منتديات كلك غلا

منتديات كلك غلا (https://www.klk-gla.com/vb/index.php)
-   ๑۩۞۩๑ القصص والروايات ๑۩۞۩๑ (https://www.klk-gla.com/vb/forumdisplay.php?f=25)
-   -   رواية #مشاعر_مطرطشة الموسم الاول الحلقة 19 (https://www.klk-gla.com/vb/showthread.php?t=51634)

همسه غلا 04-15-2018 06:18 PM

رواية #مشاعر_مطرطشة الموسم الاول الحلقة 19
 
#مشاعر_مطرطشة


الموسم الأول


الحلقة 19


صباح الباكر


خولة : هيا تعال يا فتحي افطر
فتحي فتحي وينك
خشت خولة للمربووعة مالقتش فتحي قاعد
فتحي من الصبح بدري طالع
ماشي شور محطة الحافلات
عشان يسافر شوور طرابلس برّي
""""
سهام : كنك ما مشيتش للعمل اليووم مزلت راقد وقت عليك
احمد : مش ماشي اليوووم قاعد امعاك
سهام : والله ماني زعلانه يا احمد امشي عملك عادي
احمد : قتلك مش ماشي قاعد ,, حنوتيلك الفطوور وانجيبه لكي
لازم انرضيك اليوووم
سهام : والله راضية ياحبيبي
""""""
ايمن قاعد في سيدي خليفة عند واحد من اصحابه
ويخطط كيف يقتل احمد واسلام ومازن وفارس
وخاصة اسلام عشان غدر بي وكذب عليه
"""""
فاطمة : هيا نرمين نووضي الساعة توا 11 مزلتي راقدة
نرمين : هيا توو انووض
فاطمة : حي عليك كنهن اعيووونك
نرمين : كنهن ,,
فاطمة : معقووله شكلك الليل كله تبكي
نرمين : مدوّري شي جو تمام
فاطمة : باهي ضمي مكانك ,, وتعالي انهدرزو مع بعض عالقهوة
نرمين : تمام
"""""
فتحي ماشي في الطريق شوور طرابلس
سامحيني يا لامار ..
سامحيني ياخولة ...
سامحيني يانفسي ...
"""""
حنين : هيا يامازن انا واتية انت اللي مزلت ماوتيت رووحك
مازن : غير كنت انحول في اشنبااتي
حنين : نعليا منا السّلَفِي اللي يهبل
مازن : ههههههههههه
حنين : بعد شحات وين نمشووو
مازن : غير نووصلوو منتجعات شحات وانفكروو بعدها
حنين : حبيبي فكنا منها شحات خلينا هنا مش قاعدين في فندق في بنغازي
مازن : انغيروو جونا بس ,, كنك في حاجة
حنين : امرايفة علي بابا واختي لامار وماما
مازن : سيوورك حتشوفيهم اعيووني
"""""
فارس امكسد في السوبر ماركت
ويفكر في نرمين واخذة عقله
مش عارف شن ادير امعاها
رن نقاله
فارس : مش قتلك معش اترني عليا
نرمين : رايفت عليك رنيت عليك وراني حبيتك انا
فارس : وحتى انا حبيتك ,,
نرمين : باهي عليش الجو اللي امس اللي درته
فارس : رقالي عشان قعدنا انلبّزوو
وخشينا علي اجواء مش لنّا بكل
نرمين : باهي كل مشكله ولها حل
فارس : شن الحل
نرمين : معش انلبزووو ومعش انخشو في اجواء مش لنّا
فارس : ههههه عليك حل امقنّط
نرمين : والله انحبك ونبيك ,, مانبي حد غيرك
فارس : وانا نبيك حلالي وام اعيالي
نرمين : بعد خطرها امس جووني خطّاب
فارس :بدينا في اسطوانات جووني خطاب
نرمين : ههههه والله نحكي جد
فارس : من اللي جووك
نرمين : عارف يابارد كنت مضايقة ورقيلي
سمعت صوتك تريحت وجوي قعد رايق بكككل
فارس : باهي من اللي جوو يبوو يخطبووك
نرمين : عيت عمتي يبووني لولدهم
فارس : يبووك لولدهم والله تحكي جد ,,
سبحان الله نحسابهم يبووك لبنتهم
نرمين : تي بطّل سماطة
فارس : الحمد الله حاجزينك نحنا من مازن
نرمين : انت اتحبني صح
فارس : لا امكسد قلت انمشي وقتي وخلاص
نرمين : نحكي جد ’’ بطّل سماطة
فارس : اها انحبك مووووت
نرمين : طمنتني
فارس : لكن مزلت نفس ماقتلك
معش حنكلمك لين يقعد بيناتنا حاجة رسمية
نرمين : في عينك حنرن عليك واترد عليا وانت ساكت
فارس : راسك امسكر من يوومك
" فارس ونرمين بدت اترد علاقتهم نفس قبل
بشرط معش يردوو الاجواء اللي كانوو اديروو فيهن "
" وفعلا اغلب الخطووبات اللي انفسخهن كان من الجو هذا "
"""""
فاطمة امكسدة علي قرووبات الروايات
فاطمة شافت ديندار فاتح ماسنجر خشتله
فاطمة : السلام عليكم
ديندار : عليكم السلام
فاطمة : معلش الحلقة 17 نزلت ولا لا
ديندار : نزلت اها امبدري تلقيها في القروب ولا ع صفحتي الشخصية
فاطمة : باهي نبي نسالك سؤالين ممكن
ديندار : تفضلي
فاطمة : انت امنزل منشوور انك شين ودبة واقصير واتخوف في القرووب
انت مش هكي صح ,, اطيّر في العين ,, واحساسي انك شاب وسيم
ديندار : لا نحكي بجديات مانكذبش ولا انطير في العين
فاطمة : مش امصدقة
ديندار : خلاص خليك عايشة وهم ان ديندار شاب وسيم
فاطمة : وسيم لا محمد ههههههههه
ديندار : نضحك مثلا انا توا ؟؟؟؟؟؟
فاطمة : عليك اللي حصلة كلّا انت
ديندار : شن سؤالك الاخر
فاطمة : انت من قبل امنزل منشوور انّ
مشاعر مطرطشة حتكوون رواية طويلة
وامس نزلت منشوور انّ مشاعر مطرطشة قريب تكمل ,,
شن اللي خلاك اتغيير في كلامك
ديندار : الرواية علي حسب مزاجي ,, ومش دايرلها نهاية
مزاجي قالي خلاص انهيها ننهيها ,,
مزاجي قالي لالا طوّلها انطولها ..


