منتديات كلك غلا - أطفال كنا ..... بس كنا مجانين

[read]قبل أمس أنا وياك نلعب على الطين
وأحلامنا قبل أمـس كانـت تشابـه

أطفال كنـا .. بـس كنـا مجانيـن
مـا فيـه شـيٍ بالوسيعـة نهابـة

كنـا صغـار ولا نحسّـب لبعديـن
بعدين .. والله ما حسبنـا حسابـه

ايامها .. والقلب مـا ياسـع ثنيـن
كنتي فرح عمري ولا هـي غرابـة

كنتي بعينـي غيـر كـل الملاييـن
أحسك أقرب مـن جميـع القرابـة

أشوفهم في عين .. وأشوفك بعيـن
أيـوووه يـا ذاك الغـلا ينحكابـه

نعيـش حاضرنـا وكنـا سعيديـن
نرضى بواقعنـا ولـو هـو خرابـة

هذا مع انا صغار كنا علـى الديـن
نضحك على همـال دمـع السحابـة

كنتي على انغـام الربابـة تناميـن
وأنا .. يصحيني .. ونيـن الربابـة

واليوم حنا وين ؟ وأحلامنا ويـن ؟
لو شافنا (قبل أمـس) زاد اغترابـه

(قبل امس) هذا.. موّت سنين وسنين
وحلمٍ يموت .. وحلم ثانـي شقابـه

تدرين وش عمر الزهر بالبساتيـن؟
مثل الفرح .. لا شاف هـم الكآبـة

جيت أربعيني.. وأحسبهـا ثلاثيـن
شيب شبابي.. ما اهتنا في شبابـه

والله وشيبنـا.. وشابـت قوانيـن
وماتت ثوابت حلمنا ..وسط غابـة

ورغم اختـلال معـادلات الموازيـن
وطيش القلم في مفـردات الكتابـة

تبقين في خفـاق نبـض الشراييـن
وأبقى على عهدٍ .. لبستـي ثيابـه

وسرٍ كتبنا مفرداته.. علـى الطيـن
في ذمتي .. ما فيـه حـيٍ درابـه[/read]