منتديات كلك غلا - ياصاحبي ياللي لك الروح تشتاق

يا صاحبي يا اللي لك الروح تشتـاق
وش حيلة اللي حب ذكرك وطاريـك

سبحت بحر فيه مـوج الجفـا فـاق
مـا همتـك عيـن هدبهـا يداريـك

أقفيت وأعتم فـي مرائـيّ الإشـراق
وأصبحت في ليـل غسامـه تهاليـك

وأوقدت ضوي في الخلا براس معلاق
وأركى على صدري همـوم تناديـك

جرحتني ما تحسب لجـرح الأعمـاق
والله حسيبك يا الغلا مـن يجازيـك

كذا تغيب وتحرق بروحـي إحـراق
من دون لا سبة ولا عـذر يعفيـك

يا قلـب لا تحـزن تطلـع للآفـاق
قد صار للي مثلنا مثـل مـا فيـك

أدري صعيبة وإن بدا الحمـل ينطـاق
فالصبر يا قلبـي معـادي محاكيـك

حاول تصبر وأفرح الـروح بإعتـاق
واكسب رضا الله والله اللي ينجيـك

ونبع الدموع اللي على الخد ينسـاق
حاول تسده مـن عـروق تجاريـك

ويا جعل دار حط فيها الغضي سـاق
دار بها الرمضـاء وعسـر المداريـك

يمطر بها من صادق الوسمـي حقـاق
وتهـل بالجنـات خيـر وتبـاريـك

وان قالها الله صحت من روس الأطواق
يا صاحبي وإن غبت مانـي بناسيـك

لابد عقب الليل مـا يظهـر إشـراق
ويبتل حلـق اللـي تقطـع يناديـك