فاطمة : لكن هكي نعتبرك عندك انفصام في الشخصية
ديندار : لو خاشة علي صفحتي الشخصية وقاريتي النبذة امتاعي
كاتب عندي انفصام في المشاعر وانطوائي ومش اجتماعي
يعني ماقلتش حاجة جديدة
فاطمة : باهي ممكن اخر سؤال
ديندار : نستاذنك توا مشغوول اشوية
فاطمة : خووذ راحتك
"""""
"""""
نرمين : تعالي ياماما خبر عاجل في القنوات الليبية
ام مازن : شن الخبر شن الخبر
نرمين : العثوور على فتاة مقتولة في شقة
والعثور علي رجل مقتول في شقة ثانية
ام مازن : ياربي زعمك شن هذا
نرمين : معش تفهمي شي في ليبيا
بعد طلعنا من حالة الانتحار
خشينا علي القاتل المجهووول
"""""
احمد : هيا حلي فمك
سهام : حليت
احمد : هم ياجمل
روان : حتى انا وكلني نفس ماما
احمد : هم هم ياجمل
سهام في حضن احمد وفرحانة بككل
عشان يرضّي فيها قااعد
"""""""
لامار : بابا مش تعطيني بعدين السيارة نمشي لكلية التربية
انشووف شن صار في موضوعي نقدر انجدد قيدي ولا لا
بات حنين : بالك تبيني انشيلك انا خير
لامار : لا يابابا متخافش حنهني ع روحي ,, ومرات انطول
مانبش انشحورك امعايا ,,,
"""""
فاطمة : جووك رايق توا ,, كيف كنا وكيف اصبحنا
شكله الطير راضي عليك
نرمين : تي ووووجك ,, سمعتي عليه القاتل المجهوول
فاطمة : من هذا
نرمين : هذا يقتل في الناس في شققهم
فاطمة : توا كيف سمعتها منك ,, مع اني امسكدة عالفيس ماشفتهش
نرمين : اي امكسدة انتي مشيتيها قرووبات روايات وخلاص
ماتندري عليها ومن وين تفتح
"""""
عواجل صفحات الفيس
قاتل مجهووول يقوووم بالقتل في بنغازي
علي المواطينين اخذ الحيطة والحذر
"""""""
احمد : خلاص توا خليني نمشي اشوية للعمل حنرد عالغداء
سهام : والله ماني زعلانة ولا مضايقة منك انحبك انا
احمد نزل ومشَى للمكتب امتاعه
""""""
مروان : ليا واجد نرجى فيك كنك طولتي يانجاح
نجاح : الدكتوور هوو اللي طوّل في المحاضرة مش انا
مروان : تمام ,, هيا وقت ورايا شغل مزال
نجاح " اخت مروان وتقرا في الجامعة "
نجاح : حصلتلك عرووس علي كيف كيفك امعايا في الجامعة
ومحترمة وراقية وانيقة
مروان : قتلكم نبي نرمين عليش تسكير الراس
انتي وامي وباتي
وماتبووش نسبتهم
نجاح : راه نرمين امتاع شباب معرووفه كنك انت وين عقلك
مروان : بالله عليك غيريلي المووضووع وفكينا من سكنانك
نجاح : سمعت عالقاتل المجهوول اللي يقتل في الناس
مروان : اها شفته عالفيس مش عارف شن قصته
مرة اسد مطلووق وتوا قاتل مجهوول
مش عارف نحنا في ليبيا
ولا في فيلم رعب
"""""
سهام : اه اه اه اه اه اه اه اه اه اه
روان : كنك ياماما
سهام : اه اه اه اه آآآآآآآآآآآآآآآه
روان تبكي كنك ياماما
سهام : ياروان هاتي النقال انرن علي احمد
سهام : اه اه اه اه اه يابطني
سهام : هيا رد رد رد ياا حمد اه اه اه اه
احمد : نعم ياحبي
