منتديات كلك غلا - عرض مشاركة واحدة

01-10-2013, 11:03 PM

غرفة نواف ...
نواف نايم عالسرير ... حرارته مو راضية تنزل ... نايم عالسرير وما فيه حيل ابد ... بس فاتح عينه ... فواز قفل جواله عشان يرتاحون من اتصالات هبة اللي ما وقفت من امس ... منيرة عنده ودموعها ما وقفت ... ليان ورؤى ... كلهم جالسين حوله وموعارفين ايش ممكن يقدمون له ...
دخلت عليهم لينا: ماما ... عمي تركي وصل
منيرة: الحمد لله على سلامته ... اقدر اطلع لغرفتي ولا واقف في الطريق؟؟
لينا: هو تحت ... قال لي اعطيك خبر انه بيدخل
منيرة وهي تطلع من الغرفة: حياه الله

دقايق ودخل تركي عليهم ... عينه مليانة دموع ... واول ما شاف وجه نواف وفواز ما قدر يستحمل اكثر ونزلت دموعه ...
بس دخل ركض فواز له وحضنه وهو يبككككككككككي ...
تركي وهو يمسح على ظهره: خلاص يا فواز ... يكفي
فواز: ايش يكفي يا عمي ... احس اني اختنق اختنق
تركي: لا حول ولا قوة الا بالله ... اهدى وانا بحل لكم الموضوع ان شاء الله
تركه وراح لنواف النايم عالسرير ... حضنه وجلسوا يبكون بصمت ...
شهد حضنت فواز: مو مصدقة يا فواز ... مو مصدقة
فواز: يعني انا اللي مصدق ... احس اني احلم
شهد: يعني واحد منكم يصير ولد خالتي؟؟؟
هز فواز راسه من غير ما يتكلم ... تركته وراحت تسلم على نواف ....
تركي مسح دموعه وجلس: وين عبدالعزيز؟؟؟
ليان: في غرفته
تركي: ليش فيه شي؟؟؟
ليان: كل شوي يدخل ويطل علينا ويرجع لغرفته ... هو بعد ضايق صدره بقوة
نواف: واجد عليه
تركي: نوااااااااااااااااف ... هذا ابوك ... طال الزمن او قصر ... واكيد انه سوى هالشي لمصلحتكم
نواف: مصلحتنا؟؟؟ أي مصلحة تخلينا نتبرى من امنا؟؟
تركي: انا معك ان التصرف من اساسا غلط ... بس هو ليش تصرف كذا؟؟؟ ايش كان هدفه؟؟ هدفه حماية ولده ... واعتقد ان هالشي يشفع له
نواف وفواز طالعوا في بعض ولفوا للجهة الثانية ....
دخلت منيرة تقطع الصمت اللي حصل: السلام عليكم
قامت شهد وسلمت عليها وبعدها وقف تركي احتراما لها: هلا يمه
منيرة: الحمد لله على سلامتك يا تركي ... نورت بيتك
تركي: منور بوجدودك يمه ... انتي شمعة البيت ... الله لا يحرمنا منك
منيرة: تسلم حبيبي ... تسلم
تركي: وينه عبدالعزيز؟؟؟
منيرة وهي منزلة راسها: في غرفته
تركي: اقدر اشوفه؟؟؟
منيرة: تفضل ... انا ما قلت له انك هنا ... فلا تتوقع انه يدري وما يجي يركض لك
تركي: لا تعلميني في اخوي ... اعرفه واعرف طيبة قلبه

غرفة عبدالعزيز ...
سمع صوت الباب: تفضل
طل تركي براسه وهو يبتسم احلى ابتسامة: ...............
عبدالعزيز من شافه ردت له الروح ... قام وقف ... تركي تقدم له ... اول ما وصلوا لبعض ... وقف كل واحد يطالع في الثاني ... فتح عبدالعزيز ذراعينه ... رممممممى تركي نفسه عليه وحضنه
عبدالعزيز: الحمدلله على سلامتك يا تركي ... الحمد لله على سلامتك
تركي: الله يسلمك ياخوي ... الله يسلمك
عبدالعزيز: بشرني عنك ... وعن صحتك ... والزواج شلون؟؟؟ وشهد كيفها؟؟
تركي: كل هذا بخير وتمام وعال العال ... بس من دخلت بيتك تغير كل شي
عبدالعزيز: تركي ... ما ابي اسمع شي في الموضوع هذا
تركي: ليش يا خوي ... ليش؟؟؟
عبدالعزيز وقف وهو معصب: انت ما تعرف انا ليش سوت كذا ... انت ماتعرف ... مو مستعد اني اهدم كل اللي بنيته هالسنين
تركي: بس هالبنيان تصدع ... واحتمال انه ينهدم في أي وقت ... ليش ما تهدمه بنفسك وترجع تبنيه؟؟
عبدالعزيز: .......................
تركي: ايش قلت ياخوي؟؟؟
عبدالعزيز: لا ... لا ... لا ياتركي لا
تركي: والحل؟؟
عبدالعزيز: الحل انهم ينسون اللي سمعوه ... سامع ينسونه ... ويرجعون يعيشون مثل اول
تركي: مع اني عارف وانت عارف ان هالشي مستحيل ... بس على راحتك

