منتديات كلك غلا - عرض مشاركة واحدة

10-20-2011, 10:19 PM

بالليل راح الكل على بيته...وفي بيت ابو ماجد بالتحديد..
العنود قاعده في غرفتها...تقلب ماضيها وحاضرها ومستقبلها..وكيف كل شي ممكن يتغير في يوم وليله..امس كانت تحب طلال وما يحبها...اللي بعده طلال حبها..اللي بعده تركت طلال..واللي بعده طلال يخطب اختها...وشلون كل هذا يصير واي عقل ممكن يتحمل هذا المنطق او يفسره...
قطع عليها تفكيرها صوت الباب..
العنود: تفضل...
عبير طلت عليها من الفتحه: ممكن ادخل...
العنود ابتسمت: ايوه ممكن..
عبير دخلت وسكرت الباب وجلست على السرير..:وش تسوين...
العنود: افكر...
عبير: في ايش؟؟
العنود تستهبل: في حبك اللي اخذ عقلي...
عبير:مشكوره يا قلبي..
العنود: لا تصدقين عمرك..وش عندك جايه....
عبير محتاره كيف تبدا: بصراحه انا جايتك في موضوع ودي افاتحك فيه من زمان بس ماكان فيه وقت..والحين احس انه القوت المناسب...
العنود وهي خايفه من الموضوع: تكلمي..
عبير: انا يا العنود بصراحه ادري انك...شوفي بتقولين في البدايه اني انانيه واني واني واني..بس صدقيني يا العنود ما اقدر اسوي مثل اللي سويتيه..
العنود: وش تدرين عنه؟؟
عبير وهي خايفه من ردة فعل العنود: كنت ادري انك....انك تحبين طلال..
العنود انصدمت: كنتي تعرفين وشلون...؟؟
عبير: امم سمعتك وانتي تكلمين ريم وكنتي منفعله انتي وياها..
العنود مازلت مصدومه: ايوه ولما عرفتي وش سويتي..
عبير وهي تلعب في اظافرها: صدقيني يا العنود..اني زعلت انك ضحيتي به...حتى لو كان عشاني..بس في نفس الوقت كبرتي في عيني مليون مره..وحسيت نفسي اني صغيره قدامك..وماني عارفه كيف اجازيك مو عشانك تركتي طلال لي..لا لانك تركتيه عشاني...عشان خاطري ما تكسرين فيه...
العنود ابتسمت ابتسامه سخريه: عادي..ما سويت شي..
عبير: العنود...انا ما راح اوفق على طلال لحد ما انتي توافقين..لو ما اخذناه انا وياك..عادي راضيه باللي انتي تقررينه..
العنود: عبير احب اقول لك شي اوضحه لك..اني اكتشفت ان حبي لطلال وهم..فراغ عاطفي...لان قلب العنود مستحيل احد يدخله...عشان كذا وافقي عليه وما عليك مني..بعدين ليش تخلينه لغيرك..ترى طلال كل بنت تتمناه..وانتي تستاهلينه وهو يستاهلك..
عبير فرحت: صدق يا العنود انتي راضيه..
العنود: ترى اصدق عمري..
عبير ضمت العنود: والله لو الف الدنيا كلها ما راح القى وحده مثلك..
العنود: بشويش علي ..تراني حساسه...
عبير باست العنود: الله يخليك لي ا نشا الله ولا يحرمني منك يا الغاليه..
العنود: يله روحي لغرفتك ابي انام...
عبير: تصبحين على خير..
واول ما طلعت عبير...العنود رمت نفسها على السرير..وبكت وبكت وطلعت كل اللي في قلبها..ودعت كل خيوط الامل وهي مقتنعه باللي سوته وارضيه ميه بالميه..كذا الحياه علمتها ان مو كل شي نبيه ممكن يتحقق ومو كل شي حاولنا الوصول له نوصل له..العنود حاولت وحاولت وحاولت ووصلت لكن ما امداها تتهنى في نجاحها لان القدر يحب يلعب في قلوب البشر..القدر لعبته صعبه وما تنفهم..القدر شي مستحيل الانسان يتوقع حصوله..لانه كله في علم الغيب...