سهام : اه اه اه تعااااااااااااال يا احمد بطني
احمد فات المكتب وجا يجري شوور الشقة
""""""
ايمن : مرحبتين بيك يابووفا
بووفا : مرحب بالزعيم
"بوفا قاتل ماجور
وقام بعمليات قتل مقابل ملبغ مالي كبير
ايمن : قالولي انت حتهنيني يابووفا
بوفا : انا خدامك اي شي عطيني افلووس والباقي عليا
ايمن : في واحد اسمه اسلام ,,,
هذا الذراع اليمنى للافندي احمد
لازم تقتله ’’
بووفا : عطيني بيناته ووين مكانه والباقي عليا
ايمن : تمام ,, اما فارس حنعرف كيف نووصل فيه بطريقتي
وبعدها جايكم يامازن واحمد
""""""
احمد : وين امك ياروان
احمد شافها في الدار
مسكها وقعد يمشي امعاها بشوواش
شوور السيارة شايلها للعيادة
وهوو يسووق في السيارة
هي اتعيط بالقوووة
"""""""
لامار وصلت لكلية التربية
خشت للادارة امتاع كلية التربية
كلهم اندهشوو من جمالها
ووقارها واحترامها
وعفّتها ,,
عشان تنهي اوراقها واتجدد قيدها من جديد
صاحب مكتب الادارة : تفضلي اختي
لامار : انا كنت اموقفة قيدي نقدر انرد انجدد قيدي ولا لا
صاحب مكتب : اكيدة تقدري ,, لو مخدمناكش من نبوو نخدموو
لامار : بارك الله فيك
""""""""
حنين : شكلك ودّرت الطريق يامازن
مازن : لا ماودرتش ماشي تمام لكن راح مني الوصف
حنين : وين شلّتنا بس شن هالمكان المهجوور
مازن : غير ما اتركبش علينا ,, حنشووفوو واحد يورينا طريقنا اكويس
حنين : آهُمْ في اثنين قدامك شووفهم
مازن : السلام عليكم
ردو عليه
" عطينا افلووسكم ونقالاتكم انخلووكم اتكملوو طريقكم "
مازن : هههههههه تحكوو جد انتو
واحد من قطاع الطرق : هيا انزلوو انتم الاثنين من السيارة
" نزلوو مازن وحنين من السيارة "
واحد من قطاع الطرق جا لعند حنين وجا يبّي يحول خمارها ,,
دغري مازن طلع اسلاحها من وراه ضهرة وضربه بطلقة في اكراعه
حوّل يدّك يافاسد
" : آآآآآآآآآآه "
حنين دغري قعدت كارسه وراء مازن
اللي جاته الطلقة طاح في مكانه
والاخر هرب خاف من الاسلاح
طلعوو اي كلام ومش قطاع طرق
كانوو يخوّفُوو فيهم بس
"""
مازن طبس علّي اضربه في اكراعه
جا يبي يسحب ويقتله
حنين : لالالالالالا مااااااااازن ارجوووك
مازن : عشان خاطرك بس ,,
وظربه بكراعه علي وجه
وقاله منتج شحات وين كلب ,,
رد عليه : تلقى ع طول الطريق هذي علي يدك اليسار
مازن : هيا اعيوووني نمشووو
حنين : مش متريحة خلينا انردوو خير لبنغازي
انعيشوو احلى جو في بنغازي
مازن : كنك خفتي خلينا انكملوو الطريق
حنين : حبيبي مانش مطمّنة بككل
مازن : شن رايك انديرو زيارة الامي وخواتي
وبعدها انردو للفندق
حنين : حتى هذا راي
مازن : توا عرفتي عليش انشيل امعايا في اسلاحي
حنين : عرفت اكيدة يا اعيووووني انحبك موووت
مازن : كنك ترعشي وخايفة
حنين : من الاكشن اللي صار توا ,,
انت متعود انا مش ليا الجو هذا
وجديدة عليا
مازن عطاها بووسه ع جبهتها ,,
