منتديات كلك غلا - كلك غلا أطول قصة بالعالم

فكرة جديدة اعتقد انها لم تطرح في أي منتدى سعودي او خليجي او عربي او أي منتدى بالعالم.

فكرة تحتاج لتفاعل جميع أعضاء المنتدى

الموضوع ( قصة لاتنتهي )

راح أشرح لكم الفكرة بالتفصيل ..

الفكرة عبارة عن قصة يتشارك في كتابتها جميع أعضاء المنتدى .. كيف ؟؟

انا راح اكتب بداية القصة وكل شخص يحاول يضيف ويكمل القصة ..

مثال :

بداية القصة :

طلع فهد بسرعة من البيت ماسك عقالة بيده و شماغة على كتفه وركب سيارتة كان مستعجل كثيير رن جوالة وهو يسوق ..

فهد : هلا خالد .

خالد : فهد وينك تأخرت الاختبار راح يبدأ ؟؟

فهد : انا بالطريق دقايق وراح أكون عندك ..

خالد : اوكي باي .

..............

يدخل أي عضو ثاني يضيف جزء جديد للقصة .. <<< وهذه النقطة الحلوة والمهمة في الفكرة كيف ؟؟

راح أقولكم كيف

العضو/ة اللي راح يضيف الجزء الجديد للقصة ممكن يكون شخص يحب الأكشن ..

طبعا القصة من الخيال وما تمثل أي دولة وبهذا ممكن تصير مثل الافلام الاجنبية .

مثال :

بعد انهى فهد المكالمة زاد سرعته أكثر واكثر ومن زود السرعة والاستعجال قطع الاشارة !!

بعد ثانية وحدة بس كانت الدورية وراه .

فهد : لاحول هذا اللي ناقصني على الصبح ..

الدورية : وقف يا صاحب الكرولا .

فهد : اها بس الحقني للجامعة .

وبدت المطاردات وصاروا دوريتين وثلاث وأربع كلهم يحاولون يوقفون فهد .

..........

العضو/ة اللي بعده ممكن يكمل بنفس الاكشن وبنفس الفكرة

أو يكون شخص يحب يضيف جزء حزين

لما وصل فهد الجامعة نزل مسرع يحاول يلحق اختباره بس الدوريات وصلت ومسكوه فهد واضربوه وبعدها بدا احد العساكر يفتش فهد والباقين يفتشون سيارته ..

كان فهد يصرخ من الألم يصرخ على الأمل اللي ضاع قدام عينه وعد امه انه راح يتخرج ويكون مهندس كبير تفتخر فيه كان هذا اختبار قبول دخول الجامعة .

رن جوال فهد قام يتلفت يمين ويسار وهو يقول جوالي جوالي ..

مسك العسكري الجوال ناظر فيه وقال : من هو خالد ؟؟

فهد بألم : تكفى ابغى اكلمة

العسكري : تكلم من هو خالد ؟؟

فهد : ولد عمي بس تكفى ابغى اكلمه هو ينتظرني .

ابتسم العسكري وقفل الجوال !!

صرخ فهد بقوووة بأعلى صوووته : لاااااااااااااااااا

...............

العضوة أو العضو اللي بعده ممكن يكمل ويضيف جزء رومانسي ..

نوف كانت رايحة للاختبار وفجأة وقفت لما شافت فهد يبكي وينضرب ويصرخ حست بشي غريب كأنها تعرفه من قبل كان ودها تروح وتكلهم يتركونه لكنها خافت ماقدرت وبعد ما أخذو فهد معهم دخلت الجامعة و خلصت الاختبار .. كان باين ان في شي شاغل بالها ..

مسكتها سارة من كتفها وقالت : نوف وش فيك ؟؟

نوف : لا مافيني شي ؟

سارة : لي ساعة أكلمك وانتي ولا هنا !! تفكرين بالاختبار .

نوف هزت راسها : لا .

................