غرفة نواف ...
رن جوال ليان ... رفعته وشافت الاسم ... حطته عالسايلنت واشرت للينا ورؤى يلحقونها برا
وقفت عند غرفتها تنتظرهم ... وهي تطالع باسم المتصل ...
وصلت رؤى: خير يا ليان؟؟
ليان: وينها لينا؟؟؟
رؤى: انتظري عليها تطلع من غير ما يحسون الاولاد
وصلت لينا: خير؟؟؟ ايش في؟؟
رفعت ليان جوالها لهم يقرون اسم المتصل ...
رؤى: لا حول ولا قوة الا بالله
لينا: حبيبة قلبي ... ايش نسوي؟؟؟
ليان: مو اول مرة تتصل ... وانا ما ارد عليها ... اتوقع لو تأخرنا عليها شوي تتصل في امي ... اكيد جالسة تحاتي نواف اللي ما رد عليها من امس واليوم مقفل جواله
لينا: خلاص ردي عليها يا رؤى
رؤى: وانا دايما حاطيني بوجه المدفع؟؟؟ ما اقدر
ليان: ما ادري ايش اقول لها
: تقولين لمين؟؟؟
التفتوا البنات وشافوا فواز
لينا: جيت بوقتك يا فواز
فواز: ايش صاير؟؟
ليان: هبة من الصبح وهي تتصل علي .. وما وقفت ... وانا ما ارد عليها ... اخاف تتصل في امي
فواز: لا حول ولا قوة الا بالله
رؤى: ردي عليها ياليان ... وقولي لها أي شي
ليان: يا سلام ... انتي ما رضيتي تردين وانا ارد
رؤى: هي داقة عليك ... لو انا رديت بتشك اكثر صدقيني
فواز: صح كلام رؤى ... ردي عليها يا ليان
ليان: طيب ايش اقول لها؟؟
فواز: قولي لها مريض
لينا: اخاف تلبس عبايتها وتجي تزوره
رؤى: قول لي لها مريض ... واذا قالت ايش فيه ... قولي مسخن ... وهو دايما اذا سخن ما يرضى يشوف احد او يرد على احد ... بس فواز يدخل عليه ويعطيه الدوا ... وهو دايما كذا ... اذا مرض ما يحب احد يدخل عليه
لينا: صح كلام رؤى ... وكذا ما بتجي وتفشل عمرها
ليان: اوووووووووووووف ... امري لله
راحت ليان ترد على هبة ... ورجعت لينا لغرفة نواف ... نزل فواز راسه وهو يضغط عليه بيده ... حطت يدها على كتفه ورفع راسه لها
رؤى: حبيبي تعبان؟؟؟
فواز: ايش تتوقعين يا رؤى؟؟
رؤى: مصدع؟؟
فواز: شوي
سحبته رؤى من يده: ممكن تجي معي شوي؟؟
فواز: نواف بروحه
رؤى: كلهم عنده ومو ضاره شي ... تعال معي
مسكت يده ومشت معه لين جناحهم ... وصلته للسرير وجلسته: انتظرني ثواني
تابعها فواز بنظراته ... راحت لادراج تسريحتها وطلعت منه علبة البنادول ... وراحت للثلاجة وطلعت الموية منها
راحت عنده ومدت يدها: خذ لك حبتين بنادول
اخذ فواز البنادول والموية من غير ما يتكلم ... خلص الموية وقام بيوقف ... حطت يدها على كتفينه وجلسته مرة ثانية: وين؟؟؟ انا ما خلصت
فواز: بروح لنواف!!
رؤى: انتظر شوي
نومته على السرير: بسوي لك مساج خفيف وبعدها روح لنواف او لاي مكان تبيه
سمع فواز كلامها لانه فعلا بحاجة لهالشي .. راسه بينفجر من الصداع

