أبـطـل , زقـايـر

أبـطـل زقـايـر

أبـطـل زقـايـر

يا غايبه وان كان فيها جماله
........... تجمَلي ياام الحلا و الظفاير

بالله شوفي صاحبك كيف حاله
........... شوفيه في غيبتك كيف صاير؟!


صارت حياته ضيق خلق وبطاله
........... هم وسهر واوراق شعر وزقاير!!

يعني حبيبك صار حالته حاله
........... ما باقي الا انه يدن العباير

الله لا منه ذكر ما مضى له
........... قبل الدواير ما تجر الدواير

يوم الطفوله والشقا والجهاله
.......... يوم الصغاير في عيونه كباير

ايام كان معانده راس ماله
.......... ويسوق لهبال الشقاوه بشاير

يا ما امتلى بالحب والطيش باله
.......... وياما امتلى من شخبطته العواير

يكتب عليها : ( عاشقك للثماله )
.......... ويخط توقيعه : (جريح الضماير)

ياما اشتكاه ابوك في بيت خاله
.......... وياما تحصَل من هواك العزاير

مره حلف بأنه يبطَـل هباله
.......... وقبل يكمَل .. فك اخوه الستاير

ثم طالع الشباك لينك قباله
.......... وفي اقل من لمح البصر جاك طاير

على صغر سنه مميل عقاله
.......... كاشخ وناسي لا يصك الزراير

لا شافك يتمتم بحاله لحاله :
.......... لعيون هالشوفه تهون الخساير

ولا شاف زول ابوك حذَف نعاله
.......... الحب جاير .. لكن العود جاير

طفل يتيم ورغم الاحزان داله
.......... ما يدري ان حظه مع الوقت باير

كنتِ طموحه كنتِ اغلى حلاله
.......... كنتي وصرتي بس يا ام الظفاير

طفل زرع من ضحكتك في خياله
.......... لين اثمرت شعرٍ هزاله حراير

لا تتركينه في غيابك لحاله
.......... بالله شوفي كيف هالطفل صاير

ووحده بوحده كان عندك عداله
.......... اتبطَلي غيبه وابطَل زقاير


....................................

الموضوع الأصلي: أبـطـل زقـايـر || الكاتب: بقـايـا عطرهـا || المصدر: منتديات كلك غلا

https://www.klk-gla.com/vb

كلمات البحث

العاب ، برامج ، سيارات ، هاكات ، استايلات