اذبحي روحي على كف الغلا واحييني
ياهنوفٍ حبها سيطر على وجداني
وان تواجهنا بعد طول البطاء خليني
اشبع عيوني نظر من عودك الرياني
ايتغزل في عروقي لين يخجل عيني
حبك اللي من سويدا القلب لشرياني
وكان شفتيني سرحت مع الهدب صحيني
قبل يسرق رمشك الجذاب شوف اعياني
اقربي بين المعنق والنحر حطيني
بين وردٍ ماذبل في داخل البستاني
وان عطشت لثغرك المعسول منه اسقيني
لو عسل شفتك مايروى منه عطشاني
انثري ليلك وبطراف المساء غطيني
وكفكفيه ليا غفيت بكفك الملياني
ايه احبك يابعد قلبي وفرح سنيني
لك غلا بين الضلوع مشيدٍ بنياني
جعل وقتٍ يجمع قلوب الغرام يحيني
والجفاء والصد يبطي وقتها ماحاني
المشاعر فايضه ياغايتي ضميني
واسمعي ماتنتج اقكاري بنطق لساني