مازن : هيا اركبي انردوو لبنغازي خير
"""""
احمد قاعد قدام غرفة العمليات يرجى في اي بُشريات
دكتوور طلع من غرفة العمليات
دكتوور : للاسف البيبي طلع ميت في بطنها
احمد انصدم لالالا يادكتوووور غير قوول خير
دكتور : ربي يصبركم علي افراقه
احمد : ان لله وان اليه راجعووون
قعد احمد يضرب في باب غرفة العمليات
دكتور : كان ولد اللي مات
احمد يضرب في راسه عالساس
تريحت يا احمد قتلت البيبي امتاعك
تريحت ديما اتخلي فيها تحرق عليك
واتخاف عليك
وقعد يخبط في راسه في الساس ومش امصدق
روان : بابا وين البيبي اللي قتوولي جاي نعلب امعايا
نزل احمد وقعد يحضن في روان ويبكي بعبرته
اول مرة روان اتشووف باتها يبكي قدامها
دكتور : تقدر اتخشلها كان تبي اتشووفها
احمد خش شوور سهام
ومسح دموووعه
سهام تبكي بعد سمعت من الدكتوور ان
البيبي اللي في بطنها كان عيل
احمد : خلاص ما اتزعلش رووحك قدر الله وماشاء فعل
سهام : حرمتك من العيل اللي خاطرك فيه
احمد : عادي اعيووني اهم شي انتي صحتك اكووويسة
احمد مضايق وزعلان ويأنب فيه ضميرة
"""""
ام مازن : الباب انفتح شووفي من هذا يانرمين
مش معقوولة مازن حلّا جا للحوووش
نرمين : مااااااااااااااااااااااااااااااااااازن
فاطمة كانت امكسدة عالفيس سمعت نرمين اتقول مازن
جت تجري للباب
فاطمة : مااااااااااااااااااااااااازن خونا الغالي
ام مازن سيّبت اللي في يدها
وجت شووورهم
نرمين وفاطمة وامهم حاضنات مازن
ام مازن : انستووو
فاطمة : شن كان شهر العسل
حنين : اي شهر حتى اسبووع ما سكرنا هههههه
نرمين : رايفنا عليكم انستوو الحوووش
ورحبّن نرمين وفاطمة بحنين واجد
بالاحضان والبوووس
بعدها حنين خشت لغرفتهم
ومازن قعد يهدرز مع امه وخواته
""""
بات حنين : شن صار امعاك يالامار
لامار : تمام سجلوووني وجددت قيدي الحمد الله
الشهر الجاي نبدا امعاهم رسمي
بات حنين : الحمد الله ,, امرايف علي حنين واجد
لامار : حتى انا امرايف عليها واجد
بات حنين : انرن عليها رقمها مقفل مزال
لامار : ماتخافش عليها اكيدة مع مازن في الحفظ والصوون
بات حنين : لا اكيدة بدوون شك هذي
""""""
صاحب الحافلة اللي قاعد فيها فتحي
" توا كيف وصلنا لسرت ,, نتريحوو اشوية في استراحة
وانكملووو طريقنا "
فتحي وهو في الحافلة يحكي مع رووحه
" زعمك شن دايرة يالامار توا
يعلم الله ضلمتك واجد في حياتك
وقصرت في حقك "
"""""
نجاح : مش عارفة ياماما شن يبيها نرمين بس
وفاء : مش عارفه حتى هووو غريب بكل
نجاح : تي معرووفه بنت مش تمام في الجامعة
كانت دايرة علاقة مع شاب اسماها الصادق
وبعدها فاتووو بعضهم يعني بنت عليها
اخطووووط حمر واجد
وفاء : ياريت يقوولوو نرمين معطي فيها كلمة او محجوزة
لانهم مايشرفووون هذوووما
نجاح : ياااااااااااااريت
""""""
احمد قاعد قاعد جنب سهام عالسرير امتاع غرفة العمليات