غرفة ليان ...
اتصلت في هبة بعد تردد ... بس ما لها الا هالحل ... سمت في نفسها ودقت عالاتصال
من اول رنة ردت عليها هبة بلهفة: الووووو... ليان ... وينك؟؟؟
ليان: هلا هبة ... موجودة
هبة: وليش ما تردين على التلفون؟؟؟
ليان: كنت جالسة تحت وناسية تلفوني فوق
هبة: بغيت اسالك عن نواف ... اتصل فيه من امس وما يرد علي ... واليوم جواله مقفل
ليان: ها ... ايه هو تعبان شوي
هبة بخوف: ايش فيه؟؟؟
ليان: لا ابد ... بس مسخن وحرارته مرتفعة شوي
هبة: سلامته ما يشوف شر
ليان: الشر ما يجيك
هبة: طيب اقدر اكلمه؟؟
ليان: هو نايم
هبة: امممممممممم طيب اذا حصلت احد يجيبني بجي واطل عليه
ليان بسرعة: لاااااااا
هبة باستغراب: ليش؟؟؟
ليان: انتي ما تعرفين نواف ... اذا مرض ما يحب يشوف احد ولا يكلم احد
هبة: بس انا مو أي احد ... انا زوجته!!!
ليان في نفسها: بلاك ما تعرفين انك ممكن تكونين خالته
ليان: حتى احنا خواته ما نشوفه ... ولا امي ... ما يرضى احد يدخل عليه غير فواز ... حتى ما يجلس عنده بس يعطيه الدوا ويأكله ويطلع
هبة: ايش الطبع الغريب هذا؟؟؟
ليان: هذا هو نواف من يومه
هبة: طيب على راحته ... بس تكفين طمنيني عليه
ليان: ان شاء الله
هبة: وخلي جوالك جنبك ... مو تنسينه فوق
ليان: ولا يهمك
هبة: في امان الله
ليان: مع السلامة
هبة: ليااان
ليان: هلا هبة
هبة: سلمي على نواف
ليان: .......................
هبة: ليان تسمعيني؟؟؟ سلمي على نواف
هبة: ان شاء الله

جناح فواز ...
خلصت رؤى وقامت تغسل يدها ... مسكها فواز ... لفت عليه
فواز: رؤى؟؟
رؤى: عيونها
فواز: تحبيني؟؟؟
رؤى: انت عندك شك بهالشي؟؟؟
فواز: حتى لو كنت مو ولد خالتك؟؟
رؤى: وايش دخل هالموضوع بحبي لك؟؟؟
فواز: يعني ما تتركيني؟؟
رؤى: فوااااااااااز ... انت من جدك اتركك عشان موضوع سخيف مثل هذا؟؟؟
فواز: سخيف؟؟؟ تعتبرينه موضوع سخيف؟؟
رؤى: هو يمكن موضوع مهم بالنسبة لك ... بس بالنسبة لي انا سخيف ... انا ما همني ولد من تكون ... انا همني انك فواز ... حبيبي اللي ما استغنى عنه

مر يومين والوضع على ما هو عليه ...
نواف حرارته مو راضية تنزل ...
هبة مو راضية تبطل اتصالات وترد عليها ليان وتطمنها
عبدالعزيز مو راضي يتكلم
فواز جواله مو راضي يسكت من اتصالات غريبة وتهديدات وهو مطنش الموضوع عالاخر
منيرة مو راضية تبطل دموعها
نورة عرفت بالموضوع من شهد وركضت تشوف عيالها او بالاخص تدور بين عيونهم على ولد اختها وحذرها عبدالعزيز من انها تتكلم او تقول للناس او حتى يطلع الخبر

رن جوال فواز للمرة الالف اليوم ... هو عارف الرقم هذا ... اوووووووف خلني ارد واخلص منه ... طلع من غرفة نواف ونزل للصالة حتى ما يسمعه احد ...
فواز بعصبية: نعم ... انت ما تبطل اتصالات؟؟؟
: ولا ببطل حتى اخذ بثاري
فواز: عندك شي عندي؟؟
: جنيت على نفسك باتصالك عالشرطة
فواز: ايش كنت تبيني اسوي وانا اشوف الولد بالحالة هذه قدامي؟؟؟
: تعالج الولد وانت ساكت ... اعتقد ان وظيفتك دكتور ... مو شرطي او محقق
فواز: يا سلاااااااااام
: طبعا ... انت تستلم فلوسك على علاجك ... ليش تتدخل وتتصل بالشرطة ... لو كنا نبي احد يتصل بالشرطة كنا رحنا لاي مستشفى حكومي ... مو ندفع فلوس وننفضح!!!
فواز: يعني المستشفى الخاص ناس بايعة ضميرها؟؟؟ لااااااااا غلطان ... الدكتور دكتور وين ما يكون
: المهم انا مو متصل اسمع محاضراتك
فواز: ليش متصل؟؟
: ابيك تكتب وصيتك هاليومين ... لانك ما بتلحق تكتبها بعدين
فواز: ما هميتني لا انت ولا عشرة من امثالك
قفل السماعة بوجهه وهو معصب حده من هالناس اللي ما تخاف ربها ولا عندها ضمير
سمع صوت الجرس ... راح يفتح الباب وشاف عمه عبدالرحمن ...
فواز وهو يبوس راس عمه: الحمد لله على سلامتك يا عمي
عبدالرحمن: الله يسلمك ... وين ابوك؟؟
فواز: فوق في غرفته
عبدالرحمن: اطلع وقول له اني انتظره في المكتب تحت
فواز باستغراب: ان شاء الله
خالد: اخذني معك يا فواز