وانا همومي تجيني لا بدا ليلي !!
تجتال داخل خفوقي في وسط صدري
انهد منها شموخي واتعبت حيلي
ولاقلت ذنبي دخيلك قاللي مدري
هم ٍ بقلبي سكني واسرف بويلي
حتى بشعري بلاني واعتلى سطري
ماكني الا بوجهه مسرج ٍ خيلي !!
ماقد تركني معي حتى طلع فجري
ولاغير ضيقي معه غاية محاصيلي
الحظ عاثر واشوفه مهتوي جبري
ضيـّـق فضاء الكون فيني فوق تكبيلي
والصاحب االلي نسى ماهو على خبري
معقووول ينسى مع الايام ..تدليلي !!
لصار حبي لقلبه ياعرب فطري
وشلون يرضى مع الايام تبديلي !!
باقصى الشرايين حبه لو درا يجري
ياليت مره معي يصدق ..ويوفيلي
ما يذكر انه تمنى باللقاء عطري
وفنجاله اللي اصبه من معاميلي
سنين راحت وانا الهوجاس بي يسري
ودموع عيني عشانه بل منديلي
وش غــيّــر الوقت يومه ماعرف قدري
راح وتنـكّر ولاعبـّر مراسيلي
هو اعرف الناس في شوقي وبي يدري
ولا فيه داعي انا اشرح له تفاصيلي
ولا يبكي الحب دامه من حفر قبري
مابيه يرجع على ذكراي ويجيلي
ودعت دربه معي ما عاد لي يطري
يكفيني اللي مضالي من غرابيلي
وانا همومي تجيني لا بدا ليلي