مش عارفة ليه الاسبوع ده ماسك معايا اني اتكلم عن ست الكل شوية ...
يمكن علشان شوفت إن فيه مفاهيم كتير ملخبطة عند كل واحدة فينا .. وكلامي مخصوص لربات البيوت ...
طيب نسمي بسم الله كدة وتعالي اقرأي الكلمتين دول ... يمكن يكونوا جرس يرن وينبهك قبل العمر مايفلت منك ...
بتربي وبتكبري ... وتراعي وتخدمي ...
وتحملي الهم وتفكري .... ده راح .. وده جه ..
ده ذاكر .. ودي نجحت ... ده بيشتغل .. وبيصرف ...
دول اتجوزوا .......... ها وخلصت بقا الحياة كدة ... ولا لسة هنعيش في مشاكلهم بعد الجواز وتربية احفادنا كمان ....؟!!! https://www.facebook.com/images/emoj...1/16/1f609.png😉
تمام حلو أوي ... وليكي الأجر والثواب كمان يا ستي ...
على فكرة أنا معنديش اعتراض خالص على كل ده طالما بتعمليه بحب ورضا واللي حواليكي مقدرين ... ونقطة مقدرين دي هنتكلم فيها بعدين ....
https://www.facebook.com/images/emoj...1/16/1f331.png🌱بس في وسط الزحمة دي كلها والعمر اللي بيجري ده عملتي إيه لنفسك انتي ؟!
https://www.facebook.com/images/emoj...1/16/1f331.png🌱اتعلمتي كام مهارة تنفعك وتشغل وقتك بعد ما البيت يفضا عليكي وكل واحد فيهم يبقى مشغول بحياته ؟!!
https://www.facebook.com/images/emoj...1/16/1f331.png🌱قريتي كام كتاب تفتحي بيهم عقلك وتزودي بيهم معرفتك وتنمي ثقافتك علشان ولادك وانت بتربيهم و احفادك لما يجوا للدنيا مايلاقوش ان انتي في وادي وهم في وادي .... ؟!!!
https://www.facebook.com/images/emoj...1/16/1f331.png🌱اتعلمتي ايه من العبادات زيادة عن الصلاة اللي بتأديها وانتي عنيكي في وسط راسك والصوم ... علشان تزودي قربك من ربنا وتشكريه على نعمه ؟!!!!
https://www.facebook.com/images/emoj...1/16/1f331.png🌱بلاش كل ده يا ستي هل بتعملي وبتضحي بوقتك ده وانتي راضية ومبسوطة وحاسة انك بتعملي حاجة بتحبيها .... ولا وانتي كلك ألم ووجع جسدي ونفسي على العمر اللي راح واللي لسة هيروح ... و بتقولي لنفسك اهو ده حظي ونصيبي ولازم أرضى ... ؟!!!!!
https://www.facebook.com/images/emoj...1/16/1f331.png🌱أخدتي بالك من صحتك .... ولا ضاعت هي كمان ؟!!!!!!
عمرك فكرتي انك توفري لنفسك ساعة في اليوم ... ساعة واحدة بس تبقى ملكك انتي .. تعملي فيها كل اللي بتحبيه واللي نفسك فيه ...
أنا مش معترضة على فكرة القسمة والنصيب ... لكن ربنا عمره ما بيرضى لينا بالبهدلة ولا اننا نظلم نفسنا و منديهاش حقها ...
علشان كدة اللي انتي فيه ده مش نصيبك ... ده اختيارك انتي ...
انتي اللي من البداية عودتي اللي حواليكي انك ليهم وبس ... بوقتك اللي هو عمرك ..... وصحتك .... ونفسيتك ... وجسمك ... ده حتى تفكيرك ... ولو قولنا إن فيه جزء من تفكيرك لنفسك هتبقي بتقضيه في الحسرة عليها ....
زي ما عودتيهم انك ليهم ... عوديهم انك ليكي الوقت اللي يخصك ... اه هتتعبي شوية ومش هكدب عليكي واقولك ان الموضوع سهل ومش هتقابلي انتقادات كتير ...
وكلام من اللي يحبطك ... وتريقة ....
لكن على قدر إصرارك على قدر ما الفترة اللي انتي محتاجة انهم يتعودوا فيها على كدة هتبقى قصيرة مش طويلة ...
ادي لنفسك حقها دلوقتي ... علشان ماتحاسبكيش هي لما العمر يعدي عليكي أشد حساب ... صدقيني مش هتستحمليه وهتضيعي اللي باقي كمان في الحسرة والندم ...