**مسلسل بقيت اشوفه بشكل دائم .. نفس المقدمات بتؤدي لنفس النتائج.**
- الطفل: ماما هو ربنا عنده عين زينا؟
- الأم: بس يا ولد عيب!! اقرا سورة الصمد وماتفكّرش في الكلام دا.
- الطفل: بابا هو كل حاجة موجودة لها خالق، طيب مين خلق ربنا؟
- الأب: ولد!! انت ازاي تتكلم كدا؟؟؟ انت هتكفر!!!!!!! استعيذ بالله من الشيطان الرجيم.
- الطفل: ماما هو الدين دا لو صح.. ليه كل الناس مش بتتبعه؟
- الام: ولد!!!!! انت اتجننت!! ازاي تقول كدا؟
تمر سنوات ...
الولد مش بيصلّي ..
مش بيصوم ..
مش بيمسك مصحف ..
بيستهزأ بالدين ..
بيجاهر بالمعاصي ..
الولد ألحد .. !!!
الأم والأب بدهشة وانهيار: ازاي دا حصل!!!!!
دا احنا قلناله استعيذ بالله من الشيطان الرجيم ..
وقلناله يقرا صورة الصمد!!
كنّا المفروض نعمل ايه تاني اكتر من كدا!!!!
مش كل سؤال عن الله عز وجل.. اجابته "استعذ بالله من الشيطان الرجيم"
لما الرسول علّم الصحابة انهم يستعيذوا بالله من الشيطان.. دا كان علاج لحالة محددة.. حالة صحابي مؤمن بالله.. عنده قوة العلم واليقين.. الصحابي كان منزعج من بعض الوساوس والخواطر.. فالرسول ارشده للاستعاذ بالله من الشيطان.
لكن النهاردا.. مع انتشار الجهل عن الله وعن الدين.. لما طفل او شاب يسأل اسئلة يبان منها انه فعلا مش عارف من ربه.. ومش عارف اساسيات دينه.. يبقا العلاج مش الاستعاذة (اللي مش عارف اصلا معناها) بالله (اللي هو اساسا مش عارفه وبيسأل عنه) من الشيطان (اللي هو اصلا مش مقتنع بوجوده)
لو كانت القضيّة هي الجهل بالله وبالدين.. فالعلاج هو العلم عن الله وعن الدين..
ولو كانت القضيّة الشك في الله.. فالعلاج في الادلة العقلية علي وجود الله وعلي صفاته وافعاله..
لكل مقام مقال.. ورد في القران حالات كتييييير ومختلفة من الشك اوالجحود اوالجهل بالله وبالدين.. ولكل حالة، ربنا رد عليهم بردود وبدلائل عقلية تناسب الحالة والموقف.. عشان الانسان يفكّر.. ويقتنع.. ويتيقّن من صحة دينه.. دا أسلم للعقيدة