بسم الله الرحمن الرحيم
المكان / ادارة حكوميه
اليوم / السبـــت
الساعه الـ 8:20 دقيقه صباحاً
ملاحظــه :: ( جميع الأسماء هنا وهميه )
===================================
سعود / يا محبوب جب قهوهـ
محبوب / ...............
فهد / ياااا محبووووب وصمخ جب قهووووه
محبوب / ...............
فهد / وجع وصمخ / يا عيال من شاف محبوووب ؟؟ وين القهوه والشاهي اليوم ؟؟ وش هالعامل الزفت
سلطان / قايل لكم اقلعووووه الله يقلعه ونشوف قهوجي غيره
انا / والله انا مثلي مثلكم من الساعه 8 وانا هنا وما شفته / خبري فيه يوم الاربعاء الظهر يوم يمر وحنا جالسين يبي خمسين ريال يقول السكر مخلص / اوه صح نسيت اوقع بدفتر الحضور
فهد /
بنغالي هذا ( باستهزاء ) : والله شكله ماراح يرجع / بس ليه مستعجل عالتوقيع / ماعمرهم قفلو الدفتر
انا / ( لحظة تدارك ) / اي والله صح / خلنا بالزفت محبوب والا التوقيع نوقع نهاية الدوام حضور وخروج وحضور بكرا !!
تركي / مالها الا رجالها انا بقوم اضبط لكم الشاهي والقهوهـ ( وعلي الطلاق ) ان ماطردتو محبوب لـ ألعن .... ( طيب لا تكثر سكر بالشاهي وينسدح علينا ابو نايف )
ابو نايف / اصلا هـ الكلـ .. البنغالي محبوب رافع سكري من شفت وجهه
//
وصلت دلة القهوهـ / وتقهوينا / وعينا من الله خير / ونصف السوالف ( هالبنغالي لازم نطرده ونشوف غيره )
مشى الوقت / وكل من جاء سأل عن القهوهـ / وعرف ان هالبنغالي ماجاء
لعنه كم لعنه / وراح يقهوي نفسه
الساعه الآن : الـ 9:30 صباحاً ,,,
باقي نصف ساعه ويجي الأغلبيه من الموظفين يداومون / ونفطر
جاء وقت الفطور / وبالعاده محبوب البنغالي ( يطس ) يجيب لنا الفطور ويضبط لنا الجلسه
رجعنا لطاري محبوب البنغالي / وخذ لك كم لعنه / سلطان قال ابروح اجيب فطور
وقلت له بروح معكـ ( اغير جو ) مالي نفس بالدوام
خذينا فطور / ومرينا خذينا لنا خبز تميس
ورجعنا / وافطرنا وعينا من الله خير
الساعه الآن : الـ 10:10 صباحاً ,,,
( اوووهـ تصدقون يا عيال ملل الدوام / تعبنا )
رحت جلست بمكتب ابونايف / وفيه معي معظم موظفين القسم ( جرايد / نت / اخبار / بر / فضايح )
الساعه الآن : الـ 10:30 صباحاً ,,,
فجأه دخل عامل
بنغالي اسمه مؤمن يشتغل عند قسم معنا بنفس الاداره
ومعظمنا بوقت واحد وبصوت واحد قلنا :
هيه يا مؤمن ما شفت خويك البنغالي محبوب ؟؟
مؤمن / محبوب صباح يوم الخميس بشارع الصناعيه يقطع الشارع
و صدمته سيارهـ
و .. مات .. بمكان الحادث
وهو موجود بثلاجة الموتى بمستشفى .......
ينتظرون كفيله ينهي اجراءته ويرسله لأهله
:
:
:
:
:
:
الجميع بهذه اللحظه / صمـــت
تنهد تركي بصوت مبحوح / الله يرحمه
والجميع / انا لله وان اليه راجعون /
الله يرحمه
الله يرحمه
الله يرحمه
ابو نايف ارتفع عنده السكر بهذي اللحظه ووتدارك احد الاخوان الوضع وراح لسيارته يجيب له حبوب السكر
خرج العامل مؤمن من المكتب / وعم السكوت
ترفع راسكـ تشوف الوجوهـ / شاحبه / كئيبه / مستغربه / ماهي مصدقه
/
/
/
خرجت من المكتب لمكتبي / وجلست ارتب الاوراق المتناثره عليه .
بدأت الذاكره تعود لي
وافتح هاتفي الجوال / واتذكر يوم الاربعاء الماضي
قبل خروجنا من الدوام / جاء محبوب البنغالي يقول السكر خلص
وعطيته خمسين ريـال / ومن باب المزح معه قلنا له
لازم نصورك وانت معك الخمسين ريـال
وش يضمن لنا يوم السبت تجي تقول لنا ماعطيتوني الخمسين
وكان مبسوط لان صورته بتطلع بالجوال
ووقف مبتسم وماسك الخمسين ريال قبل اقل من 24 ساعه من وفاته
وصباح السبت
لا جاء محبوب ولا جاء السكر .
ولم يحضر الا
السب واللعن والتهكم بخلق الله
رحمك الله يا محبوب / ورحم الله جميع اموات المسلمين
/
دوماً نحن قساة مع الغير
دوماً نحن نتوقع اننا وحدنا فقط الوحيدين من لنا قيمه ونستحق ان يهابنا ويحترمنا الغير
و ( يصطفل ) بقية خلق الله
هندي
بنغالي افغاني يماني
فعلاً معاملتنا سيئه بمعنى الكلمه مع الغير / معاملتنا تصل الى قمة التعالي امام خلق الله
ولا انسى الخادمات بالمنازل ( حدث ولا حرج )
وتعامل البعض معهن كـ حيوانات / رغم انهم مسئولين عنهن امام الله
الأم تسب وتلعن فيها
البنت تصرخ بوجهها وتهينها لأتفه الاسباب ( يعني اني بنت دلع وهاااي )
الابن بعض الاحيان يضربها ويعتدي عليها ( الا من رحم الله )
حتى الاطفال / تلاقيهم ما ينادونه الا باقبح الألفاظ
واعتبارهن كـ عبيد يحرمون من كل وابسط حقوقهم واولها الإحترام لخادمه مسلمه او غير مسلمه على حد سواء
يا ناس احمدو ربكم لا يجيكم يوم تلقون نفسكم تخدمون بنات وعيال واباء وامهات بدول اخرى
تخيل ان اختكـ رايحه تخدم ببيت / ولا تبعد بعيد
لا تخيلها برا السعوديه
تخيلها ببيت جيرانكم تخدم وتسب وتهان وتذل
معاملتنا فعلاً
/ مُقرفــه مع الأجانب \
والأمثلـه كثيــرهـ
يا ناس احمدو ربكم على ما اتاكم الله به من نعم
قبل ان يُذهب هذه النعم
الى متى هالتعالي اللي فينا على الغير
اعترف
ان تغير لدي الكثير والكثير بسبب ما حصل ( لأخي ) محبوب البنغالي
ولكم الحرف
ولي توديعكم / وقبل توديعكم
اعترف بكل فخر
بنغالي غير لي حياتي
((** منقووووووول بتصرف **))