الأحرار , بقعا , تدرج , رحــاها , على

بقعا على الأحرار تدرج رحــاها

ناصر القحطاني


وين انت ياقضاي حاجات الاجواد
................................ياخي لنا حـــــاجه ولا احــــــــدٍ قضاها

ابطى الحيا بوجيهنا بس ما فاد
................................كثــــــــرت رسايلنا ولا احـــــــــدٍ قراها

قل للكبار العايشه عيشة اسياد
................................ان الصغـــــــــــار موصـــــــــله منتهاها

قل ياعرب لحقت على الشرب والزاد
................................والناس تمســـــي ما تحصل عشاها

ياهل الترف والمال والجاه وش عاد
................................ياهل القصــــــور اللي يذري ذراهــــا

يا عالم ابطيتوا تنمون الاعداد
................................ما هكذا وصى هل المـــــــــال طاها

حسوا بنا ياللي نعد انكم سناد
................................لا تتركون احـوالنا في شقــــــــــاها

جادت شيمنا لكن الحظ ما جاد
................................ما اعظم من انفسنا وما اصغرمناها

حسوا عشان نحس في طعم الاعياد
............................حسوا عشان الشمس نعشق ضياها

حسوا عشان نعلم الحب الاولاد
................................حسوا عشــــــان الارض ينبت ثراها

حسوا عشان نعيش ونغيض حساد
................................حسوا عشــــــان المزنه تصب ماها

حسوا عشان الخير والطيب يزداد
................................حسوا عشــــــان الأم ينمــو ضناها

حسوا عشان يغيب صوت ابن شداد
................................حسوا عشــــــان تضم ليلى فتاها

حسوا عشان الناس ما تصبح اضداد
................................حسوا عشــــان النار نسلم لظاها

خلو لنا معكم على الجم ميراد
................................حتى النفــــــوس يصد منها غثاها

لو انكم لجروحنا صرتوا ضماد
................................كــــــل اغنياها تلتفت لفقـــــــراها

العز للإنسان لا عاش ببلاد
................................الله على الراحـــه من اللي لقاها

مدري متى بنموت بس التعب زاد
................................قلنا ابشروا بالحــــب لحظة دواها

لو ما خذينا لقمة العيش بجهاد
................................جانا من ادنى ربعنــــا من خذاها

هذا زمن بيع الكلاوي والاكباد
................................والله علم باكـــــر وش اللي وراها

بيض الجباه وسمر الأيدي والاجساد
................................عيا العرق والكد يقطع ضمـــــاها

مع كل مطلع شمس ياكثر الانكاد
................................بقعا على الأحرار تدرج رحـــــاها

ندفع فواتير انتهاكات الأوغاد
................................وندفدف اعمارٍ قصير مــــــــــداها

لو الحياة امرار والعمر ينعاد
................................قلنا بدل هالمـــره اللي قفـــــاها

ناس على اللقمة ذبحها التوجاد
................................وناسٍ من التخمة تسوم اخوياها

حتى النفس صرنا نتنفس بالاقصاد
................................تكبــــــــر ديرنا ويتلوث هـــــــواها

يالله بكم متر مربع للأحفاد
................................لو ما ننول إلا القبـــــــر من ثراها

العيشه بخيمه من خيام الأجداد
................................أكــــــــرم لأجاويد تكرم لحــــــاها

قولوا لمن قفى بلحظات الاسعاد
................................والرعب بثه في النفوس وملاها

يا فقر لو قمنا جماعات وأفراد
................................تبشر ملايين الضعـــــوف بهناها

كم كانت الأقوام في شرك وإلحاد
................................لين أرسل الله بالصحيح انبياها

والشعر لو ما جاله آثار و ابعاد
................................عيبٍ على راعيـــــه فيه يتبــاها

الموضوع الأصلي: بقعا على الأحرار تدرج رحــاها || الكاتب: هيبة قلم || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات