماتو البنات الخبلات اللي يخقون على التكفيخ
واذا سئلتك وش هواياتك اكتفي فقط بكره القدم عشان لاتخبص وتجيب العيد
تصير مثل واحد من الشباب ..خطب وحده مطوعه ..وسئلته وش هوايتك ..
قال لها هوايتي الصلاه وللحين الرجال اعزب ومنوفس >محد فقش ترا
ويستحب تعطيها فرصه تسولف ...ولاتتقمص دور كونان بفتره الخطبه
وتنشب لها متى صحيتي !؟ .طيب ليه ماتصلتي ؟ ..طيب امس قلتي انك بتتصلي
ليه ما اتصلتي !؟ بعدين اتصلت عليك وخطك مشغول ...اعترفي مع مين كنتي تتكلمين
اهدأ من كذا يامستر كونان ريلآكس

ورجاء رجاء تـــام اذا قالت انها راحت السووق لاتسئلها السؤال الاهبل
ليه ماعلمتيني ؟..ووش شريتي ..وكم كلفك ..؟
طيب ناقصك فلوس ؟
خف علينا ياابراهيم العساف..لاحق على دفع الفلوس لاحق


لذلك فتره الخطبه ..خلها هي تشتاق لك وتتصل
وعطها فرصه للسوالف ...ولاتنشب ولاتبربر ..ولاتنصب ولا تفقش
واهم شيءولاتسوي الفلم السعودي ..تاخذ جوال اختك
وترسل لها(انك بالمستشفى تعيبان )ياحرام مسكين شفقت عليك صراحه
ترى اخر بنت صدقت هالسالفه اللحين عندها احفاااد





الشيء الرابع
نفرض انكم تزوجتو
حركات حبيبتي وين تبين نسافر زيورخ والا فيينا ؟
ثم تفاجئها بأبها وجده ..بطلها لا اهفك ببراد عمك
لاتعشمها على الفااضي

ولاتحرق كل اوراقك بأول شهر ...وزع جهدك على بقيه الشهور ..خلك مايسترو
وترى اؤيد انك تجيب شغاله ..
لأنك متزوج عشان تجلس مع كائن لطيف تتغزل فيها وتعوض كل ايامك الشهبه
اللي قضيتها مع اخوياك الغُبر ع ددسن ثمان وتسعين عليها الدمار اينما حلت وارتحلت
مو عشان تجلس بالصاله وتسولف معها وهي بالحمام تغسل الملابس والا بالمطبخ تخبص بالطبخ
وتجيك ريحتها كلها زفره وديتول

وتكفى عشاني ...لاتحطمها اذا حبت تسوي لك خزعبلات منتدى حواء
سلك لها وقول لها جميل جدا ومن اين لكي هذا الابداع
..وبطريقه غير مباشره وضح لها بعدين ان الحركات مخيسه

وانتبه ياقراندآيزر انك تقول لها بليله الدخله
ترى اهم ماعلي امي ..وتعكر الاجواء اوكي ندري انك امك عزيزه عليك
بس مو وقته



ان عدت اول شهرين بدون مشكله بينك وبينها
اقدر اقول لك ...برافو برافو برافو
مع اني ما اظن
لذلك روح ادخل على موقع المحكمه الشرعيه عشان تستوفي جميع متطلبات الطلاق من الحين


دم ددم ددم ددم دمتم سالمين
اذا فيها تكفيخ وحوس ونكش شعور دلوني الباب من الحين بس لااحد يدف

الموضوع الأصلي: هيا بنا نتزود لكي نتزوج || الكاتب: أغْ ـتِرآبْ~| || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات

لَاتِفي الكِلمآت بالنُطق .. أشْكُرك يآغآلي ,.