&&&&&&&&&&&&&&&&&&&&&&&
في ارض بعيده عن الكل...بعيده عن الاهل والاصدقاء والاحباب..في الغربه والوحده وعالم من الحزن..يتوسطه وليد...
وليد يمشي في شوارع عاصمة كندا اوتاوا..تحت المطر بدون مظله..راح يدرس عسى الدراسه تلهيه عن الي خذت قلبه وفكره لكنه اكتشف ان هي الوحيده المسيطره عليه...يمشي ويطالع اللي حوله...اشكال غربيه..ناس مختلفه..اطباع عجيبه..كيف بعيش وسط هالناس..واخيرا وصل للباب العماره اللي ساكن فيها ودخل..طلع اللفت للدور الثالث..طلّع مفتاح شقته وفتح الباب ودخل..
راح سيده يغير ملابسه المبلله ويتروش ويرتااااح...وبعد هذا كله صلح له كوب كوفي...وجلس على كنبه في الصاله..يفكر كيف يتخطى هذي المرحله اللي عايشها..لازم يكمل حياته ويبداها من جديد.. بس بأسلوب ثاني..فكر.....فكر...ووصل لحل..انه لازم يعيش بقلب من حديد..ويرجع وليد الاول بقوته ووليد الثاني بقسوته...وقرر يقسى على نفسه وعلى الناس..وعلى الكل..وان هذا الحل الوحيد والمناسب لمثل هذي الحاله وهذي العيشه..<<يا ترى بيقدر..
&&&&&&&&&&&&&&&&&&&&&&&&&
في الرياض ..خصوصا في بيوت ابطالنا الدنيا مختبصه ..بكره زواج رغد وتركي..والهنوف ومشاري...
ريم ورغد حاضنين بعض ويبكون...
ريم وهي تشاهق: والله بشتاق لك يا رغد...وشلون اكمل حياتي بدونك..
رغد تشاهق اكثر منها: خلاص والله قطعتي قلبي..
ريم تكمل: والله البيت بدونك بيظلم...مين بيكلمني..ومع مين بسولف..ومين راح اغثه بلقافتي..
رغد: حرام عليك والله عذبتيني..ترى بهون..
ريم بعدت عنها: لالا خلاص..بس والله والله اني بيضيع بدونك..
جات ام مشاري: وش فيكم..
ريم: يمه رغد بتروح وتخلينا..
ام مشاري دمعت عيونها: تعالي رغد قلبي في حضن امك يا بعد قلبي..
رغد راحت ركض لحضن امها: يمه والله عورتوا قلبي..
ام مشاري: والله بفقد الغاليه رغد..ودلوعتي رغد..والكبيره رغد .والعاقله رغد..واللي اعتمد عليها..
ريم سكتت وطيرت عيونها: لا والله وش بقى لي..
ام مشاري:انتي مثلها..بس هي بتروح وتخليني...
رغد: ترى بهون..خلاص مابي اتزوج ابي اقعد معاكم...
ام مشاري مسحت دموعها: بلا هبال...الحين انتي عروس..وحافظي على بيت زوجك يمه..وطيعيه.."وقعدت تنصح فيها وريم قاطه في السالفه"
&&&&&&&&&&&&&&&&&&&&&&&&&
الهنوف في بيتهم مسويه نون وما يعلمون..خايفه وتبكي وصارت تنتفض من الخوف..
ام تركي: خلاص يمه الهنوف اهدي شوي..والله مو لهدرجه يخوف,,
الهنوف: لا يمه...انا خايفه..خايفه اروح اسكن بروحي مع واحد ما اعرفه صعبه والله صعبه..
ام تركي: يا ربي وش يفهمها هذي..
جاء تركي: خير وش صاير..
ام تركي: هنوفتي خايفه وما ادري وش فيها...
تركي: اتركي عنك دلع البنات...ترى مشاري ما يحب هالدلع..
الهنوف سكتت: صدق!!
ام تركي: يمه منكم يا هالبنات...
الهنوف ضحكت من بين دموعها: يمه وش اسوي؟؟؟
ام تركي قعدت تهدي في بنتها وتقرا عليها وتنصحها..
&&&&&