وحابس دمعته بالسيف
سهام ساكته نفس المصدووومة
احمد : ماشي للمحل انجيب عصير وكيكة اكيدة جعانة
سهام ساكته وما اتردش
احمد وهوو ماشي ماسك عبرته
بمجرد ماطلع من باب الغرفة
قعد يبكي يمشي وهو يبكي
يانب في ضميرة
في باله هو كان السبب في قتل ابنه
وهوو يبكي جا تليفووون من اسلام
اسلام : اهلين افندي احمد
احمد : نعم
اسلام : كنا صوتك يا افندي احمد
احمد : ابني توفة الجديد ,,
اسلام : ان لله وان اليه راجعوون
احمد : يعلم الله قلبي محرووق عليه
كنت خاطري نبي
لكن قدر الله وماشاء فعل
لعله خير
مانبش نكفر بالله
وانقوول عليش مات
اسلام : معناها مش وقت نحكيلك توا
احمد : شن فيه احكي
اسلام : سمعت عليهم البنت والشاب اللي انقتلوو في شققهم
احمد : اها دايريين ضجة اعلامية
اسلام : البنت اللي انقتلت لقووها في شقة فتحي
مقتووولة ,, وفتحي مش قاعد ولام اوراقه كلهن
احمد : شن شن ,, فيش تحكي انت
اسلام : كيف مانحكيلك ,, البنت المقتولة في شقة فتحي
ومزال جاري التحقيق في القضية
احمد : لو في اي جديد قووولي
اسلام : حاضر افندي احمد
"""""
مازن : صار قتووولي عمتي وفاء جت هنا
ام مازن : اها
مازن : مش ناسي شن داروو فينا لما مات باتي
ومش ناسي معاملتهم لينا
ومش ناسي تشويه سمعتنا
دارووك يا امي وحدة عاهرة ومش تمام
ام مازن : الله في الووجوود يامازن
مازن : حنخلي فارس ادير حاجة رسمية الاسبووع هذا
حتى لو ماعندش افلووس انا حنتكفل بالجو كله
وامتى مايحصلهن اردهن ليا
ام مازن : ربي مايحرمنش منك
نرمين : ربي يخليك ليا
فاطمة : ربي يحفضك ويرعاك لنّا
مازن خش للغرفة امتاعه
شاف حنين اتكلم بالنقال
حنين : ليكم وحشة واااجد
لامار : باهي اللي فتحتي نقالك كنك كنتي امسكرتيه
بابا يسلم عليك واجد وامرايف عليك
حنين : انتم اكثر ,, كيف حال صحة ماما
لامار : مازلت كيف ماهي لكن الحمد الله على كل حال
وحنين وهي تحكي مع لامار
جا مازن وعطاها بووسه علي خدها اليميين
هي اتبحت فيه وتضحك
حنين : بطل اشوية
لامار : كيف بطل مافهمتش
حنين : لا مش شوورك
مازن قعد حاضن حنين ويبووس فيها بشواش
وهي تحكي مع اختها بالنقال
واتهدرز امعاها وتسال علي حال هلها
وآخر اخبارهم
"""""
صاحب الحافلة اللي راكب فيها فتحي


"" قريب انخشوو لطرابلس الحمد الله علي سلامتكم ""


فتحي : ان شاء الله اترحّب بيا يانزار بس


"""""""

مزاجـيه 04-15-2018 11:47 PM

رد: رواية #مشاعر_مطرطشة الموسم الاول الحلقة 19
 
تخطت حروفكم
معانى الابداع


All times are GMT +3. The time now is 05:33 AM.

Powered by vBulletin® Version 3.8.9
Copyright ©2000 - 2024, vBulletin Solutions, Inc.
adv helm by : llssll
new notificatio by 9adq_ala7sas
دعم وتطوير نواف ا

This Forum used Arshfny Mod by islam servant