يا ليت إن الزمن يرجع .. ويبعث من سناه النور
ويا ليته يخاوينـــي .. على خطــوات .. رحلتـــنا

يا ليته ..بس يسلينــي .. ويجبر خاطري المكسـور
ويزيــل الهم من قلبـــي .. وبأهديه .. ابتسامتنا

رجعت البارح بفكـري .. مع الذكرى زمن وشهور
وشفت الصــورة اللـــي دونت.. فيها مسيــرتنا

تذكـــرت الغـلا كله .. وحبٍ صــادقٍ .. وشعــــور
تذكــــرت المشـــاعر يوم .. تجمعــــنا محبتـــنا

وجيت الحين أبي منك .. تصـف معاي في الطابور
وتسترجع زمن ولّــى .. وصـاغ أحـــداث قصتـــنا

تذكر .. يوم أقول لي الوردة الحمـراء .. بكل غرور ؟
وما لي دخل في حظــك .. وأقـول .. قانون لعبتنا ؟!

تقول شكواي للباري .. وعسى عمري معك مجبور
أنا لي الوردة البيضــاء .. وأبــد راضـــي بحصتـــنا

ولكن .. شوفي رزتها .. بجنب الحمراء فوق سطـــور
تبي من حبها فيـــها .. تخــــم الــروح .. ضمتنا

خنقت بعبرتــي لحظــة .. وشريط الذكريات يــدور

ويعرض من دنا الأرشيف .. شواهد .. من بطولتـنا

مضت صورة .. وجت صورة .. وفكري تايه محصـور
بحزنٍ .. خالط الفرحة .. وغاصــت فيه .. ضحكتـــنا

تجي الدمعة .. عقب بسمة .. وقلبي حاير مقهــور
يعانــي غربة أيامي .. وسط أشـــواك .. وحشتــنا

أنا القصــة .. وأنا عنوانها اللــي .. للفرح .. محظور
أنا اللــي في متاهات العمـر .. سطــرت ..عِبرتـــنا

أنا القلب المعنى يــوم .. فرحه في الـــدنا مغـــدور
أنا الوردة .. ومن جور الزمن .. فاحت .. بغربتـــنا

ضحكت من الوله لحظة .. وبكيت من الغرام دهور
لقيت العمــر بي يمضي .. علــى إيقاعات محنتنا

كتبت الشعر لعيونك .. سكبت إحساسي المهجـور
ومن هيـض القوافــي صغت .. ما خلّد حكايتــــنا

أنا وأنته .. مثل شـــاعر شعوره .. والحـزن جمهـور
قـــوافي الشعر .. نرسمها .. وننظــم له قصيـــدتنا

أنا وأنته مثل عاشــــق .. ترصـــد له زمــــانه زور
جمعــنا ورود هالدنـــيا .. وفـي الآخــــر تشتتـــنا


أنا وأنته .. حكاية حُب .. والكـــاتب زمن معـــــذور
يصـــوغ نهـــاية القصـــة .. قبل يبـدأ .. روايتــــنا



م