وش صار في فهد ؟؟ وش تفكر فيه نوف ؟؟ ومن هي سارة ؟؟ ووين خالد ؟؟

كل هذا راح نعرفه من الجزء اللي راح يكتبه العضو اللي بعده .. أو يمكن نعرف بعض من هذه الأشياء ..ويمكن مانعرف .. أو نعرف أشياء جديدة .

أصعب مافي الموضوع : ان بعض الاعضاء يمكن يتخوف وما يعرف كيف يكتب قصة ولكن المشاركة والمتابعة راح تفيد الكل وتطور من مستوى الكتابة المهم انك تحاول وتشارك ..

ملاحظات مهمة جدا :-

aهذا الموضوع للحوار والنقاش وتبادل الأفكار والتعليقات أما الموضوع الجديد سيكون بعنوان (( كلك غلا قصة لا تنتهي ((.. وفي موضوع القصة نضيف الأجزاء فقط بدون أي تعليقات لتكون لنا قصتنا اللتي أبدعناها بأنفسنا ..

bالقصة لا تنتهي ويمكن تستمر سنين وسنين بوجود بقايا حب أو بعدم وجوده لذا لا أحد يكتب جزء يموت فيه بطل القصة !!؟ بالعكس اتمنى تزيد الشخصيات وتتوسع القصة .

cكل جزء جديد يضاف للقصة ضروري يبدأ من حيث انتهى العضو اللي قبله لكي تكون القصة منسقة ومتواصلة الاحداث .

dالفترات تكون متقاربة مثلا واحد يكتب ( بعد ماصار فهد عمرة 50 سنة !! او بعد عشر سنين أو بعد سنة ) كل هذه مرفوضة فهي تضعف القصة ويصير التفكير بالنهاية أكثر .

لكن يمكن للعضو انه يكتب ( و بعد شهر صار كذا وكذا .... ) .

eالجزء ممكن يكون يكون قصير مثل اللي ذكرته لكم بالأمثلة ويمكن يكون أكثر من كذا بكثير للجميع الحق بالكتابة والاستمتاع .

f يجب أن لايضيف العضو جزئين متتاليين أو أجزاء متتالية بل يجب اعطاء فرصة للأعضاء للمشاركة واضافة احداث جديدة وأفكار جديدة .

fالتفكير والكتابة تكون لتطوير القصة وزيادة الاثارة و الاحداث أما النهاية انسوها نهائيا.

g ولكن لاتنسوا انها ستكون أطول قصة بالعالم وكذا يدخل منتدانا موسوعة جينس <<< هذا صعب وليس مستحيل نحتاج لبعض الجهد والتفكير والاستمتاع فقط .

* اذا احب أحد الأعضاء إضافة جزء جديد يجب أن يكتب هذه الجملة ( الجزء القادم بقلمي ) وبعدها ياخذ وقته الى يومين بالكثير حتى يضيف الجزء الجديد للقصة وفي هذه الفترة يجب على الاعضاء الانتظار وعدم إضافة أي جزء حتى مايكون تداخل في الأجزاء أو الأفكار . وبعد اليومين يحق لأي عضو ان يكتب نفس الجملة وبعدها يضيف الجزء الجديد .

l القصة راح تبدا بعد فترة قريبة بإذن الله استعدوا بأقلامكم وحماسكم ..

طلبات بسيطة :-

aاتمنى ان اجد تفاعل الأعضاء ومثل ماذكرت لكم بدونكم ستفشل الفكرة .

bاتمنى من الادارة تثبيت الموضوع والقصة لكي تكبر بيننا و تبقى سنين وسنين ذكرى للأعضاء و رمزا للزائرين بأننا منتدى فكر وإبداع لايتوقف .

يمكن تضاف بعض الملاحظات بوقت لاحق عموما أي شخص عنده استفسار أو سؤال أو اقتراح يتفضل وأنا حاضر

كلي أمل بتفاعلكم لكتابة أطول قصة بالعالم

حصريا لكلك غلا

بقلم : بقايا حب

تحياتي لكم