يالله يارب العذاب المستطير

[كاتم العبره]

يالله يارب العذاب المستطير
......... مهلكن فرعون واملاكه وقومه

الآله اللي في الخافي خبير
......... يعلم اللي سرّته ناس ٍ ظلومه

اكفنا يا رب معدوم الضمير
......... لا دخل ما بيننا يبغى الخصومة

ذمته بريال واضنه كثير
......... هو على بعضه ولا بريال اسومه

لو يحاول يعتلي يبقى حقير
......... ولو طلع له ريش يبقى ريش بومة

ولو كبر عمره فـ له عقل ٍ غرير
......... المدايح بالهروج اقصى حلومه

بالرموت اذا بغوا منه يسير
......... من ضغط خشمه يقضي له لزومه

بين قومه لا يشار ولا يشير
......... وعزتي للي مهمش بين قومه

حسبته ما بينهم مثل الصغير
......... الهروج الناقصة اكبر همومه

والدجاجة طير .. لكن ما تطير !!
......... مثل شيخ ٍ شيخته كشخة هدومه

قالوا ( ....... ) تدل على البعير
......... وشيمة الرجال تظهرها علومه

وانت بانت شيمتك يومك عشير
......... ارخمة ولا تشرفنا الرخومة

انت تغرق لو تطبّح في غدير
......... وش عليك من البحر الازرق تعومه

مستواك وتعرفه دايم أخير
......... مهما تتعب جسمك وتنهك عزومه

وكان من فعل النشاما تستغير
......... شوف لك ونعم تعلم من سلومه

الشكالة غير والقالات غير
......... والفخر ما كل رجال ٍ يرومه

فرقهم مثل اللي اعمى والبصير
......... اللي اعمى ما يشوف الا بـ نومه

رح على فالك عسى عمرك قصير
......... جونا يصفى وتتجلى غيومه

والعتب واللوم للّي فيه خير
......... واللذي ما فيه خير ٍ ما نلومه !!


وسلامتكم